Tapuykuna
◼ ¿Imaynatan precursorkunata yanapasunman?
2009 watapin pachantinpi yaqa pusaq pachak waranqa cristianokuna cristianakuna precursor regular, precursor especial hina Jehová Diosta servirqanku. Chay iñiqmasinchiskunaqa allin kaqninkuta Diosman qoyta munaspan qonku: tiemponkuta, kallpankuta, kaqninkuta ima Diospa Gobiernonmanta allin willakuykunata predicanankupaq (Pro. 3:9). ¡May kusisqachá Jehová Diosqa sientekun chhayna kallpachakusqankuta rikuspa! Ñoqanchisrí, ¿Dios hinachu kusikunchis chay iñiqmasinchiskunaq kallpachakusqankumanta? ¿Imaynatan paykunata yanapasunman tukuy kallpawan kusikuywan ima Diosta servishanallankupaq?
Ñawpaqtaqa sumaqta rimapayaspan kallpachananchis precursor hina servishanallankupaq (Pro. 25:11). Hinaspapas predicasqanchis horata cambiaspan paykunaq predicasqanku horapi mayqenninkuwanpas lloqsisunman. Yaqapaschá mayqen precursorwanpas predicaq rispa otaq estudiokunaman rispa paykunaq pasajenta pagapusunman (1 Cor. 13:5; Fili. 2:4). Chaymantapas mayninpin wasinchisman invitasunman imallatapas mikhurunapaq, chhaynapin qoykukuq sonqo kasqanchista, paykuna munakusqanchista ima rikuchisunman (1 Ped. 4:8, 9).
Jehová Diosqa Simin Qelqapin prometen Reinonta ñawpaqta maskhaqkunaman ima necesitasqankutapas qonanpaq (Sal. 37:25; Mat. 6:33). Chay prometesqanta hunt’ananpaqmi llaqtanwan otaq iñiqmasikunawan yanapachin (1 Juan 3:16-18). Ichaqa manan precursorkunaqa hukkunaq yanapanantachu suyanku. Mayninpiqa manapaschá iñiqmasinkuman willakunkupaschu ima necesitasqankumantapas. Chayraykun makilla kashananchis qhawarinanchistaqmi imakuna necesitasqankuta, chhaynapin ‘pisichikusqankupi yanapaykusun’ (2 Cor. 8:14, 15).
Ñawpa tiempopi Cencrea llaqtapi iñiq t’aqamanta Febe sutiyoq allin predicaq cristianan Roma llaqtata viajarqan. Chaymi Pablo chaypi iñiqmasikunata nirqan: “Allintapuni qhawarinaykichistan valekuykichis. Señorpa sutinpi payta chaskiykuychis iñiypi wawqe-panakuna imaynatachus ruwananta hina. Imata necesitaqtinpas yanapaykuychis”, nispa (Rom. 16:1, 2). Kay tiempopipas paykuna hinan precursor regular otaq precursor especial hina llank’aq iñiqmasinchiskunata yanapaykunanchis, chaypin rikuchisun paykuna munakusqanchista (Hech. 5:42).