Disambishil

5 Ou ndiy buku ulejena rusang ra Adam. Pa dichuku damutangau Adam kud Nzamb, wamutanga mu chifu cha Nzamb. 2 Ndiy wamutanga ikuny ni mband. Pa dichuku dayitangay, wayiyukisha ni wayipila anch Antu.*

3 Adam wasala mivu chitot ni makum masatu (130), kupwa wavala mwan ikuny ufanakena ni ndiy, mu chifu chend, ni wamupila anch Set. 4 Kupwa kwa kumuval Set, Adam wasala mivu yitot chinan (800). Ni wavala an amakuny ni amband. 5 Chawiy mu mwom wend wawonsu, Adam wasala mivu yitot chidivu ni makum masatu (930), kupwa wafa.

6 Set wasala mivu chitot ni yitan (105), kupwa wamuvala Enosh. 7 Kupwa kwa kumuval Enosh, Set wasala mivu yitot chinan ni sambwad (807). Ni wavala an amakuny ni amband. 8 Chawiy mu mwom wend wawonsu, Set wasala mivu yitot chidivu dikum ni yaad (912), kupwa wafa.

9 Enosh wasala mivu makum chidivu (90), kupwa wamuvala Kenan. 10 Kupwa kwa kumuval Kenan, Enosh wasala mivu yitot chinan dikum ni yitan (815). Ni wavala an amakuny ni amband. 11 Chawiy mu mwom wend wawonsu, Enosh wasala mivu yitot chidivu ni yitan (905), kupwa wafa.

12 Kenan wasala mivu makum sambwad (70), kupwa wamuvala Mahalalel. 13 Kupwa kwa kumuval Mahalalel, Kenan wasala mivu yitot chinan ni makum manying (840). Ni wavala an amakuny ni amband. 14 Chawiy mu mwom wend wawonsu, Kenan wasala mivu yitot chidivu ni dikum (910), kupwa wafa.

15 Mahalalel wasala mivu makum musamban ni yitan (65), kupwa wamuvala Yared. 16 Kupwa kwa kumuval Yared, Mahalalel wasala mivu yitot chinan ni makum masatu (830). Ni wavala an amakuny ni amband. 17 Chawiy mu mwom wend wawonsu, Mahalalel wasala mivu yitot chinan makum chidivu ni yitan (895), kupwa wafa.

18 Yared wasala mivu chitot makum musamban ni yaad (162), kupwa wamuvala Enok. 19 Kupwa kwa kumuval Enok, Yared wasala mivu yitot chinan (800). Ni wavala an amakuny ni amband. 20 Chawiy mu mwom wend wawonsu, Yared wasala mivu yitot chidivu makum musamban ni yaad (962), kupwa wafa.

21 Enok wasala mivu makum musamban ni yitan (65), kupwa wamuvala Metushela. 22 Kupwa kwa kumuval Metushela, Enok wadandamena kwend pamwing ni Nzamb wakin mu mivu yitot yisatu (300). Ni wavala an amakuny ni amband. 23 Chawiy mu mwom wend wawonsu, Enok wasala mivu yitot yisatu makum musamban ni yitan (365). 24 Enok wadandamena kwend pamwing ni Nzamb wakin. Kupwa kwikil kand muntu wamumana, mulong Nzamb wamusenda.

25 Metushela wasala mivu chitot makum chinan ni sambwad (187), kupwa wamuvala Lamek. 26 Kupwa kwa kumuval Lamek, Metushela wasala mivu yitot sambwad makum chinan ni yaad (782). Ni wavala an amakuny ni amband. 27 Chawiy mu mwom wend wawonsu, Metushela wasala mivu yitot chidivu makum musamban ni chidivu (969), kupwa wafa.

28 Lamek wasala mivu chitot makum chinan ni yaad (182), kupwa wavala mwan ikuny umwing. 29 Wamupila anch Now,* ni walonda anch: “Winou ndiy ukutwongoja ku midimu yetu yikash ni ku midimu ya makas metu tusadina mulong wa divu dashingay Yehova. 30 Kupwa kwa kumuval Now, Lamek wasala mivu yitot yitan makum chidivu ni yitan (595). Ni wavala an amakuny ni amband. 31 Chawiy mu mwom wend wawonsu, Lamek wasala mivu yitot sambwad makum sambwad ni sambwad (777), kupwa wafa.

32 Pawanyishay Now mivu yitot yitan (500), wamuvala Sem, Sham ni Yafet.