Kusikuywan Jehová Diospa yachachikuyninta chaskisunchis

1. ¿Imaynatan Jehová Dios yachachin kamachinkunata?

¹ Jehová Diosqa ancha munakuywanmi kamachinkunata yachachin. Chaymi allin mikhusqa kashanchis, wakin runakunan ichaqa yarqaypi kashanku Jehová Diosta mana reqsisqankurayku (Isa. 65:13). Jehová Diosqa sapa watan yachachiwanchis kinsa p’unchaypi aparikuq huñunakuykunapi (chay huñunakuyqa kay watapi iskay p’unchay kanqa). ¿Ñachu allichakushanchisña “Diospa santo espiritunwan yanapachikusun” nisqa hatun huñunakuyman rinanchispaq? ¡Ancha sumaq yachachikuytan chaskisunchis!

2. ¿Imakunatan ruwananchis manaraq kinsa p’unchay huñunakuyninchis chayamushaqtin?

² Tiempowan allichakusun: “K’uchi runaq yuyaykusqankunaqa allinmankaman tukun.” (Pro. 21:5.) Chayrayku, sichus llapan p’unchaykuna huñunakuyman riyta munanki chayqa, ñawpaqmanta patronniykiwan rimanayki permisota mañakunaykipaq. ¿Yachankiñachu maypi qorpachakunaykita? Hinaspapas ñawpaqmantaña yuyaykunanchis chawpi p’unchaypi wayqe pananchiskunawan kuska mikhunanchispaq. Chaymantapas allichakunanchis manaraq huñunakuy qallarishaqtin chayananchispaq, chhaynapi tiempowan tiyanakunata tarinanchispaq, takiwan mañakuywan huñunakuyta qallarinanchispaqpas.

3. ¿Imaynatan p’achakunanchis hatun huñunakuyman rinapaq?

³ Hinaspapas allinta hap’iq p’achawan p’achakunanchis iman p’achakunata hinallataq p’achakunanchispas (1 Tim. 2:9, 10). Kinsa p’unchay huñunakuyninchisqa ancha allinpuni imayna kasqanchista rikuchinanchispaq. Chay huñunakuy ruwakusqan llaqtapi kananchiskama allin hap’iq p’achawan p’achakusunchis tarjetanchistapas qhasqonchispi apasunchis chayqa, sut’itan reparanqaku wakin runakunamanta hukniray kasqanchista ancha allinpaqtaq qhawariwasunchispas.

4. ¿Imakunan yanapawasun hatun huñunakuypi yachachikuyta tukuy yuyaywan uyarinanchispaq?

⁴ Makilla uyarisunchis: Kay huñunakuypiqa ancha allin yachachikuytapunin chaskisunchis, chaymi llapallanta uyarinanchis (Pro. 22:17, 18). Tukuy yuyaywan uyarinanchispaqqa leekusqan textokunata Biblianchispi maskhaspa leenanchis, qelqananchistaq uyarisqanchis yachachikuykunata. Tutantaq wayqe pananchiskunawan rimasunman allin yachachikuykuna qelqasqanchismanta. Hatun huñunakuykunapin kayta rikukushan: wakin wayna sipaskunan kuska tiyaspa paykuna pura rimayta qallarinku otaq celularninkumanta mensajekunata apachishanku. Wawayoqchus kanchis chayqa, paykunawan kuska tiyananchis yachachikuyta uyarinanchispaq, wawakunaqa manan wiñaymasinkuwan wakpi tiyanankuchu.

5. ¿Imaynatan astawan kusikusunman hatun huñunakuypi?

⁵ Wayqe pananchiskunawan kallpachanakusunchis: Amigonchiskunawan mikhuspaqa aswan sumaqtan mikhunchis (Pro. 15:17). Chhaynallatataqmi wayqe pananchiskunawan kuska kaspapas astawan kusikusunchis hatun huñunakuypi kasqanchismanta. Chayrayku manaraq huñunakuy qallarishaqtin otaq chawpi p’unchaypi, tardentapas mana reqsisqanchis wayqe pananchiskunaman asuykusunman astawan reqsinanchispaq kallpacharinakunanchispaqpas (Sal. 133:1). Huñunakuyta qallarinapaq wayqe willakamunqa tiyanaykichispi tiyaykuychis nispa chayqa, manaña wayqe pananchiskunawan rimananchischu aswanpas tiyananchispi tiyaykuspa suyakunanchis huñunakuy qallarinankama.

6. Willay, imaynata predicasunman hatun huñunakuyman risqanchis llaqtapi.

⁶ Listo kashay predicanaykipaq: Kinsa p’unchaymanta huñunakuyqa ancha allinpunin runakunaman predicanapaq. Wakin wayqe pananchiskunan huñunakuy tukuyta restauranteta rinku mikhuq, chaypin mikhunata haywaqkuna wayqe pananchiskunata tapunku qhasqonkupi apasqanku tarjetamanta. Chhaynapi parlata tupachinku cheqaq kaymantapas sumaqta predicanku. Chay predicasqanku runakunamantan hatun huñunakuyman hamuranku wakin discursokunata uyarinankupaq.

