¿Maytaña runa kallpachakunman chaypas atinmanchu thaj kayta apamuyta?

Kay pachapi guerrakuna ch’aqwaykuna kasqanwanmi runakunaqa imaymana sasachakuykunapi tarikushanku. Chaymi Naciones Unidas juj organizacionkunapas kallpachakushanku amaña guerrakuna kananpaq.a Paykunaqa guerrakunaq kasqan llaqtakunapin thaj kay kananta munanku. Naciones Unidas organizacionmanta secretario António Guterres nin: “Noqaykuqa tukuy sonqomanta munayku kay pachapi thaj kay kananta, chaypaqmi comprometesqa kashayku”, nispa.

Thaj kayta maskhaq organizacionkunaqa askha watakunañan guerrakunaq kasqan llaqtakunaman yanapaytan apashanku, askha runakunatan yanaparqanku llaqtankuman kutipunankupaq, wasinkutapas jujmantan sayarichirqanku. Ichaqa mayninpiqa manan atinkuchu llapan runakunata yanapayta, mayninpiqa jark’asqa iman tarikunku. ¿Jayk’ajllapas atisunmanpunichu kay pachapi thajpi kausayta? ¿Imatapas Biblia willashanmanchu chaymanta?

Thaj kay kananpaq sasachakuykuna, imachus Bibliaq nisqanpiwan

Sasachakuy: Manan llapanchu chaypaq yanapakunku. Manan facilchu acuerdoman jaykuy guerrapi kaqkunawan llaqtapi runakunawanpas, astawanqa juj nacionmanta kasqankuraykun. Sapanka grupomantapas jujniraytan piensanku, mayninpiqa interesnillankutan maskhanku.

Bibliaq nisqan: “Janaq pacha Diosqa juj gobiernotan sayarichinqa, [...]. Chay gobiernon llapa gobiernokunata [...] chinkachipunqa, jinaspa chay gobiernollaña wiñaypaq kapunqa” (Daniel 2:44).

Pisi tiempollamantan Diosqa kay pachapi llapa guerrakunata tukuchinqa jinaspa thaj kayta apamunqa (Salmos 46:8, 9). Kay pachapi llapa gobiernokunatan chinkachinqa, janaq pachamantataqmi pachantinta kamachikamunqa. Chay gobiernopiqa thajpin kausasunchis, manañan necesitasunchu thaj kayta maskhaq organizacionkunatapas.

Sasachakuy: Pisin yanapanankupaq qolqepas yanapaykunapas. Thaj kayta maskhaq organizacionkunapiqa pisillan llank’aqkunaqa kanku, qolqe chaskisqankupas, apoyo chaskisqankupas manan chaypaq jinachu. Chaymantapas wakin chayasqanku llaqtakunapiqa imaymana peligrokunapin tarikunku.

Bibliaq nisqan: “Jesucristotan [...] janaq pachapi paypa paña ladonpi tiyaykachispan. Payta churarqan [...] tukuy imamantapas aswan atiyniyoq kananpaq” (Efesios 1:17, 20, 21).

Tukuy atiyniyoq Jehováb Diosmi, tukuy imaymanata Señorninchis Jesucristoman qorqan gobiernonpi kamachikunanpaq (Daniel 7:13, 14 c). Qorqanmi atiyta, yachayta, allin reparaq kayta ima, manan runakunaqqa chayqa kanchu (Isaías 11:2). Jesuswanmi kashallankutaq mana yupay atiy ejército angelkuna (Apocalipsis 19:14). Manan ima ruwaypas mana atikuqqa paypaqqa kanchu.

Jesusqa manan guerrakunallatachu ch’aqwaykunallatachu kay pachamantaqa chinkachinqa. Thaj kausaytan apamunqa, manañan runakunaqa Diospa gobiernonpiqa imamantapas llakikunqakuñachu, ni imamantapas manchakunqakuñachu (Isaías 32:17, 18).

Sasachakuy: Jujniray leykuna kasqanrayku. Mayninpi thaj kay kananpaq organizacionpi llank’aqkunaqa jark’asqan tarikunku sapanka nacionkunapas jujniray leyniyoq kasqankurayku. Mayninpiqa chay leykunan chay organizacionkunata jark’an runakunata yanapanankupaq, thaj kay kananpaqpas.

Bibliaq nisqan: Jesusmi nirqan: “Diosmi tukuy atiyta qowan janaq pachapipas kay pachapipas”, nispa (Mateo 28:18).

Diosmi wawan Jesusman atiyta qorqan kay pachaman thaj kayta apamunanpaq (Juan 5:22). Jesusqa chanintan kamachikamunqa manan payqa pimanpas sayapakunqachu (Isaías 11:3-5). Biblian paymanta nin: “Thaj Kaywan Kamachikuq”, nispa. Gobiernonpiqa allin kaqta, chanin kaqtan ruwanqa (Isaías 9:6, 7).

Diospa gobiernonqa cheqaq thaj kaytan apamunqa

Thaj kayta maskhaq organizacionkunaqa yaqapaschá atinkuman juj chhikan thaj kayta wakin llaqtakunapi apamuyta. Ichaqa manan cheqninakuytaqa runaq sonqonmantaqa chinkachiyta atinkumanchu.

“Manan thaj kayta aypaytaqa atisunmanchu, sasan chayqa” (Dennis Jett, Estados Unidosmanta ex embajador).

Diospa gobiernon ichaqa thaj kayta apamunqa, runakunatan yanapanqa sonqonku ukhumanta cheqninakuyta orqonankupaq. Chaytan Jesús kay jallp’api kashaspa yachachirqan, qatikuqninkunatan yachachirqan runamasinkuwan thajpi munanakuspa kausanankupaq:

“Kusisqan kanku thaj kausay kananpaq allipunachiqkunaqa” (Mateo 5:9).

“Runamasiykitan munakunki qan kikiykita jina” (Marcos 12:29-31).

“Espadaykita waqaychay churananman, pipas espadata jujpa contranpi oqariqqa espadallawantaqmi wañuchisqa kanqa” (Mateo 26:52).

“K’amishaqtinkupas manan k’amipakurqanchu, ñak’arichishaqtinkupas manan pitapas amenazarqanchu” (1 Pedro 2:23).

Chaymantapas Jesusqa nirqanmi gobiernonpi kausaq runakunaqa jujkuna-jujkunawan munanakunankuta. Bibliaqa sutitan willan Diospa gobiernonpiqa cheqnikuq runakunaqa chinkachisqa kananta:

“Qankunapura munanakusqaykichispin lliupas yachanqaku discipuloykuna kasqaykichista” (Juan 13:34, 35).

“Pipas wayqenta cheqnikuqqa runa wañuchiqmi” (1 Juan 3:15).

“Pipas [Diosta] munakuqqa munakunallantaqmi wayqentapas” (1 Juan 4:20, 21).

Jehová Diosqa runakunatataq kamarqan chayqa, payqa allintan yachan imaynatas thajpi kausasunman chayta. Mana runaq atisqan thaj kausaytan gobiernonwan kay pachaman apamunqa.

a Naciones Unidas organizacionpas juj organizacionkunapas thaj kayta rimaspaqa kaykunawanmi sutichallankutaq: “consolidación de la paz”, “establecimiento de la paz”, “apoyo a la paz”, “operaciones de paz” nispa.

b Diospa sutinmi Jehová (Salmos 83:18). Chaymanta astawan yachanaykipaq leey “¿Pitaq Jehová Diosri?” nisqa yachachikuyta.

c Daniel 7:13, 14 textopi “runaq churin” nispaqa Jesusmantan rimashan (Mateo 25:31; 26:63, 64).