¿Ima ruwananchistan Dios munan?

¿Ima ninmi Biblia?

Jehová Diosqa munan allinta payta reqsinanchista, amigonkuna kananchista, tukuy sonqowan servinanchista, munakunanchista iman (Mateo 22:37, 38; Santiago 4:8). Jesuspa imayna kausasqanta imayna yachachisqanta allinta estudiaspan yachasun imaynatas Jehová Diospa munayninta ruwasunman chayta. Chaymantapas Jesusqa manan rimallaranchu Diospa munayninmantaqa, aswanpas paypunin Diospa munayninman jina kausaran (Juan 7:16, 17). Chaymi Jesusqa niran: “Noqaqa janaq pachamanta uraykamurani manan munayniyta ruwaqchu, aswanpas kachamuwaqniypa munayninta ruwaqmi”, nispa (Juan 6:38).

¿Juj rijuriypichu, juj señalwanchu otaq pay kikin rimapayawaspanchischu Dios willawasun ima ruwananchistachus munan chayta?

Manan. Diosqa Bibliawanmi willawasun imatas noqanchismanta munan chayta. Bibliapitaqmi tarisunchis allin yachachikuykunata, chhaynapi ‘tukuy allin ruwaykunapaq allin-allin preparasqa kananchispaq’ (2 Timoteo 3:16, 17). Imatas Dios munan noqanchismanta chayta yachanapaqqa Bibliatan estudiananchis, chaypitaqmi yuyaymanananchis (Romanos 12:1, 2; Efesios 5:17).

¿Diospa munaynin ruwayta atisunmanchu?

Arí, atisunmanmi. Bibliapin nin: ‘Diospa kamachikuyninkunaqa manan sasa junt’aychu’ nispa. (1 Juan 5:3). Chaywanpas mayninpiqa sasan kanman Diosta kasukuyqa, chayraykun tukuy atisqanchista kallpachakunanchis kanqa. Ichaqa allinninchispaqpunin kanqa Diosta kasukuyqa. Chaymi Jesuspas niran: “Diospa siminta uyarispa waqaychaqkuna kusisqaqa kachunku”, nispa (Lucas 11:28).