¿Imakunatan ruwasunman Bibliata allinta entiendenapaq?

Josué leeshan Diospa kamachikuyninta; Jericó llaqta perqakuna urmaykushan Rahabpa wasintaq mana; Josué cieloman makinta jaywarispa mañakushan

JOSUETAN Diosqa churaran llaqtanta prometesqa allpaman chayachinanpaq. Chayta ruwayqa manan facilchu karan. Chaymi Diosqa kallpacharan: “¡Kallpachakuy! ¡Allinta sayay!”, nispa. Chaymantapas tukuy ima ruwasqanpas allin kananpaqqa sapa p’unchaymi Josueqa Diospa siminta leenan karan, chayman jinataqmi imatapas ruwanan karan (Jos. 1:7, 8).

Kay tiempopi kausaypas manan facilchu kashan, arí, watakunaq pasasqanman jinan tukuy imapas sasa kapushan (2 Tim. 3:1). Chaymi ima ruwasqanchispas allin kananpaqqa Josué jina sapa p’unchay Bibliata leenanchis. Chaypi consejokunan yanapawasun ima pruebatapas allinta aguantananchispaq.

Ichaqa manapaschá yachanchischu Bibliata imayna estudiayta. Chaywanpas estudiananchismi Bibliataqa. Yaqapaschá yanapasunkiman “Kaykunawan yanapachikuy” nisqa recuadro. Chaypin kashan imaymana yanapaykuna Bibliata estudianapaq.

Salmos takita qelqaq runan niran: ‘Kamachikuyniykikunaman jina kausachiway, chay jinata kausaspaymi kusikuni’, nispa (Sal. 119:35). ¿Imatan chaymanta yachasunman? Noqanchispas atisunmanmi Diospa siminwan kusikuyta. Chaypiqa ancha sumaq yachachikuykunan kashan.

Manapaschá noqanchisqa Josué jinachu juj nacionta pusananchis kanqa. Ichaqa imaymana problemakunan kay tiempopiqa kashan, chaymi Josué jina Diospa siminta estudiananchis, chayman jinataqmi kausananchispas. Chayta ruwasun chayqa allin yuyaywanmi tukuy imatapas ruwasun.

KAYKUNAWAN YANAPACHIKUY

Diospa yanapayninta mañakuy. Bibliataqa Diosmi qelqachiran, paypa piensayninkunan chaypiqa kashan. Chaymi Bibliata entiendenapaqqa paypa yanapayninta mañakuna. Payqa yanapawasunmi leesqanchista yuyarinapaq, chayman jina kausanapaqpas (Esd. 7:10).
Tapukuy. Bibliata o qelqanchiskunata leesqaykiman jina tapukuy: “¿Imatan yachachiwan Jehová Diosmanta? ¿Imaynapin Bibliapi yachachikuyman jina kashan? ¿Imaynatan kaywan jujkunata yanapayman?”, nispa.
Leesqaykipi piensay. Leesqaykipi juj chikanta sayaykuy, jinaspa piensay o yuyaymanay. ¿Imaynan sonqoyki kashan? ¿Imatan sienteshanki? ¿Ñaupaqpi imakunapichus tarikusqaykitachu yuyarishanki? ¿Kunanchu icha imapas pasashasunki? Icha, ¿qhepaman imachus ruwanaykimantachu rimashan? Chaykunapi piensay. Chaymantataq tapukuy: “¿Imaynatan kay texto yanapawanman?”, nispa (Job 23:5; Sal. 49:3). Chaymantapas tapukullaytaq: “¿Imaraykun Dios kay ruwayta prohibinman karan? ¿Iman pasanman karan pipas chay kamachikuyta mana kasukuqtin?”, nispa (Deut. 32:28, 29).
Yuyayniykita llank’achiy. Bibliapi ima willakuytapas leespaqa chaypipas kashawaq jina leey. Josemanta rimasun. Paytaqa wayqenkunan Ismael runakunaman venderanku (Gén. 37:18-28). Chay willakuyta leespaykiqa, chayman jaykuy. ¿Imakunatan rikushanki? ¿Imakunatan rimashanku? ¿Imakunan chaypi q’aparishan? ¿Ima ruwaytan munashanku? ¿Imaynan sonqonku kashan? Chaykunapi piensaspa imatapas leenki chayqa allintan entiendenki.
Estudianapaq yanapaykunawan yanapachikuy. Computadorapiña papelpiña kashan chaypas chaykunawan yanapachikuy. Manachus atinki chaykuna imayna manejayta chayqa jujkunawan yanapachikuy. Chay yanapaykunan kashan INTERNETPI QELQANCHISKUNA nisqa, Jehová Diospa testigonkuna Bibliata t’aqwinankupaq qelqa nisqa ima. Chaykunapin kashan imaymana informacionkuna. Kashanmi Bibliapi textokunata explicaq informacionkunapas. Yanapachikuwallaqtaqmi Bibliata estudianapaq yanapaykuna nisqa folletowanpas. Chaypin kashallantaq Bibliamanta imaymana willakuykuna, kashanmi mapakuna, jayk’atachus imapas pesaq chaykuna, medidakuna ima.
Kutipay. Imatapas estudiayta tukuspaqa jujmantan kutipananchis. Chayta ruwasun chayqa umanchispin qhepanqa ima leesqanchispas. Yaqapaschá jujkunamanpas willasunman. Chayrayku tapukuy: “¿Imaynatan kaywan yanapachikuyman predicacionpi?”, nispa. Chaykunata ruwanki chayqa yuyankin ima estudiasqaykitapas, faciltataqmi jujkunatapas yanapanki.