LEEQKUNAQ TAPUKUSQAN

Gálatas 4:24 textopin rimashan iskay acuerdomanta, ¿mayqenkunan chaykuna kanman?

Apóstol Pablon chaytaqa qelqarqan. Imaynatachus Abrahán Sarawan Agarwanpas kausarqan chayta willasqan qhepamanmi Pabloqa nirqan: “Chay pasasqanmi rikuchirqan imachus qhepaman pasanan karqan chayta. Chay warmikunan tupan iskay acuerdo ruwakusqanwan”, nispa (Gál. 4:​22-24). Ñaupaqqa chaytaqa nirqanchis “jujninqa Dioswan Israel runakunawan rimanakusqankun, jujkaqtaq mosoq rimanakuy ruwakusqan” nispan. Ichaqa aswan allintan chayta estudiakuran, jinan chay nikusqanta cambiakunan kanqa. Chaypiqa apóstol Pabloqa yaqasuna rimashanman karqan Dioswan Israel runakunawan rimanakusqanmanta, jinallataq Dioswan Abrahanwan rimanakusqanmanta.a Chayta allinta entiendesun.

Apóstol Pabloqa Agarwan tupaq rimanakuymanta rimaspaqa Sinaí orqowanmi tupanachirqan (Gál. 4:25). Chay orqopin Jehová Diosqa Israel runakunawan juj rimanakuyta ruwarqan, chayqa 1513 watapin karqan manaraq Jesús kay pachaman jamushaqtin (Éx. 19:​5, 6). Chhaynaqa, Agarqa Sinaí orqopi rimanakuy ruwakusqanwanmi tupan. Chay kutipi chaskisqanku kamachikuytaqa manan pipas junt’ayta atirqanchu, chaymi Judío runakunataqa yuyarichirqan imaynas juchaq kamachin kanku chayta. Chaymantapas chay kamachikuy simikunaqa allinmi karqan runakuna ajllasqa Mesiasta o Cristota reqsinankupaq. Payllan chay kamachikuy simitaqa llapanta junt’anan karqan, chhaynataqmi karqanpas. Chaymantapas, Cristoqa llapa juchasapa runakunaraykun sacrificiopi vidanta entregarqan chhaynapi juchamanta wañuymantawan librasqa kananchispaq (Gál. 3:​19, 24, 25). Ñataq Diospa munayninman jinaña chaykuna ruwakusharqan chayqa, manañan kamachikuy simiman jinañachu imatapas ruwana karqan (Rom. 10:4).

Apóstol Pabloqa “libre kaq warmimantan” rimallarqantaq, payqa Saran karqan, payqa Diospa promesanman jinan juj wawata onqokurqan (Gál. 4:23). Chay promesaqa karqan Dioswan Abrahanwan rimanakusqankun (Gál. 3:29; 4:​28,30). Chay rimanakuyta ruwashaspan Jehová Diosqa Abrahanta nirqan: “Mirayniykiraykun jallp’a pachapi llapa nacionkunapas bendecisqa kanqaku, kasukuwasqaykiraykun chayqa kanqa”, nispa (Gén. 22:18).

Chay rimanakuyta ruwaspan Jehová Diosqa astawan sunt’inchasharqan Edén huertapi promesa ruwasqanta (Gén. 3:15). Allintan rikuchirqan imaynas willasqan mirayqa Abrahanmanta jamunan karqan chayta. Apóstol Pabloq nisqanman jinaqa chay miraypi umaqa Jesucriston karqan. Ichaqa Cristopaq kaqkunapas chay miray ukhupin kashallankutaq. Paykunan kanku 144.000 runakuna, paykunan Cristowan kuska janaq pachamanta gobiernamunqaku (Gál. 3:​16, 29; Apo. 14:​1-3). Pipas Jesusta chaskiqqa simintapas kasukuqqa imaymana bendiciontan chaskinqa. Jehová Dios Abrahanman promesa ruwasqanta junt’asqanraykun chaykuna kanqa.

Chhaynan chaykunaqa karqan. Ichaqa, ¿imatan apóstol Pablo yachachiyta munashanman karqan chay warmikunamanta rimaspa? Chay tiempopi Judío runakunatan nisharqan imaynas kamachikuy simiman k’askakuyta munaspaqa Agar jina kamachillapuni kananku karqan chayta. Abrahanmanta jamuq mirayta o Jesucristo chaskiqkunan ichaqa Sara jina libre kananku karqan. Ichaqa, ¿imamantan libre kananku karqan? Juchamanta wañuymantawanmi (Juan 8:​32-34). Chaymantapas Jesusta mana chaskispaqa, kamachikuy simitapas mana kasukushankumanchu jinan karqan. ¿Imarayku? Chay kamachikuymi paykunataqa Cristoman pusasharqan.

Galacia llaqtapi iñiqkunaqa yaqa llapankun mana jayk’aqpas kamachikuy simipiqa karqankuchu. Paykunatan iñiqman tukupuq wakin Judiokunaqa tanqasharqanku kamachikuy simita kasukunankupaq, qhari kay qarachatapas kuchuchikunankupaq. Chayta yachaspan apóstol Pabloqa chay llaqtapi iñiqkunata nirqan: “Libre kananchispaqmi Cristoqa librawarqanchis. Chhaynaqa qaqata sayaychis, amataq wajmanta watachikuychischu kamachi yugoman”, nispa (Gál. 5:​1, 10-14).