¿Imaraykun llapanchispas Diosta maskhanchis? ¿Juj religionpipunichu kananchis Diosmanta yachananchispaq?
¿Imaninmi Biblia?
Bibliapipunin rimashan runakunaqa Diospa munayninta ruwananpaq kamasqa kasqanchista, pay jina piensaq kananchispaq kamasqa kasqanchistapas. Chaymi Diospi iñiq runaqa kallpachakun Diospa kamachikuyninkunata kasukunanpaq, Diospa espiritunwan pusachikunanpaqpasa (Romanos 8:5; Efesios 5:1).
Bibliapin willashan imaynas espirituwan mana pusachikuyta munaq runa chayta. Chaymi nin: “Aychaq munayninman jina kausaq runaqa manan chaskikunchu Diospa espiritunmanta kaqkunataqa”, nispa. Chaypiqa rimashan Diospa yachachikuyninkunata mana chaskikuyta munasqanmantan (1 Corintios 2:14-16). Chhaynaqa Diospa espiritunwan mana pusachikuyta munaq runakunaqa manan qoykukuqchu kanku, manan jujkunawanpas thajpichu kausanku, aswanpas paykunaqa “envidianakuspa phiñachinakuspan” kausanku (1 Corintios 3:1-3). Chaymantapas Bibliaqa willashanmi yanqamanta tumpaspa amigokunata t’aqanachiq runamanta, paykunaqa “animalkuna jinan imatapas ruwanku, manataqmi Diospa espiritunpas paykunapi kanchu” (Judas 19; Proverbios 16:28).b
Chaykunamantan kaypi yachasunchis:
¿Imaraykun runakuna Diosta maskhanku?
Diosqa imaynachus pay kasqanman jinan runataqa kamarqan (Génesis 1:27). Chaymi yaqa llapa runakuna Diosmanta yachayta munanku.
Llapanchismi atinchis Jehovác Dios jina kayta, payqa khuyapayakuq Diosmi, thaj kausaytan maskhan, manan pimanpas sayapakunchu (Santiago 3:17). Chaymantapas Diosqa payta kasukuy munaq runakunatan santo espiritunwan yanapan payman asuykunankupaq (Hechos 5:32).
¿Imaraykun Diosmanta yachananchis?
Diosmanta yachasunchis chayqa thajmi kusisqan kausasunchis (Romanos 8:6). Chaykunaqa Diospa jatun regalonmi.
Kausay: Diosmi payman asuykuqkunaman wiñay kausayta qonqa (Juan 17:3; Gálatas 6:8).
Thaj kay: Thaj kay nispaqa nishan Dioswan thajpi kaytan. Munaynillankuta ruwaq runakunaqa Diospa enemigonmi kapunku (Romanos 8:7). Diosmi ichaqa kasukuqkunaman qonqa “runaq mana entiendey atisqan thaj kayta” (Filipenses 4:6, 7). Chay thaj kaymi runakunata yanapan kusisqa kausanankupaq (Mateo 5:3).
¿Imaynatan Diosman asuykusunman?
Diosmanta yachaspa payta kasukuy. Diostaqa reqsisunchis Bibliata leespan, chaypin kashan Diospa yachachikuyninkuna. Bibliataqa runakunan “santo espirituq kallpachasqan” qelqarqanku (2 Pedro 1:21). Chaypi yachasqaykin yanapasunki “espirituwan cheqaq kaywan ima” Diosta yupaychanaykipaq, chhaynapin Diospa espiritunwan pusachikunki, Diospa munayninman jinataqmi kausankipas (Juan 4:24).
Diospa yanapayninta mañakuy (Lucas 11:13). Diosmi yanapasunki munayninman jina allinta imatapas ruwanaykipaq (Gálatas 5:22, 23). Paymi yanapasunki ima sasachakuytapas allin yuyaywan allichanaykipaq (Santiago 1:5).
Dios sonqo runakunawan juñukuy. Paykunan yanapasunki Diosman astawan asuykunaykipaq (Romanos 1:11, 12). Sichus Diosta mana serviq runakunawan juñukuwaq chayqa Diosmantan karunchakuwaq (Santiago 4:4).
¿Juj religionpipunichu kananchis Diosman asuykunanchispaq?
