¿Pitaq cheqaq Diosri?

1. ¿Imaraykun Diosta yupaychananchis?

Diosmi tukuy imaymanata kamarqan. Payqa tukuy tiempon kawsarqan, manataqmi hayk’aqpas wañunqachu (Salmo 90:2). Bibliapi tarikuq allin willakuykunaqa Diosmantan hamun (1 Timoteo 1:11). Paymi kawsayta qowanchis, chaymi payllata servinanchis yupaychananchispas.​—Leey Apocalipsis 4:11.

2. ¿Imaynan Dios?

Diosqa manan ñoqanchis hina aychayoq tulluyoqchu, payqa espiritun chaymi mana pipas rikurqanchu (Juan 1:18; 4:24). Ichaqa kamasqanta qhawarispan yachasunman imayna Dios kasqanta. Imaymana frutakunata t’ikakunata kamasqanmi rikuchin munakuwasqanchista, ancha yachayniyoq kasqantapas. Hanaq pachapas kay pachapas ancha hatun kasqanmi rikuchillantaq ancha atiyniyoq kasqanta.​—Leey Romanos 1:20.

Chaymantapas Bibliata leespan Diosta reqsisunman. Chaypin yachanchis imaynatan runakunata qhawarin, imakunan sonqonta kusichin, imakunan phiñachin, allin kaqta otaq mana allin kaqta ruwaqtinku imachus ruwasqantapas.​—Leey Salmo 103:7-10.

3. ¿Kanchu Diospa sutin?

Jesusmi nirqan: “Yayayku hanaq pachapi kaq, sutiyki yupaychasqa kachun”, nispa (Mateo 6:9). Askhaña Diospa titulonkuna chaypas, kanmi sutin, sapanka simipitaqmi huknirayta rimakun. Quechua simipiqa “Jehová” nikunmi, español simi Bibliakunapipas askha textokunapin sutin rikhurin.​—Leey Salmo 83:18.a

Askha runakunan t’ikrasqanku Bibliakunapi sutinpa rantinpi Señor otaq Dios nispalla churarqanku. Qallariypin ichaqa 7.000 kutita hina Bibliapi Diospa sutin rikhurirqan. Jesuspas Diosmanta yachachispaqa sutintawanmi yachachirqan.​—Leey Juan 17:26.

Qhaway ¿Sutiyoqchu Dios? nisqa videota

4. ¿Interesakunchu Dios ñoqanchispi?

Jehová Diosqa lliw runakunatan munakuwanchis, ichaqa ¿imaraykun hinallata qhawan sinchi ñak’ariykuna kasqanta? Wakin runakunan ninku: “Pruebaman churawananchisraykun ñak’arichiwanchis”, nispa. Chayqa manan cheqaqchu.​—Leey Santiago 1:13.

Diosmi akllakuy atiyta qowarqanchis, akllakusqanchisman hina kawsananchispaq. Munasqanman hina kawsayta akllakuymi aswan allinqa (Josué 24:15). Ichaqa askha runakunan mana allin kaqta akllakunku, chaymi imaymana ñak’ariykuna kan. Jehová Diosqa llakikunmi chay mana allin ruwaykunata rikuspa.​—Leey Génesis 6:5, 6.

Diosqa munakuwanchismi, kusisqa kawsananchistan munanpas. Chaymi pisi tiempollamanta, ñak’ariyta millay ruwaykunatawan tukuchinqa. Payqa manan yanqachu ñak’ariykuna kasqanta hinallata qhawashan. 8 willakuypin chaymanta astawan yachasun.​—Leey 2 Pedro 2:9; 3:7, 13.

5. ¿Imaynatan Diosman asuykusunman?

Jehová Diosqa munanmi mañakuypi payman asuykunanchista. Payqa sapankanchispin interesakun (Salmo 65:2; 145:18). Liston kashan huchanchismanta pampachawananchispaq. Kusikunmi munayninta ruwanapaq kallpachakuqtinchis, mayninpi manaña allintachu hunt’asunman chaypas. Arí, huchayoq runaña kanchis chaypas, atisunmanmi paypa amigon kayta.​—Leey Salmo 103:12-14; Santiago 4:8.

Diostaq kawsayta qowarqanchis chayqa, paytan astawanqa munakunanchis (Marcos 12:30). Dios munakusqanchista rikuchinapaqqa paymantan yachananchis kasukunanchistaqmi kamachikuyninkunata. Chayta ruwaspan payman astawan k’askakusun.​—Leey 1 Timoteo 2:4; 1 Juan 5:3.