7. ¿Imaraykun rinanchis hamuq hatun huñunakuyman?

⁷ Hatun huñunakuykuna aparikunanpaqqa anchatan llank’anku. Chay huñunakuypi yachachikuyta chaskinanchispaqqa ancha munakuywanmi llank’anku, chhaynapin Jehová Dios kamachinkunaman ancha munakusqanta rikuchin. Chhaynaqa, ¡llapallanchis kallpachakusunchis rinanchispaq yachachikuykunata uyarinanchispaqpas! Chayta ruwaqtinchisqa ‘kusisqa sonqowan takisunchis’ (Isa. 65:14).

[4 paginapi recuadro]

Kinsa p’unchaya huñunakuypaq yuyarichiykuna

◼ Programapaq horario: Asambleaqa qallarinqa kinsantin p’unchay las 9.20 tutamanta. Punkukuna kichakunqa las 8.00 tutamanta. Takikunata uyariqtinchisqa, llapanchismi tiyaykunanchis huñunakuyninchis allinta qallarinanpaq. Ñawpaq kaq p’unchay iskay kaq p’unchaypas tukunqa las 4.55 tardenta, kinsa kaq p’unchaytaq las 4.00 tardenta.

◼ Carrokunaq sayanan: Carrokunaq sayanan manataq hatunchu chayqa, huk carrollapi askha rinkuman.

◼ Tiyanakuna waqaychanamanta: Ñoqanchiswan kuska carropi riqkunallapaqmi tiyanataqa waqaychana, otaq wasinchispi tiyaqkunallapaq. Chayta ruwaspaqa yuyarinanchismi kuraq, onqosqa wayqe pananchiskunata huñunakuyman chayllaraq hamuqkunatapas.

◼ Chawpi p’unchay mikhuna: Chawpi p’unchay samanapaqqa mikhunanchista apakunanchis hawapi rantinamantaqa. Manan hatunchu kanan mikhuna waqaychanaqa, nitaqmi vidriomanta imatapas apanachu, machana ukyanakunatapas. Apasunmanmi mikhunanchista tiyasqanchis pachanpi cabeqllata.

◼ Donacionkuna: Hatun huñunakuymanta agradecekusqanchista rikuchisunman teqsimuyuntinpi predicay llank’anapaq atisqanchisman hina donacionninchista qospa, Huñunakuna Wasipi otaq asambleapi.

◼ Accidentekuna, qonqayllamanta onqoruqtinkupas: Qonqayllamanta pipas onqoqtinqa acomodadormanmi willana, payñan Primeros Auxilios Departamentoman willanqa, paykunañan yanapanqaku imayna tarikusqanman hina.

◼ Pisi uyariqkunapaq: Wakin hatun huñunakuykunapi yachachikuykunaqa FM radiopi uyarikunqa. Chhayna kaqtinqa, huñunakuy qallariytan willakunqa. Pisi uyariqkunaqa audifonoyoq huch’uy radiota apakunanku.

◼ Grabadorakuna: Grabadorata apaspaqa manan hukkunata distraechinachu, nitaq localpa corrientenman, sonidopaq corrientenmanpas hap’ichinachu.

◼ Sírvase visitar hojachakuna: Hatun huñunakuy p’unchaykuna, predicasqanchis runakuna astawan yachayta munanku chayqa, Sírvase visitar (S-43) nisqa hojachapi qelqananchis sutinta, maypi tiyasqanta, hukkunatawan. Sapanka publicadormi hatun huñunakuyman rispa apanan huk otaq iskay hojachakunata. Chay hojachata hunt’aruspaqa congregacionninchispi secretariomanmi qonanchis (qhawariy 2005 wata febrero killamanta Reinopaq Servicionchispi 6 paginata).

◼ Qorpachana: Qorpachayta munaspaqa congregacionpa secretarionwan rimana, qorpachanapaq formulariotataq hunt’aspa qona. Huk llaqtapi hatun huñunakuyman rinaykipaq qorpachanata necesitanki chayqa, secretarioman willay, qorpachakunapaq formulariota hunt’aspataq qoy, payñan apachinqa. Ama hatun huñunakuy qayllaykamunantaraqchu suyay qorpachakunaykipaq formulariota hunt’anaykipaq, qorpachana departamentotan sasachakuyman churawaq (1 Cor. 14:40). Pipas wawakunantin qorpachasqa kaspaqa respetanankun qorpachaqpa wasinta, manan imantapas llaminankuchu, malogranankuchu, nitaq ch’inllaqa maymanpas haykunankuchu. Qorpachakuyqa hatun huñunakuy p’unchaykunallapaqmi. Manan allinchu kanman mayta rinapaqpas, ima ruwanapaqpas qorpachakusqayki wasipi askha p’unchay qhepakuyqa.

[Uranpi willakuy]