Hunt’aq sonqo kasqankuqa yachaqakunapaq hinan
1 1937 watamanta pachan precursor especialkunaqa llank’ayta qallariranku. Paykunaqa karanku poqosqa wayqe-panakuna, predicanapaq allin-allin wakichisqa, maymanña kachasqapas kusisqa riranku. Chay p’unchaykunamanta unayña karun chaypas, precursor especialkunaq hunt’aq sonqo kasqankuqa yachaqakunapaq hinaraqmi (Heb. 6:12).
2 Ñanta kicharanku: Ñawpa precursor especialkunaqa apakachana tocadiscokunawanmi wasi punkukunapi predicaranku, chhaynapin ñanta kichariranku qhepaman aswan predicakunanpaq. Revisitata ruwanapaqpas tocadiscowan uyarichisqankumantan rimaranku. Qallariypiqa congregacionkunaq kasqan hatun llaqtakunapin chayta ruwaranku. Chaymantataq maypichus Reinomanta predicanapaq aswan llank’ana kasharan chayman kachasqa karanku. Pisilla interesakuqkunamanpas kutirankun, Bibliatapas estudiachirankun. Ancha kallpachakusqankuwanmi pachaqninpi congregacionkuna yapakuran. Arí, mana sayk’uspa predicasqankuwanmi congregacionkunaqa kunankamapas yapakushan (Isa. 60:22). Kunan p’unchaykamapas precursor especialkunaqa llak’ashallankun allin willakuykuna ‘kay pachantinpi runakunaman willasqa kananpaq’ (Col. 1:23).
3 Yachaqakunapaq hina kanku: Wakin precursor especialkunaqa askha watatañan llank’ashanku. Chay watakunapin kay cheqaq sonqo warmi qharikunaqa imaymana sasachakuykunapi tarikuspanku iñiyninkuta kallpacharanku (1 Ped. 1:6, 7). Paykunaqa qhapaq kayninkunatapas saqespa wak llaqtachakunaman astakuranku chaypi servinankupaq. Wakinninkuqa machu payañan kanku, imaymanamantan onqoshanku, otaq wak sasachakuykunapipas tarikushanku (2 Cor. 4:16, 17). Ichaqa ‘yuyaqña kashaspapas rurushankuraqmi’ (Sal. 92:14). Jehová Diosman hap’ipakuspanku saminchayninta chaskishanku (Sal. 34:8; Pro. 10:22).
4 Kay precursor especialkunaqa “allinmi” ninapaq hinapunin kanku. Sichus precursor especialkuna congregacionniykipi kan chayqa, paykunawan huñukuy hinan allin poqosqa iñiyninkuqa yanapasunki. Munakuyniykita paykunaman rikuchiy Reinopaq hunt’aq sonqo llank’asqankumanta. Mana saqespa llank’asqankumanta kallpachakuy. Hayk’an paykunaq iñiyninta qatikuqkunaqa chaskinqapunin Jehová Diospa saminchayninta, payqa cheqaq kaqta rimaqkunatan [“ruwaqkunatan”, NM] kusisqa qhawarin (Pro. 12:22).