¿Kashanmanchu kay pachapi allinta kamachiq gobierno? | ¿Imatapas Biblia willashanmanchu chaymanta?

Kay pachapi gobiernokunaqa imaymana sasachakuykunapin tarikushanku. Allinpaq qhawarikuq gobiernokunapipas askha ch’aqwaykunan kashan, runakunan paykuna contra sayarishanku, elección ruwasqankutapas manan valechipushankuchu.

Bibliapin ichaqa willashan allin tajyachisqa gobiernomanta. Yaqapaschá chay gobiernomanta uyarirqanki. Chay gobiernomantan señorninchis Jesucristo padrenuestro nisqa oracionpi willarqan.

• “Qankunaqa khaynatan mañakunkichis: Taytayku janaq pachapi kaq, sutiyki ch’uyapaq jap’isqa kachun. Gobiernoyki jamuchun. Munayniyki kay pachapi ruwakuchun imaynan janaq pachapipas ruwakun jinata” (Mateo 6:9, 10).

¿Imatan Bibliapi willashan chay gobiernomanta?

Chay gobiernoqa allin tajyachisqan kashan

Chay gobiernoqa janaq pachamantan kamachimunqa.

• Jesuspas nirqanmi: “Janaq pacha gobierno”, nispa (Mateo 4:17; 5:3, 10, 19, 20). Chaymi juj kutipi nirqan: “Gobiernoyqa manan kay pachamantachu”, nispa (Juan 18:36).

Chay gobiernon kay pachapi gobiernokunaq rantinpi kamachikamunqa.

• Bibliapin nishan: “Chay gobiernon llapa gobiernokunata ñut’uspa chinkachipunqa, jinaspa chay gobiernollaña wiñaypaq kapunqa”, nispa (Daniel 2:44).

Chay gobiernopiqa Jesusmi kamachinqa, manataqmi jayk’aqpas chinkachisqachu kanqa.

• Bibliapin nishan: “Paypa kamachikuyninqa wiñaypaqmi kanqa, gobiernonpas manan jayk’aqpas chinkachisqachu kanqa”, nispa (Daniel 7:13, 14).

Chay gobiernon pachantinman thaj kausayta, sumaq kausayta apamunqa.

• Bibliapin nishan: “Sapankankun uvas sach’anku k’uchupi, higos sach’anku k’uchupi tiyaykunqaku,manan pipas paykunataqa manchachinqachu”, nispa (Miqueas 4:4).

Chay gobiernomanta astawan yachay

Kay pachapi kashaspan Jesusqa “Diospa gobiernonmanta allin willakuykunata willaspa” purirqan (Mateo 9:35). Chaymantapas willarqanña kay pasananta:

• “Diospa gobiernonmanta allin willakuykunan pachantinpi willasqa kanqa llapa nacionkuna yachananpaq, jinan tukukuyqa chayamunqa” (Mateo 24:14).

Kay tiempopin Diospa gobiernonmanta willakushan 240 nacionkunapi territoriokunapi ima. ¿Ima bendicionkunatan apamunqa Diospa gobiernon? ¿Imatan ruwananchis chay gobiernoq bendicionninkunata chaskinanchispaq? Kallpachaykiku chaykunamanta yachanaykipaq.

Qhaway ¿Iman Diospa gobiernon? videota