¿Dios yanapawasunmanchu paymanta mañakuqtinchis?

¿Ima ninmi Biblia?

Arí, Diosqa tukuy sonqowan, munayninman jina mañakuqkunataqa yanapanmi. Bibliapin willashan Dios sonqo runakuna Diospa yanapayninta mañakusqankumanta. Paykunamanta yachaymi yanapawasun Diosmanta mañakunapaq, wakinmanta yachasun:

• “Yanapaykuway, Diosnilláy Señor Dios, munakuyniykiman jina qespichiway” (Salmos 109:26).

• “Noqaqa llakisqan kashani, wajchan kashani, Diosníy, ¡usqhamuy yanapaykuwanaykipaq!” (Salmos 70:5).

Chay versiculokunata qelqaqqa allin iñiyniyoqmi karan. Ichaqa, manaña chay jina iñiyniyoq kasunman chaypas, Diosqa uyariwasunmanmi allin sonqowan payta maskhaqtinchisqa. Biblian nin: “Señor Diosqa llakisqa sonqoyoqkunaq qayllanpin kashan, payqa llakiq ñit’isqan sonqoyoqkunatan qespichin”, nispa (Salmos 34:18).

Yaqapaschá mayninpiqa piensasunman Dios noqanchismanta karupi kashananpaq, jinaspa noqanchispi mana interesakunanpaq. Ichaqa Biblian nin: “Qanqa ancha jatunña kanki chaypas, k’umuykukuqtan yuyarikamunki, jatunchakuqtataq karullamantaraq reqsimunki”, nispa (Salmos 138:6). Jesuspas discipulonkunatan niran: “Qankunaqqa chujchaykichispas llapallanmi yupasqa kashan”, nispa (Mateo 10:30). Diospaqqa chujchanchispas yupasqan kashan, ¿chaychu mana uyariwasunman ima llakikuyninchistapas willakuqtinchis? (1 Pedro 5:7).