“Yugoyman k’umuykukuychis”
1 Kay pachapiqa imaymana mat’ipayaywanmi, llakipayaykunawanmi kawsanchis, Jesusmi ichaqa mink’awanchis yugonman k’umuykunanchispaq, chhayna mink’awasqanchista kasukuqtinchisqa cheqaq samarikuytan kawsayninchispaq tarinchis (Mat. 11:29, 30). Jesuspa yugonman k’umuykuspaqa kusikuywanmi Reinomanta allin willakuykunata willanchis, hinaspapas runakunata yanapanchis Jesuspa yugonman k’umuykunankupaq, chhaynapi paykunapas ñoqanchis hina kawsayninkupi samarikuyta tarinqaku (Mat. 24:14; 28:19, 20).
2 Predicayqa anchatapunin samarichiwanchis: Jesusqa mana nisharanchu q’epintawan q’epinanchista. Aswanqa nisharan llasa q’epinchista saqespa paypa q’epinta q’epirikunanchispaq, q’epinqa manan llasachu. Arí, Jesuspa q’epinta q’epiqtinchisqa manañan llakikuykunawan mat’ichikunchischu nitaq kay pacha runakuna hinapaschu mana suyakuyniyoq kanchis, manataqmi qhapaq kaykunata maskhaypipas afanakunchisñachu (Luc. 21:34; 1 Tim. 6:17). Imaymana ruwanayoqña kanchis chaypas Jehová Diospa munaynintapunin ñawpaqtaqa ruwananchis (Mat. 6:33). Allintapuni reparananchis imachus aswan allin kaq kasqanta, chhaynapin predicasqanchisqa mana sayk’uchiwasunchu aswanpas kallpachawasun (Fili. 1:10).
3 Runakunaqa imachus munakusqankumantan rimanku (Luc. 6:45). Cristianokunaqa Jehová Diosta munakunchis, Reinowan hamuq saminchaykunatawan. Chaymi “allin willakuykunata” predicayqa kallpachawanchis llakikuyninchiskunatapas qonqachiwanchis (Rom. 10:15). Imatapas astawan ruwaqtinchisqa aswan allintan ruwanchis astawantaq kusikunchispas. Chayrayku astawan predicasun chayqa, aswan kusikuytan tarisun. ¡Predicasqanchista uyariqtinkuqa astawanraqmi kusikunchis! (Hech. 15:3). Predicaspaqa ancha samarikuytapuni tarisunchis manaña runakuna uyariwasunchu hark’awasunña chaypas. Chaymi mana hayk’aqpas qonqananchischu predicasqanchista Jehová Dios allinpaq qhawarisqanta, hinaspapas mana uyarikuq runakunaqa uyarikunkumanmi qhepaman (Hech. 5:41; 1 Cor. 3:9).
4 Jesuspa mink’awasqanchista uyarikuspaqa kusikunchismi Jehová Diospa testigon hina paywan kuska llank’aspa (Isa. 43:10; Apo. 1:5). ¡Manan imapas chay llank’ay hinaqa kanmanchu!