Juñunakunanchis wasita allichanapaq

Colombia nacionmanta hermananchis Nicole nin: “¡Munaymi juñunakunayku wasiqa!”, nispa. ¿Imaraykun chayta pay nirqan? Paymi nillantaq: “Juñunakuna wasipiqa iñiqmasiykunawan kuska Jehová Diosta adorani”, nispa. ¿Nicole jinachu qanpas piensanki?

Pachantinpin Jehová Diospa testigonkunaqa juñukunchis 63.000 wasikunapi. Chaypin Jehová Diosta adoranchis. Colombia nacionmanta precursor regular hermanonchis Davidmi nin: “Juñunakunanchis wasipiqa Jehová Diostan yupaychanchis, chaymi chay wasikunaqa allin allichasqa limpio. Juñunakuyman invitasqanchis runakunapas chayta rikuspan admirakunku”, nispa. Llapa chaykunaqa juñunakunanchis wasikunata limpiota jap’isqanchisraykun. ¿Imaynatan chayta ruwakun?

¿Imaynatan organizakun juñunakunanchis wasikunata allichanapaq?

Sapanka iñiq t’aqan encargakun juñunakunanku wasita allichanankupaq. Chaymi juñunakuna wasitaqa sapa kutilla limpiakun, imapas allichana kaqtinpas allichanku.

Iñiq t’aqakunata yanapanankupaqmi Departamento Local de Diseño y Construcción (LDC) nisqapi llank’aq hermanokunan nombranku juj grupo hermanokunata juñunakuna wasikunata allichanankupaq capacitanankupaq ima. Chay hermanokunan atiendenku soqta otaq chunka juñunakuna wasikunata. Paykunan visitanku sapanka iñiq t’aqata, jinaspa capacitanku iñiqmasikunata, juñunakunanku wasita allinta cuidanankupaq. Sapa kinsa watamantan qhawarinku imachus allichana kashan chayta.

Capacitacionta chaskiq iñiqmasikunaqa kusisqan, agradecesqataqmi kashanku chay capacitacionta chaskisqankumanta. India nacionmanta Indhumathi hermananchismi nin: “Allintan capacitawarqanku. Kusisqan kashani juñunakuna wasita imayna cuiday yachasqaymanta”, nispa. Kenia nacionmanta Evans hermanonchismi nillantaq: “Imapas juñunakuna wasipi malograkuqtinqa kaqpachan chayta allichana kasqa, chayta ruwaspan mana nishutachu qolqeta gastakun”, nispa.

¿Ima qolqewanmi chaykuna allichakun?

Sapa wata juñunakuna wasita allichanapaqqa askha qolqen gastakun, mayninpiqa dolarespi imaraqmi.a Chay gastokunaqa ruwakun maypichus chay juñunakuna wasi kasqanman jinan, jayk’a tiempoñachus chay wasi kasqanman jinan, chaymantapas jayk’a iñiq t’aqachá chaypi juñukunku chayman jinan. ¿Ima qolqewanmi chayta ruwakun?

Chay gastokunaqa donación churasqanchis qolqewanmi ruwakun. Kazajistán nacionmanta Alexander hermanonchismi nin: “Wakin qolqewanmi internet-ta, unuta, luzta pagakun. Wakin qolqewantaq rantikun papelta, guanteskunata, limpianapaq cosaskunata, pintanapaq imaymana necesitakusqantapas”, nispa. Puchuq qolqetataq apachikun pachantinpi wakin juñunakuna wasikunata allichakunanpaq.

Wakin juñunakuna wasikunapin jatun llank’ay aparikun

Mayninpi juñunakuna wasita allichanapaqqa masmi qolqeqa necesitakun. Chay kaqtinqa Departamento Local de Diseño nisqapi llank’aq hermanokunamanmi chayta willakun, paykunan chay wasita qhawarinku imakunachá allichana kasqanta, allichana kaqtintaq llank’ayta qallarinku, chay gastokunapas ruwakun donacionkuna churasqanchiswanmi. 2023 watapin 8793 juñunakuna wasi allichakurqan chaypin gastakurqan 76,6 millón dolaresta. Iskaymanta yachasun.

Angola nacionpin 15 wataña juj juñunakuna wasi ruwasqa kasharqan, chaymi necesitakurqan allichanata. Luz cablekunan cambiana kasharqan, perqankunapas rajasqaña kasharqan, chaymantapas vecinokunan quejakusharqanku salonmanta unu wasinkuman jaykushasqanmanta. Chayta allichanapaqmi gastakurqan 9,285 dolaresta. Allichakusqanta rikuspan vecinokunaqa admirakurqanku agradecekurqanku ima.

Polonia nacionpin juj juñunakuna wasiq techon t’oqorakapusqa, alfombrapas thantarakapusqa. Chaymi allichakurqan techota, alfombratapas mosoqta rantikurqan chaypin gastakurqan 9,757 dolaresta. Unayta aguantananpaq jinan chaytaqa ruwakurqan.

Juñunakuna wasita allichaspaqa Jehová Diostan jatunchanchis

Juñunakuy wasikuna manaraq nishuta malograkushaqtin allichaspaqa manan nishutachu qolqeta gastakun, chaymantapas limpiota jap’ispaqa Jehová Diostan jatunchanchis. Tonga islapi tiyaq hermanonchis Shaun nin: “Juñunakuna wasikuna allichakusqanqa may allinpunin, chaywanqa Jehová Diostan yupaychanchis, sutintapas allinpaqmi qhawarichinchis. Gustowanmi runakunatapas invitamunchis”, nispa.

Qanpas atiwaqmi yanapakuytaqa

Llapanchismi atinchis juñunakuna wasita limpiaypi allichaypi yanapakuytaqa. Australia nacionmanta iñiqmasinchiskunata capacitaq hermanonchis Marinon nin: “Juñunakunanchis wasita cuidayqa allinpunin, llapanchismi chaypiqa yanapakusunman. Allinta cuidasun chayqa, manan nishu qolqetachu necesitasun allichakunanpaq, chhaynapin donación churasqanchis qolqeqa maypichus masta necesitakun chaypi gastakunqa”, nispa.

India nacionmanta juñunakuna wasi allichaypi yanapakuq Joel hermanonchismi nin: “Chaypi yanapakuspayqa piensani paraisopi imayna munayraqchá hermanokunawan llank’ay kanqa chaypi”, nispa. Qallariypi rimamusqanchis Nicole hermananchismi nillantaq: “Qaynakunallan bañopi unu sut’ushaqta allichakurqan, chay sut’usqantan ch’akichirqani chhaynapi ama pipas chaypi llusk’ananpaq”, nispa.

Juñunakuna wasi allichaypi yanapakuyta munanki chayqa iñiq t’aqaykipi umalliqkunawan rimay. Donación churasqayki qolqeqa manan juñunakunayki wasi allichanallapaqchu, aswanpas pachantinpi juñunakuna wasi allichanapaqmi. Chay donacionniykitaqa churawaq juñunakuna wasi cajachakunamanmi otaq churawaq internetpi donate.jw.org nisqaman. Qoykukuq kasqaykiqa may allinpunin.