Wañuyqa llakikunapaqmi

KAYPI piensay: “Juj peliculapin qhawashanki juj allin reqsisqa artistata, yaqapaschá allinta piano tocay yachaqta. Videopin rijurimun juch’uy kasqanmanta, música tocay yachasqanmanta, sapakutilla practicasqanmanta ima. Chaymantataq fiestakunapiña tocashan, chaymantaqa viajayta qallarin mundontinta tocay yachasqanwan. Chay qhepamantaq rijurimun sasachakuypi tarikusqan, wañupusqan ima”.

Peliculapiqa cheqaqtapuni pasasqanmantan willan, ichaqa piano tocaqqa manan kausanñachu. Chhaynallataqmi pasan allin reqsisqa cientificokunawanpas, allinta pujllayta yachaqkunawanpas jujkunawanpas. Kausaspaqa imaymanatan ruwayta yacharanku, yaqapaschá tapukunchis: “Mana machuyanmanchu ni wañunmanpaschu karan chayri, ¿imakunatawanmi ruwanman karan?”, nispa.

Chhaynapin llapa runapas tukunchis (Eclesiastés 9:5). Imaymanataña ruwasunman mana machuyananchispaq chaypas, chaymanqa chayanchispunin. Vidanchisqa juj ratollan cambiarapunman, accidente pasawaqtinchis otaq mana jampikuy atina onqoywan kaqtinchis. Bibliaq nisqanman jinaqa vidanchisqa pacha phuyu jinallan “juj raton rijuriramun juj ratomantaq chinkarapun” (Santiago 4:14).

Wakin runakunaqa piensanku vidankuqa yanqapaq kasqanta, chaymi ninku: “Mijusunchis, ujasunchis, paqarinmi wañupusun”, nispa (1 Corintios 15:32). Chay nisqankuwanmi reparanchis runakunaqa wañuyta suyakushasqankuta. Llapanchismi tapukunchis, “¿imapaqmi kausanchis?” nispa. Astawanqa imaymana llakikunapi tarikuspan. ¿Maypin chay tapukuyninchispaq kutichiyninta tarisunman?

Askha runakunan cienciaq yachachisqanta maskhanku. Cientificokunaq estudiasqan, doctorkunaq estudiasqanpas yanapawanchismi chhikan unayta kausananchispaq, wakin estudiosokunaqa astawanraqmi estudiashanku astawan unayta kausanapaq. Chhaynaña kaqtinpas runaqa tapukushallanmi: ¿Imaraykun machuyanchis wañunchispas? ¿Jayk’aqllapas wañuyta atipasunchu? Qatimuq temakunapin chaymanta yachasun, kay tapuytawan kutichisunchis: ¿Imapaqmi kausanchis?