Ancha valorniyoq kaqninchiskunata hukkunaman rakisun
1 Bibliapiqa imaymana ancha allin yachachikuykunan kashan (Sal. 12:6; 119:11, 14). Huk kutinmi Jesús imaymana rikch’anachiy simikunawan Diospa Reinonmanta runakunaman yachachiran, chay qhepamantaq qatikuqninkunata tapuran: “¿Chaykunata entiendenkichischu?” nispa. Hinan paykunaqa: “Arí, Señor”, niranku. Chaymantataq Jesusqa paykunata niran: “Chayraykun [...] yachachiq runaqa, hanaq pacha qhapaqsuyumanta allin yachachisqa kaspa, wasiyoq taytaman rikch’akun. Paymi kaqninkuna waqaychanamanta mosoq kaqkunatapas mawk’a kaqkunatapas horqomun”, nispa (Mat. 13:1-52).
2 ¿Imataq kanman mawk’a kaqninchiskunari? Chayqa kanman chayllaraq Bibliata estudiashaspa yachasqanchiskunan. ¿Mosoq kaqninchiskunari? Chayqa kanman estudiasqanchisman hina Bibliapi pakasqa yachaykunata aswan allinta yachasqanchismi (1 Cor. 2:7). Chaymanta kallanmantaq “allin yuyayniyoq hunt’aq kamachi[q]” yanapayninwan imaymana entiendesqanchiskuna (Mat. 24:45).
3 Chay kaqninchiskuna mawk’aña mosoqña kanman chaypas, chaykunaqa ancha valorniyoqmi ñoqanchispaqqa. Chayraykun kallpachakunanchis Bibliamanta allin yachachiq kananchispaq. Chay yachasqanchistataq hukkunaman allinta yachachinanchis.
4 ¿Imatan Jesús ruwaran? Jesusqa ancha allinpaqmi qhawariran Diospa yachachikuyninkunata, chaymi payqa hukkunaman willananpaqpas tukuy atisqanta ruwaran. Sayk’usqaña kashaspapas payqa qoshallaqpunin chay ancha valorniyoq kaqninkunata (Juan 4:6-14).
5 Diosmanta mana yachaqkunatan payqa khuyapayaran chaymi maymanpas rillaq chay allin yachachikuykunata chay runakunaman yachachinanpaq (Sal. 72:13). Arí, sonqomantapunin payqa khuyapayaran chay runakunata, “chaymi imaymanata paykunaman yachachiyta qallarirqan” (Mar. 6:34).
6 Jesús hinan kananchis: Sichus Jesús hina ancha allinpaq qhawarisunchis Diosmanta yachasqanchiskunata chayqa, pay hinan ñoqanchispas Bibliawanpuni willayta munasunchis chay yachasqanchiskunamanta (Pro. 2:1-5). Sayk’usqaña kashaspapas tukuy sonqowanmi chayta ruwasunchis (Mar. 6:34). Chhaynaqa ancha valorniyoq kaqninchiskunaqa askhataq kashan chayqa, tukuy atisqanchista ruwasun llapa runakunaman predicananchispaq.