¿Imaynatan ñaupa tiempopi challwata jap’inankupaq llikankuta ruwaqku?

Yachasqanchis jina, Jesuspa wakin discipulonkunaqa challwa jap’iqmi karqanku (Mar. 1:​16-20). Paykunaqa Galilea lamar qochapin llikankuwan challwata jap’iqku.

Ichaqa, ¿imaynatan chay tiempopi llikankuta ruwaqku? Chaytaqa lino cordelmanta waskhamanta iman khipuspa awaqku. Juch’uy challwakunata jap’inankupaqqa, juch’uy t’oqochakunayoqtan awaqku, chhaynapi challwakuna ama lloqsinanpaq. Chaymantapas chay llikankuq ura patankunapin juch’uy rumichakunata wataqku, chhaynapi lamar qocha ukhuman chinkaykuspa juch’uy challwakunata jap’inankupaq. Jatun challwakunata jap’inankupaqmi ichaqa jatun t’oqokunayoqta awaqku. Chaymantapas chay llikankuq jawa patanmanmi maderata corchota ima churaqku lamar qocha ukhuman ama chinkaykunanpaq, aswanpas unu patallapi tuytunanpaq.

Challwakunata jap’inapaq llikakunaqa nishutan valeq, chaymi chaytaqa allinta cuidaqku. Ichaqa mayninqa lamar qochapi jatun qaqakunaman chayaqtinmi o challwakuna nishuta llasasqanraykun ratulla qhasukuq (Luc. 5:6). Chaychá Santiagopas Juanpas juj kutinqa llikankuta allichasharqanku. Paykunaqa yaqachus jina lino cordelwan llikankuta allichashankuman karqan (Mat. 4:21). Rikusqanchis jina, yaqachus jina chay tiempopiqa, challwata jap’isqanku qhepamanqa llikankuta allichaqku, t’aqsaqku ima. Chaychá Lucaspas nirqan: “Challwaqkunaqa botenkumanta lloqsispan challwananku llikakunata t’aqsasharqanku”, nispa (Luc. 5:2). Chaymantapas chay llikankuta t’aqsasqanku qhepamanqa, yaqachus jina warkuspa ch’akichiqku, chhaynapi ama ismunanpaq (Ezeq. 47:10).

Challwata jap’iq wakin runakunatan Jesusqa nirqan: “Noqan runakuna challwayta yachachisaykichis”, nispa.