Manan juj religionpi kasqaykiraykuchu Diospa amigonña kapunki, aswanpas Bibliaq nisqanman jinan kausanayki. Bibliapin nishan: “Pipas Diosta adoraqmi kani nishaspa qallunta mana watanmanchu chayqa, pay kikintan engañakushanman, yanqapaqtaqmi Diostapas adorashanman”, nispa (Santiago 1:26).
Diosman asuykunanchispaqqa paypa munasqanman jinan yupaychananchis, Bibliaq nisqantan kasukunanchis. Biblian nin: “Iñiq t’aqapas jujllan”, nispa. Chaypiqa rimashan juj nisqalla Diosta serviymantan. Chaymantapas Biblian nishallantaq: “Espiritupas jujllan”, nispa. Chaypiqa rimashan Diospa santo espiritunmantan. Diospa santo espiritunmi yanapawanchis juj nisqalla payta yupaychananchispaq (Efesios 4:1-4).
Wakin runakunaq mana allin yuyaykusqan
Wakin runakunan ninku: “Noqaqa kusisqan kashani imaynachus kausasqaywan, ima ruwasqaypas manan pitapas imananpaschu, chhaynaqa allin runa kanaypaqqa manan Diosmantaraqchu yachanay”, nispa.
¿Imaninmi Biblia? Allinta kausananchispaqqa Diospa nisqanman jinan imatapas ruwananchis, chayta ruwaspallan kusisqa kausasunchis. Chhaynaqa kusisqa kausananpaqqa Jehová Diostan servinanchis kamachikuyninkunatataqmi kasukunanchispas (Salmos 100:3).
Wakin runakunan ninku: “Noqaqa Diospa amigon kasqaytaqa rikuchini ayunaspa, cuerpoyta k’irikuspa iman”, nispa.
¿Imaninmi Biblia? Diosqa manan cuerponchista k’irikuspa adorananchistachu munan (Colosenses 2:18, 23). Diostaqa manan llakisqachu ni nanasqachu yupaychananchis, aswanpas kusisqan yupaychananchis (Proverbios 10:22).
Wakin runakunan ninku: “Espiritukunawan rimaqkunaqa allintan Diosmanta yachanku, astawanmi payman asuykunku”, nispa.
¿Imaninmi Biblia? Bibliaq nisqanman jinaqa wañusqakunaqa manañan imatapas ruwankuñachu, paykunaqa manan yanapaytapas atiwanchischu. Layqakuna watuqkunan ichaqa piensanku wañusqakunawan rimashanankupaq (Eclesiastés 9:5). Ichaqa paykunaqa mana allin espiritukunawanmi rimashanku, chay espiritukunaqa Diospa contranpin kashanku. Chay ruwaykunataqa Jehová Diosqa cheqnikunmi. Chayta ruwaq runakunaqa manan Diosman asuykuyta atinkumanchu (Levítico 20:6; Deuteronomio 18:11, 12).
Wakin runakunan ninku: “Llapa kausayniyoqkunan Diostaqa yupaychanku”, nispa.
¿Imaninmi Biblia? Jehová Diostaqa llapa kamasqankunan jatunchan (Salmos 145:10; Romanos 1:20). Ichaqa runakunallatan payta yupaychanankupaqqa kamarqan, runakunallan yachayniyoqqa kanku. Animalkunaqa comuntan imatapas ruwanku, manataqmi Dioswanqa amigontin kayta atinkumanchu. Chaymantapas animalkunaqa kausayllan-kausanku (2 Pedro 2:12). Chaymi Bibliapiqa sut’ita niwanchis Dios sonqo runaqa kasukuq kasqanta, mana animalkuna jinachu comunta imatapas ruwasqanta (Santiago 3:15; Judas 19).
a Mayninpiqa “espíritu” nispaqa nikun mana rikukuq kaqkunatan. Biblian willawanchis Diosqa espíritu kasqanta. Pipas Diosman asuykuyta munaqqa Diospa munaynintan ruwanan, santo espiritunwantaqmi yanapachikunan.
b Bibliapiqa “aychaq munayninman” jina imatapas ruwaq runamanta rimaspaqa, munasqanman jina imatapas ruwaq runamantan rimashan, chay runaqa manan Diospa kamachikuyninkunata kasukunchu.
c Bibliapin nishan Diospa sutinqa Jehová kasqanta (Salmos 83:18).