¿Willanchu Biblia purgatoriomanta?
¿Ima ninmi Biblia?
Bibliapiqa manan rijurinchu “purgatorio” simi, nitaq willanchu wañusqakunaq alman purgatoriopi ch’uyanchakunanmanta.a Biblia juchamanta wañuymantawan rimaspaqa purgatorio yachachikuy yanqa kasqantan rikuchin. Yachasun.
Runakunaqa Jesuspa yawar jich’asqanpi iñisqankuraykun juchamanta ch’uyanchasqa kanku, manan purgatorioman rispachu. Biblian nin Diospa ‘Churin Jesucristoq yawarnin tukuy juchamanta ch’uyanchawasqanchista’, jinallataq “juchanchiskunamanta yawarninwan kacharichiwaqninchis” kasqanta (1 Juan 1:7; Apocalipsis 1:5, Diospa Simin Qelqa, edición 2004 [DSQ]). Arí, Jesusmi ‘askha runa kacharichisqa kananrayku wañuran’ (Mateo 20:28).
Wañusqakunaqa manañan imatapas sientenkuchu. Biblian nin: “Kausashaqkunaqa yachankun wañukapunankuta, wañukapuqkunan ichaqa mana imatapas yachankuchu”, nispa (Eclesiastés 9:5, DSQ). Wañusqakunaqa manan imatapas sientenkuchu, chaymi mana ima nina rauraytapas sientenkuchu; nitaq ch’uyanchasqa kaytapas atinkumanchu.
Pipas wañupuspaqa manañan juchankunamanta castigota chaskinchu. Biblian nin: “Juchaq pagayninqa wañuymi”, nispa. Nillantaqmi: “Pipas wañunña chayqa, juchamanta kacharichisqañan”, nispa (Romanos 6:7, 23, DSQ). Juchamanta castigoqa wañuymi.
a Purgatoriomantan Orfeo: historia general de las religiones nisqa libro nin: “Evangeliokunapiqa manan purgatoriomanta rimanchu”, nispa. Chaymantapas juj enciclopedia nillantaq: “Católica religionpi purgatorio yachachikuyqa costumbreman jinan kashan, manan Diospa Simin nisqanman jinachu”, nispa (New Catholic Encyclopedia, segunda edición, volumen 11, página 825).
b Qhaway Enciclopedia de la Religión Católica (tomo VI, página 382).