So scriisardea o Solomon sicavel so daștil te întâmplol-pe orisavesa mașcar amende. Varecon daștilas te arăsăl te cherel iech baro păcato hai pala codoia te phenel că întâmplosardea-pe „de iech data”, bi te ajucărel-pe. Tha, dacă așel hai gândil-pe, daștil te del peschi sama că cărdea chichiva buchia negoghiaver cai îngărde-les te cherel cado păcato. Sar avelas, le amalimata cai îngărde-les pe iech drom nasul, le thana cai gălea sau so dichlea po interneto ci sas buchia lașe anda iech creștino. Sa cadea, daștil-pe că ci mai dea duma le Iehovasa ando manglimos, ci mai citisardea andai Biblia, ci mai gălea ca le întruniri sau andi predicarea. Cadea sar o tărno anda o lil Proverbe, daștil-pe că ci arăslea te cherel de iech data, bi te ajucărel-pe, o păcato. So sichioas de catar? Hachiaras că ci trebul te duriaras amen numai catar o păcato, tha vi catar le buchia cai îngăren amen te cheras iech păcato. O Solomon sicavel cadai buchi cana del duma anda o tărno cai si țârdino catar i jiuvli imoralo. (Mat. 5:29, 30) w24.07 16 ¶10, 11

So si o ‘barvalimos’ anda savo del-pe duma ando texto de aghies? Si i predicarea anda o Regato, iech buchi cai salvil vieți. (2 Cor. 4:1) Tha so si le „vase cărde andai phuv”? Von si le manușa le Devlesche, cai phenen le manușenghe i vestea lași. Andel ghiesa le Pavelosche, codola cai bichinenas folosinas vase cărde andai phuv caște îngăren lența habena, mol, love sau aver buchia cuci. Sa cadea, o Iehova dea amen o cuci mesajo anda i vestea lași. Le Iehovasa pașa amende, daisaras te astaras o zuralimos caște predichisaras mai dur pherde pachiamos. Poiechdata, cana jias andi predicarea, daștil te astarel amen i dar le manușendar sau i dar că von ci va camena te așunen amen. So daștil te ajutil amen te nachas părdal cadal daraimata? Te dichas so cărde le apostoli cana codola cai așenas lenghe contra phende lenghe te na mai predichin. Ando than te mechen-pe astarde daratar, von mangle le Iehovas te ajutil-len te den duma mai dur pherde tromai. Hai o Iehova dea-len sigo răspunso. (Fap. 4:18, 29, 31) De fiesavi data cana i dar le manușendar așavel amen te cheras leschi buchi, te mangas le Iehovas te bariarel ande amaro ilo sea mai but i iubirea caring le manușa, ca voi te avel mai bari sar i dar le manușendar. w24.04 16 ¶8, 9

I iubirea anda o Iehova zuriarel amen te sfințosaras lesco baro anav. Camas te ujiaras o anav le Devlesco cai sas-lo meliardo le Satanostar prin pesche jiungale hohaimata. (Gen. 3:1-5; Iov 2:4; Ioan 8:44) Cadea că, andi predicarea, das amari zor te phenas o ciacimos anda o Iehova sea le manușenghe cai așunen amen. Camas te sicavas sea le manușenghe că o Iehova si iubirea, că lesco raimos si orta hai lesco Regato va chosela sea i duch hai va anela i pacea hai i fericirea pi phuv. (Ps. 37:10, 11, 29; 1 Ioan 4:8) Cana phenas le manușenghe o ciacimos anda o Iehova, amen sfințosaras lesco anav. Sa cadea, sam zurales voime că traisaras amari viața sar Martori le Iehovasche hai bucurisaras o ilo le Devlesco. w24.05 18 ¶12