¿Sulla jinachu predicasqayki?

DIOSPA siminta willasqanchisqa ancha importanten. Ichaqa askha runakunan mana chhaynatachu qhawarinku. Wakinña Bibliaq willasqanta allinpaq qhawarinku chaypas, manan noqanchiswan estudiayta munankuchu.

Gavin runamanta yachasun. Payqa manan Bibliata estudiayta munaranchu ichaqa riqmi juñunakuyninchiskunaman. Payqa p’enqakuranmi Bibliamanta pisilla yachasqanmanta. Jinaspapas manan mayqen religionwanpas comprometekuyta munaranchu nitaq engañanankutapas. ¿Imaynatan qan Gavinta yanapawaq karan? Bibliapi yachachikuykunawanqa pitapas yanapasunmanmi. Jehová Diosmi Israel runakunata niran: ‘Simiykunaqa sulla jinan kanqa, q’achupi iphu para jinan kanqa’, nispa (Deut. 31:19, 30; 32:2). ¿Imakunapaqmi sulla allinpuni? ¿Imaynapin predicayninchis chay sulla jina kanman? Chaykunamanta yachasqanchismi yanapawasun ‘llapa runaman’ predicananchispaq (1 Tim. 2:3, 4).

¿IMAYNAPIN PREDICAYNINCHIS SULLA JINA?

Sullaqa llamp’ullan. Sullaqa plantakunapi tiyaq unu sut’uykunan; chayqa ch’isinta wayraq apamusqan wajsiwanmi rijurin. ¿Imaraykun sulla jina Jehová Diospa simin? Diosqa chay sulla jinan llaqtanta llamp’u simiwan, sumaq simiwan rimaykun. ¿Imaynatan payta qatikusunman? Runakunaq creesqanta respetaspan, paykunallamanta imatapas decidikunankupaq yanapaspa. Tukuy sonqowan paykunata yanapasun chayqa, sumaqtan uyarikunqaku, yaqapaschá Biblia estudiaytapas munanqaku.

Sullaqa llanllarichinmi. Bibliamanta runakunaman sumaqllata yachachiqtinchisqa sonqonkun llanllarin. Juj kutinmi Chris iñiqmasi Gavin runata invitaran Bibliata estudianankupaq, ichaqa manan munaranchu. Chrisqa manan obligaranchu estudianankupaq, aswanmi Gavin runaq munasqanman jinalla Bibliamanta parlariqku. Chay parlasqankupin Chris niran: “Bibliapin juj importante mensaje kashan, chayta yachaspaqa aswan allintan entiendenki juñunakuypi uyarisqaykita”, nispa. Jinaspapas willakuranmi profeciakunaq junt’akusqanmanta yachasqan iñiyninpi yanapasqanta. Jinan profeciakunaq junt’akusqanmanta parlariqku. Chaykunan Gavin runata kallpacharan Biblia estudiayta qallarinanpaq.

Sullaqa kausarichinmi. Ch’akiy tiempo chayamuqtinmi Israel llaqtapi sinchita ruphayamun, askha killataqmi mana para kanchu. Sichus sulla mana kanmanchu chayqa, llapa plantakunan wañupunman. Biblian willaranña kay tiempopipas askha runakuna Diospa ‘siminmanta’ ch’akichikunankuta (Amós 8:11). Ichaqa willaranmi ajllasqa cristianokuna ‘Diospa sullachimusqan sulla jina’ kasqankuta. ¿Imarayku? Diospa gobiernonmanta willasqankurayku. Chay llank’aypin ‘waj ovejakunapas’ yanapakushanku (Miq. 5:7; Juan 10:16). Chay willakuyta chaskikuqkunamanmi Jehová Dios wiñay kausayta qonqa. ¿Ancha valorniyoqpaqchu chay willakuyta qhawarinchis?

Sullaqa Jehová Diospa bendicionninmi (Deut. 33:13). Askha runakunan predicasqanchista Diospa bendicionninta jina qhawarinku. Gavin runapas chhaynatan qhawarin. Paytaqa Biblia estudiasqanmi yanaparan tukuy tapukusqanmanta yachananpaq. Qhepamanmi bautizakapuran, kunantaqmi esposanwan kuska kusisqa Diospa gobiernonmanta juj runakunaman predicashanku.

PREDICASQANCHISQA ANCHA VALORNIYOQMI

Predicasqanchisqa sulla sut’uykuna jinan. Juj sut’uyllaqa manan plantakunata yanapanchu. Millonninpi sulla sut’uykunan ichaqa llapa plantakunata llanllarichin. Yaqapaschá sapankanchispas predicasqanchista pisipaq qhawarishanchis. Ichaqa millonninpi Testigokuna kasqanchisraykun ‘pachantinpiña willashanchis’ (Mat. 24:14). Predicasqanchisqa Diospa bendicionninmi; llamp’u sulla jinan runakunaq sonqonta llanllarichin wiñay kausaytapas qon.