Mundialpi fútbol pujllasqanku ¿jujllachanmanpunichu runakunata? | ¿Imatapas Biblia willashanmanchu chaymanta?

5.000 millones runakunas qhawankuman Copa Mundial de la FIFA nisqataqa, chayqa aparikushan 20 de noviembre p’unchaymanta 18 de diciembre p’unchaykaman kay 2022 watapi. Askha runakunan piensanku chay jina pujllaykunaqa runakunata jujllachananpaq.

• Sudáfrica nacionmanta expresidente Nelson Mandela nin: “Pujllaykunaqa pachantinpi runakunatan tukuy imapi cambian, mayninpiqa mana atiy ruwaykunatan ruwachin, chaymantapas runakunatan jujllachan”, nispa.

• Presidente de la FIFA Gianni Infantino nin: “Futbolqa [...] suyakuypin jujllachawanchis; chaymantapas kusikuypi, munakuypi, jujkunapi iman jujllachawanchis”, nispa.a

Mundialpi fútbol pujllay juj pujllaykunapas ¿jujllachanmanpunichu runakunata? ¿Atikunmanchu thaj kaypi juj nisqalla kausayta?

¿Jujllachanmanpunichu runakunata?

Kay wata mundialpiqa manan futbol-llamantachu rimakushan. Runakunapas politicokunapas runakunaq derechonmanta, maymanta otaq imayna colorniyoq kasqankumanta, wakillan askha qolqeyoq kasqankumanta iman imaymanata rimashanku.

Chhaynaña kaqtinpas, askha runakunan ninku: “Mundialpi fútbol jina pujllaykunaqa runakunatan kusirichin”, nispa. Ichaqa, maytaña runakuna munanku chay jina pujllaykuna runakunata jujllachananta chaypas, manan unaypaqchu jujllachan. Aswanpas runakunaq imayna piensasqankuta imaynachus kasqankuta iman sut’iman orqon. Bibliaqa ñan willarqanña “tukukuy p’unchaykunapi” runakuna chhayna kanankuta (2 Timoteo 3:1-5).

¿Iman cheqaqtapuni pachantinpi runakunata jujllachanqa?

Biblian willawanchis runakuna jujllachasqa kausananchista. Prometewanchismi pachantinpi runakuna jujllachasqa kananchista, chayqa “Diospa gobiernon” janaq pachamanta kamachikamuqtinmi kanqa (Lucas 4:43; Mateo 6:10).

Chay Gobiernopi Reyqa Jesucriston, paymi kay pachantinman thaj kayta apamunqa. Biblian nin:

• “T’ika jinan chanin runaqa t’ikarinqa. Thaj kayqa kashallanqan”, nispa (Salmos 72:7).

• “Paymi yanapay mañakuq wajchakunata libranqa [...]. Pisichasqa kasqankumantan, sarunchasqa kasqankumantan orqonqa”, nispa (Salmos 72:12, 14).

Kunan tiempopas Jesuspa yachachisqanqa millonninpi runakunatañan jujllachashan, 239 nacionkunapi juj llaqtakunapiwan; chay yachachikuykunan yanaparqan amaña cheqninakunankupaq. Chaymanta astawan yachanaykipaq leey “Cheqninakuyta chinkachisun” nisqa yachachikuykunata.