WAYNA-SIPASKUNAN TAPUKUNKU
¿Imaynatan tentacionkunata atipayman?
Apóstol Pablon nirqan: “Kay kamachikuytan noqapi tarini: Allin kaqta ruwayta munashaqtiy noqapiña mana allin kaq kashasqanta”, nispa (Romanos 7:21). ¿Jayk’aqllapas apóstol Pablo jina tarikurqankichu? Chhayna kaqtinqa kaypi yachachikuykunan yanapasunki ama tentacionkunaman urmanaykipaq.
¿Imatan yachanayki?
Jujkuna mat’ipayawaqtinchismi mayninpiqa tentacionkunaman urmasunman. Bibliapas ninmi: “Mana allin runakunawan juñukuspaqa allin ruwaykunatan qonqapunkichis”, nispa (1 Corintios 15:33). Jujkunaq mat’ipayawasqanchismi otaq radiopi televisionpi uyarisqanchis sonqonchispi saphichakuspa mana allin ruwaykunaman tanqawasunman (Éxodo 23:2).
Jeremyn nin: “Jujkunawan amigontin kayta munaspan paykuna jina mana allin ruwaykunata qallarisunman”, nispa.
Kaypi piensay: Sichus jujkunaq qanmanta piensasqan llakichisunki chayqa faciltan tentacionkunaman urmawaq (Proverbios 29:25).
Chhaynaqa: Ama compañeroykikunaq mat’ipayasqanraykuqa allin ruwaykunata saqepuychu.
Kaykunata ruway
Imachus yachasqaykimanta ama iskayaychu. Sichus Diospa yachachisqasuykimanta iskayanki chayqa munasqankutan runakunaqa ruwasunkiku. Aswan allinqa Bibliaq kay nisqanta kasukuymi, chaypin nin: “Allinta t’aqwiychis tukuy imapas allinchus kashan icha manachus chayta, jinaspa imachus allin kaqtapuni ruwaychis”, nispa (1 Tesalonicenses 5:21). Diospa yachachisqanta sut’ita entiendeshanki chayqa, manan tentacionkunaman urmankichu.
Kaypi piensay: ¿Imaraykun Diospa kamachikuyninkunata kasukuy allinniykipaq?
Kimberlyn nin: “Diospa kamachikuyninkunata kasukuspa tentacionkunaman mana urmaqtiyqa jujkunan astawan respetawanku”, nispa.
Danielmanta yachay. Payqa waynachallaraq kashaspan yuyaykurqan Diospa kamachikuyninkunata kasukunanpaq (Daniel 1:8).
Allintan yachanayki imachus allin imachus mana allin chayta, chayta yachaymi yanapasunki tentacionkunaman ama urmanaykipaq.
Reparakuy imakunapis facilta urmawaq chayta. Biblian willan imakunatas wayna-sipaskuna munapayan chayta (2 Timoteo 2:22). Chay munapayaykunan kaykuna: warmi-qhari puñuy, jujkunawan amigontin kay, paykunallamanta imatapas ruwayta munasqanku ima.
Kaypi piensay: Biblian nin: “Sapankan pruebamanqa churakun imachus munasqanwan tentasqa kaspa sonqonta suwachikuspa”, nispa (Santiago 1:14). ¿Iman qanpa sonqoykita suwashan?
Sylvian nin: “Imachus juchaman tanqashasunki chayta reparakuy, chay juchaman mana urmanaykipaqtaq yanapaykunata maskhay jinaspa anotakuy. Chhaynapin juj kutipi tentasqa kaspa yachankiña ima ruwayta”, nispa.
Rey Davidmanta yachay. Bibliaq willasqanman jinaqa mayninpis payqa jujkunaq mat’ipayasqan imatapas ruwaq, mayninpitaq paypa munasqanman jina ruwaq. Ichaqa reparakurqanmi pantashasqanta, jinan kallpachakurqan allin kaqta ruwananpaq. Chaymi Jehová Diosmanta khaynata mañakurqan: “Diosnilláy, ama jinachu kay, ch’uya sonqota qoway, ch’uya yuyayta qoway, kasukuq sonqota qoway”, nispa (Salmos 51:10).
Ama munasqaykiwan atipachikuychu. Biblian nin: “Ama mana allin kaqwanqa atipachikuychu”, nispa (Romanos 12:21). Chaywanqa nishan juchata atipanaykitan. Qanqa atinkipunin allin kaq ruwayta.
Kaypi piensay: ¿Imatan ruwawaq juchaman tanqasqa kaspa allin kaqta ruwanaykipaq?
Sophian nin: “Noqaqa yuyaykunin juchaman urmaspa imapichus tarikunayta. Juchaman urmaspaqa yaqapaschá juj ratulla kusisqa kayman, chaymantan ichaqa sinchi llakipi tarikuyman. Chhaynapi tarikuytaqa manan munaymanchu”, nispa.
Apóstol Pablomanta yachay. Bibliaq nisqanman jinaqa payqa mana allin ruwaykunata ruwananpaqsi tanqasqa kasqa, ichaqa manas chaykunawan atipachikusqachu. Pay kikinmi nirqan: “Aswanmi cuerpoyta maqani jinaspa kamachita jina purichini”, nispa (1 Corintios 9:27).
Ama qonqaychu: Juchata atipayqa qanmantan kanqa.
Tentacionkunaqa juj ratullapaqmi. Melissa sutiyoq sipasmi willakun, payqa 20 watanpin kashan. Paymi nin: “Ñaupaqpi wakin tentacionkunataqa mana atipanaypaq jinan qhawariq kani, kunanmi ichaqa facilta chaykunata atipani”, nispa. Paymi nillantaq: “Chaymi reparachiwan ima tentacionpas juj tiempollapaq kasqanta, kay tiempopi mana atipanaypaq jina qhawarisqay tentacionkunaqa juj ratullapaqmi. Qhepakunamanqa maytachá kusikusaq chay tentacionkunaman mana urmasqaymantaqa”, nispa.