¿Imaynatan Jehová Diospa testigonkuna qhawarinku paykuna ukhumanta t’aqasqa kaqkunata?

Jehová Diospa testigonkunaqa tukuy atisqaykutan kallpachakuyku llapa runakunata munakunaykupaq respetanaykupaq ima. Mayqen Testigopas manaña juñunakuykunaman jamushanchu, manaña predicaqpas lloqsishanchu chayqa, kallpachakuykun paywan parlarinaykupaq.a Chaypin sut’ita rikuchiyku mayta munakusqaykuta; yanapaykutaqmi Jehová Diosman astawan qayllaykunanpaqpas (Lucas 15:4-7).

Mayninpiqa wakin Testigokunaqa jatun juchamanmi urmanku chaymi t’aqasqa kanku (1 Corintios 5:13). Ichaqa manan juchaparukuqtin jinachu pitapas t’aqakun. Hermanontintaq kayku chayqa, sapankatataq sonqomanta munakuyku chayqa, tukuy atisqaykutan ruwayku payta yanapanaykupaq. T’aqasqaña kanman chaypas, Bibliaq nisqanman jinan paytaqa munakushallayku respetashallayku (Marcos 12:31; 1 Pedro 2:17).

¿Imanaqtinmi juj Testigo t’aqasqa kanman?

Bibliapi nisqan jina, pipas jatun jucha ruwasqanmanta mana arrepientekunmanchu manataq cambiaytapas munanmanchu chayqa, t’aqasqan kanan Diospa llaqtanmantab (1 Corintios 5:11-13). Ichaqa, ¿ima juchan kanman chay jatun jucha? Bibliapi willasqanman jinaqa manan jujllachu. Chay juchakunamanta wakinmi: jujwan pantay, machay, runa wañuchiy, familiata sufrichiy, suwakuy ima (1 Corintios 6:9, 10; Gálatas 5:19-21; 1 Timoteo 1:9, 10).

Ichaqa, pipas chay juchakunamanta mayqentapas ruwanman chayqa, manan kaq ratuchu Diospa llaqtanmantaqa t’aqakun. Aswanmi ñaupaqtaqa umalliqkunac payta yanapanku chhaynapi juchanmanta arrepientekunanpaq (Romanos 2:4). Umalliqkunaqa munakuywan pacienciawan iman chaytaqa ruwanku (Gálatas 6:1). Cuentata qokuspa arrepientekunanpaq jinan munayta paytaqa rimapayanku (2 Timoteo 2:24-26). Ichaqa, may rimapayasqapas manapuni arrepientekunmanchu, manataq Bibliaq nisqantapas kasukunmanchu chayqa t’aqasqan payqa kapunqa Diospa llaqtanmanta. Pipas t’aqasqa kaqtinqa manan imatapas willakunchu juj iñiqkunamanqa, aswanmi juj juñunakuypi “payqa manañan Testigochu” nispalla willakamun.

¿Imaraykun juj juchallikuqta Diospa llaqtanmanta t’aqakun? Chayta ruwaspan Diospa simin respetakusqanta rikuchikun. Llapa iñiqkunata iman cuidakun chhaynapi paykunapas ama juchaman urmanankupaq (1 Corintios 5:6; 15:33; 1 Pedro 1:16). Chaymantapas chayta ruwaspan juchallikuqta yanapakun chhaynapi yuyayman kutispa juchanta saqepunanpaq, cambiananpaq ima (Hebreos 12:11).

¿Imaynatan Jehová Diospa testigonkuna qhawarinku t’aqasqa kaqkunata?

Chhayna t’aqasqa kaqkunamanta rimaspan Bibliapi nishan: “Ama chhayna runawanqa juñukuychischu, amapuni chhayna runawanqa mijuychispaschu”, nispa (1 Corintios 5:11). Chaymi paykunawanqa mana juñukuykuchu ni amigotapas ruwaykuchu. Ichaqa normaltan rimaykuyku, respetayku iman paykunataqa. Chaymantapas paykunaqa libren kashanku juñunakuykunaman jamunankupaqqa, chaypi hermanokunapas atinkumanmi paykunata napaykuytaqa.d Chaymantapas t’aqasqa kaqkunaqa atinkumanmi umalliqkunaq yanapaynin mañakuytapas.

¿Iman pasanman t’aqasqa runaq esposan wawankunapas Testigolla kaqtinku? Manaña kuskachu Diosta adoranku chaypas paykunaqa familian kanku, manan pipas chaytaqa t’aqanmanchu. Kuskataq tiyanku chayqa kaqllan paykunaqa warmi-qhari vidankuta apanku, kaqllan kallpachakunku wawankuta sumaqta uywanankupaqpas.

T’aqasqa kaqkunaqa atinkumanmi umalliqkunaq yanapaynin mañakuytaqa. Umalliqkunaqa visitaspaqa munakuywanmi yanapanku, Bibliawanmi yuyayta qonku chhaynapi juchankumanta arrepientekunankupaq, Diosman kutimpunankupaq ima (Zacarías 1:3). Paykunamanta mayqenpas mana allin ruwasqanta saqepunqa, Diospa simintapas kasukunqa chayqa, atinmanmi Diospa llaqtanman kutimpuyta. Kutimpuq runataqa munaytan sumaqtan iñiqkunaqa chaskinku, kallpachanku iman. Imaynan Corinto llaqtapi iñiqkunapas ruwarqanku chhaynatan ruwanku (2 Corintios 2:6-8).

¿Imaninkun Diospa llaqtanman wakin kutimpuqkuna?

Jehová Diospa testigonkunamanta wakinmi t’aqasqa karqanku, ichaqa jujmantan kutimpurqanku. ¿Imaninkun paykuna?

Estados Unidosmanta María nin: “Diospa llaqtanman kutimpunaypaq piensashaspan nirqani: Umalliqkunaqa t’aqasqa kasqay tiempopi imakunatachus ruwarqani chaykuna willakunaytachá munanqaku, nispa. Ichaqa manan chhaynachu karqan, aswanpas paykunaqa munakuywanmi niwarqanku: Ñaupaqllaman riy, atillankin, nispa. Chay niwasqankuta uyarispan thaj karqani”, nispa.

Sierra Leonamanta Malcom nin: “Hermanokunaqa maytan munashasqaku kutimpunayta, imaymanapin rikuchiwarqanku munakuwasqankutapas. Chaymantapas paykunaqa sut’itan rikuchiwarqanku imaynas Jehová Diospas paykunapas perdonapuwarqanku chayta. Kallpachawarqankun ñaupaqllaman rinaypaqpas. Umalliqkunapas munaytan yanapawarqanku, mana sayk’uspan yanapawarqanku Jehová Dioswan allinpi kanaypaqpas. Chaypin repararqani Jehová Dios munakuwasqanta anchata valorawasqanta ima”, nispa.

Estados Unidosmanta Sandi nin: “Jehová Diosqa anchatan munakun llaqtanta, llaqtan limpio kanantataqmi munanpas. Wakinqa manapaschá allinpaqchu qhawarisunman llaqtan limpio kananpaq Diospa imachus ruwasqanta, ichaqa chayta ruwaspan payqa rikuchin may munakuq kasqanta. Chayta yachayqa maytan kusichiwan. ¡May agradecesqan kashani Jehová Dios munakuq perdonakuq kasqanmanta!”, nispa.