Estudiantekunataqa allintan preparana mana pisipanankupaq
1 Bibliata estudiaspa “Diospaq hinapuni kawsayta [...] munaqkuna[tan]” Satanasqa astawan pisipachiyta munan (2 Tim. 3:12). Chaypaqqa yaqapaschá llank’aqmasinkunawan, escuelapi yachaqmasinkunawan, otaq wasimasinkunawan ima hark’achinman chhaynapi Bibliata manaña estudianankupaq. Satanasqa estudianteq familiankunawanpas hark’achinmanmi Bibliata mana estudianankupaq, chayqa aswan sasaraqmi kanman estudiantepaq (Mat. 10:21; Mar. 3:21)
2 Contrankupi hatarinankuqa willasqañan kasharan: Chayllaraq Bibliata estudiaqkunaqa yachanankun paykunaq contranpi askha hatarinankuta. Yachanallankutaqmi Jesuspa qatikuqninman tukuqkunaqa chhaynapipuni tarikunankuta (Juan 15:20). Wakin runakunaqa Jehová Diospa testigonkunamanta mana allinta yachasqankuraykun estudiantekunaq contranpi hatarinku. Imaraykuña chay runakuna hark’ayta munanku chaypas, estudiantekunaqa allintan yachananku Jesusta qatikuspa Diospa munasqanman hina kawsaspa ñak’ariyqa kusikunapaq kasqanta (Hech. 5:27-29, 40, 41). Chaymantapas yachanallankutaqmi Jehová Dios paykunawan kashasqanta (Sal. 27:10; Mar. 10:29, 30). Ima llakipiña tarikuspapas Diospa munasqanman hina kawsaspaqa Diospa ladonmantan kashanku, chaytapas yachanankun (Pro. 27:11).
3 Allintan yachananku Bibliapi yachachikuykunata: Estudiantekunamanqa allintan yachachina ima sasachakuyña kaqtinpas Bibliamanta astawan yachananku kasqanta. ¿Imarayku? Satanasyá imaymanakunawan hark’ashan estudiantekunaq sonqonpi Diospa yachachikuyninkuna mana saphichakunanpaq, chayraykun paykunaqa allin estudiaq kananku (Pro. 4:23; Luc. 8:13). Arí, yachashanallankun Diospa Simin Qelqapi cheqaq yachachikuykunata, chhaynapi allin iñiq kanankupaq (Sal. 1:2, 3; Col. 2:6, 7).
4 Manan pisipanankuchu: Ima pruebapipas tarikuqqa yachananmi aguantayta, chhaynapin tukuy imapas allinlla paypaq kapunqa (Luc. 21:16-19). Arí, estudiantekunaq aguantasqanqa manan paykunallapaqchu allin kanman hukkunatapas yanapanmanmi. Chaymantapas paykunaqa allintan yachanqaku llapa aguantaqkunata Jehová Dios imayna yanapasqanta cuidasqanta ima (Sant. 1:12).
5 Apóstol Pablon kusikuran Tesalónica llaqtapi cristianokuna allin iñiq kasqankumanta chaymi Diosta agradecekuran. Wakin chay cristianokunataqa Pablon yachachisqa Diosmanta (2 Tes. 1:3-5). Sichus estudiantenchiskunata allinta yanapasun sasachakuyninkunata atipanankupaq chayqa, ñoqanchispas Pablo hinan anchata kusikusun.