Político runakunan rimashanku Armagedón nisqamanta | ¿Imatapas Biblia willashanmanchu chaymanta?

Kay 2022 watapin, lunes 10 p’unchay octubre killa tutamantanta Rusia soldadokuna Ucrania nacionpi wakin llaqtakunaman bombakunata kachaykunku. Chay p’unchay ñaupaqllatan Rusiamanta Crimea llaqtaman chimpaq chakata wakin parteta phatachillasqakutaq, chayraykus Rusia soldadokunaqa Ucrania nacionman bombakunata kachaykunkuman karqan. Chaykuna ñaupaqllatan wakin político runakunaqa rimasharqanku “Armagedón guerramansuna jaykusun” nispa.

• 2022 wata 6 octubrepin Estados Unidospi presidente Joe Biden nirqan: “[Estados Unidos presidente] Kennediq tiempomantapachan, Cuba nacionpi bombakuna kasqanmantapacha mana rimakusharqanchu Armagedonmanta, chay tiempomantaqa astawanraqsuna kunanqa chayqa yapakushan. [...] Pipas bomba nuclear nisqata kacharinqa chayqa manasuna jinaqa kasunamanchu, Armagendonpipunisuna chayqa tukunqa”, nispa.

• 2022 wata 8 octubrepin BBC News nisqapi, Ucraniamanta presidente Volodímir Zelenski, bomba nuclear nisqamanta rimashaspa nillarqantaq: “Kayqa Armagedonpunin, llapa kay pachapaqmi chayqa jatun peligro kashan” nispa.

¿Cheqaqtapunichu bomba nuclear nisqata pipas kachariqtin Armagedón guerraman apawasunman? ¿Imanishanmanmi Biblia chaykunamanta?

¿Bomba nuclear nisqachu Armagedón guerraman apawasun?

Manan. Chay Armagedón nisqa simiqa ch’ulla kutillatan Bibliapi rijurin, chayqa Apocalipsis 16:16 textopin kashan. Bibliapi chaymanta rimaspaqa manan kay pacha nacionkunaq guerra ruwanankumantachu rimashan, aswanmi rimashan Dioswan kay “jallp’a pachapi llapa reykunawan” guerra ruwanankumanta (Apocalipsis 16:14). Chay Armagedón guerrapin Diosqa kay pachapi llapa gobiernokunata ch’usaqman tukuchipunqa (Daniel 2:44).

Armagedón guerra kaqtin imachus kay pachapi pasanqa chayta yachanaykipaq leey “¿Iman Armagedón?” nisqata.

¿Chinkachinqachu bomba nuclear nisqa kay pachata chaypi tiyaqkunatapas?

Manan. Yaqapaschá kay pacha gobiernokunaqa chay bombata kacharinqaku, ichaqa manan Diosqa jinallatachu qhawanqa kay pachata chinkachinankutaqa. Bibliapin nin:

• “Kay pachaqa kaqllan wiñay-wiñaypaq kashan”, nispa (Eclesiastés 1:4).

• “Chanin runakunan kay jallp’ataqa jap’ikapunqaku, paykunan wiñaypaq chaypi tiyanqaku”, nispa (Salmos 37:29).

Ichaqa, llapa chaykunaq pasasqan Bibliapi willasqan profeciakunaq junt’akusqan iman rikuchin imaynas tukukuy tiempopiña kashanchis chayta (Mateo 24:3-7; 2 Timoteo 3:1-5). Astawan chaykunamanta yachayta munanki chayqa, imaynas jamuq tiempoman kausay kanqa chaytapas yachayta munanki chayqa noqaykuwan Bibliata estudiay, chaypin allinta yachanki chaykunamanta.