‘Yupinta qatikusun’

1. ¿Imatan ruwananchis allin predicaq kananchispaq?

¹ Jesusqa manaña riranchu judío runakunaq escuelanman chaypas, aswan allin yachachiqmi karan. Allin predicaq kananchispaqqa Jesuspa ‘yupinta qatikunanchis’, imayna predicasqanmanta yachasqanchisqa anchatapunin yanapawasun (1 Ped. 2:21).

2. ¿Iman yanapawasunman Cristo hina runakunata munakunapaq?

² Runakunata munakuran: Jesusqa runakunapi tukuy sonqowan interesakuran (Mar. 6:30-34). Askha runakunan ‘muchushanku’ chaymi allin willakuykunata uyarinanku (Rom. 8:22). Chay runakunaq imayna tarikusqanpin yuyaymanananchis hinaspapas manan qonqananchischu chay runakunapi Jehová Dios interesakusqanta, chaykunan kallpachawasun predicashanallanchispaq (2 Ped. 3:9). Chaymantapas, sichus chay runakuna reparanqaku paykunapi interesakusqanchista chayqa, tukuy sonqowanmi uyariwasunchis.

3. ¿Maykunapin Jesús predicaran?

³ Maypiña tarikuspapas predicashallaran: Jesusqa maypiña tarikuspapas willallaqpuni allin willakuykunata (Mat. 4:23; 9:9; Juan 4:7-10). Ñoqanchispas imataña ruwashaspapas predicashanallanchismi. Wakin wayqe pananchiskunaqa, llank’anankupi, escuelapi, viajashaqtinku, rantishaqtinku imataña ruwashaqtinkupas makilla kashanku predicanankupaq chaymi apallankupuni Bibliata huk qelqakunatapas.

4. ¿Imaynatan Reinomantapuni predicasunman?

⁴ Reinomantan astawanqa predicaran: Jesusqa Reinomanta allin willakuykunatan predicaran (Luc. 4:43). Runakunawan rimaspaqa manapaschá kaqratochu Reinomanta rimayta qallarisun, ichaqa allintan reparachinanchis chay Reino necesitasqankuta. Kay tukukuy qaylla p’unchaykunapi millay kawsaykuna kasqanmanta rimasunman chaypas, astawanqa Reinomanta “allin willakuykunata” willananchis (Rom. 10:15).

5. ¿Imatan ruwananchis Bibliawan allinta yachachinapaq?

⁵ Diospa Simin Qelqamantapuni yachachiran: Jesusqa Diospa Simin qelqaq nisqanman hinapuni yachachiran. Manan yuyayninman hinachu (Juan 7:16, 18). Jesusqa leellaqpuni Diospa Simin Qelqata chaymi Satanaspa wateqasqantapas atiparan (Mat. 4:1-4). Ñoqanchispas allin yachachiq kanapaqqa sapa p’unchaymi Bibliata leenanchis yachasqanchisman hinataq kawsananchispas (Rom. 2:21). Predicasqanchispiqa Bibliaq nisqanman hinapuni tapuykunata kutichinanchis atikuqtintaq Bibliata leechinanchis. Runakunaqa allintan reparananku Diospa nisqanman hina kutichisqanchista chaymi mana yuyaykusqanchisman hinachu kutichinanchis.

6. ¿Imaynatan Jesús yachachiran runakunaq sonqonman chayaqta hinapuni?

⁶ Runakunaq sonqonman chayaqta yachachiran: Umalliq sacerdotekunan fariseokunapiwan guardiakunata tapuranku: ¿Imaraykun Jesusta mana hap’imurankichischu? nispa, paykunataq kutichiranku: “¡Manan hayk’aqpas chay runa hinaqa pipas rimarqanchu!” nispa (Juan 7:46). Jesusqa manan yachachiyllachu yachachiran aswanpas runakunaq sonqonman chayaqta hinapuni yachachiran (Luc. 24:32). Payqa runakunaq reqsisqan rikch’anachiy simikunawanmi yachachiran (Mat. 13:34). Manan hayk’aqpas sasa entiendey rimaykunawanqa runakunata sayk’uchiranchu (Juan 16:12). Chaymantapas Jehová Diostan hatuncharan manan pay kikinchu hatunchakuran. Ñoqanchispas Jesús hina allin yachachiq kanapaqqa yachachisqanchista qhawarikunanchis (1 Tim. 4:16).

7. ¿Imarayku Jesús mana pisi kallpayaranchu predicaspa?

⁷ Predicashallaqpuni hark’aqtinkupas mana uyariqtinkupas: Jesustaqa askha runakunan mana uyarirankuchu milagrokunataña ruwaran chaypas (Luc. 10:13). Familianpas paymanta niranku: “Manan yuyayninpichu kashan”, nispa (Mar. 3:21). Chaywanpas, Jesusqa kallpachakushallaranmi. Payqa allinta yacharan predicasqanwan runakunata kacharichinanta, chaymi mana pisi kallpayaranchu (Juan 8:32). Ñoqanchispas Jehová Diospa yanapayninwanqa manan pisi kallpayasunchu (2 Cor. 4:1).

8, 9. ¿Imakunatan ruwananchis Jesús hina predicananchispaq?

⁸ Anchata kallpachakuran hunt’asqata predicananpaq: Jesusqa predicananrayku imachus kapuqnillanwan kawsaran (Mat. 8:20). Mana sayk’uspan predicaran mayninpiqa ch’isinkamaraq (Mar. 6:35, 36). Yacharanmi predicananpaq pisillaña tiempo kasqanta. Jesuspa yupinta qatikuyta munanchis chayqa tiemponchista t’aqananchis, anchata kallpachakunanchis, imachus kapuqnillanchiswan kawsananchis predicananchispaq ‘pisi tiempollaña kasqanta’ yachaspa (1 Cor. 7:29-31).

⁹ Qallariy siglopi cristianokunaqa allin predicaq karanku Jesusmanta yachasqankurayku (Hech. 4:13). Ñoqanchispas allin predicaqmi kasunchis aswan allin yachachiq Jesucristota qatikusunchis chayqa (2 Tim. 4:5).