Amapuni Jehová Diosmantaqa t’aqakusunchu

1, 2. ¿Imatan wakin runakuna ruwarqanku Capernaúm ladopi Jesús yachachishaqtin?

JUJ kutinmi Jesusqa Capernaúm ladopi yachachisharqan, chaypin llapa qatikuqninkunata nirqan: “Cheqaqtapunin niykichis: Manachus runaq Churinpa aychanta mijunkichis ni yawarnintapas ujankichis chayqa, manan kausayniyoqchu kankichis”, nispa. Payqa nillarqantaqmi: “Pipas aychayta mijuqqa yawarniytapas ujaqqa wiñay kausayniyoqmi kanqa. Tukukuy p’unchaypin paytaqa kausarichimpusaq”, nispa (Juan 6:​53, 54). Jesuspa chay nisqanta uyarispan wakin runakunaqa nirqanku: “¡Imatataq kay runari rimashan! ¿Pitaq chay nisqantari uyarinman?”, nispa (Juan 6:60).

² Rikusqanchis jina, chay runakunaqa phiñakurqankun Jesuspa chay nisqata uyarispa, jinan manaña paytaqa qatikurqankuchu. Ichaqa, ¿chayraykuchu nisunman “paykunaqa manachá Jesuspiqa iñirqankuchu chayraykuchá saqepurqanku” nispa? Manan. Paykunaqa iñirqankupunichá Jesuspiqa chayraykuchá paytaqa qatikusharqanku. ¿Imaraykun chayta ninchis? Manaraq chaykuna pasashaqtinmi Jesusqa juj Milagrota ruwasqa, chayta rikuspan paykunaqa nirqanku: “Kay runaqa kay pachaman jamunan karqan chay profetapunin kanman”, nispa (Juan 6:14). Chaywanpas Jesuspa imachus nisqanta mana entiendespan paykunaqa Jesusmanta t’aqakapurqanku.

3. ¿Imanirqankun apostolkuna Jesuspa yachachisqanta uyarispa? ¿Imaraykun chayta nirqanku? (Qhaway kay parrafopaq dibujota).

³ Apostolkunarí, ¿imatan ruwarqanku? ¿Paykunapas saqepurqankuchu Jesusta? Manan. “¿Qankunapas ripuytachu munashankichis?”, nispa Jesús tapuqtinmi Pedroqa nirqan: “Señor, ¿pimantaq riykumanri? Qanpa rimasqaykikunaqa wiñay kausay simikunan. Noqaykuqa iñiykun, yachaykutaqmi qanqa Diospa ch’uya Churin kasqaykita”, nispa (Juan 6:​67-69). Rikusqanchis jina, Pedroqa manan “noqaykuqa entideykun yachachisqaykitaqa” nirqanchu. Arí, apostolkuna manaña entienderqankuchu Jesuspa nisqanta chaypas, paykunaqa manan Jesusmantaqa t’aqakurqankuchu. ¿Imaraykun mana t’aqakunkumanchu karan? Paykunaqa allintan yacharqanku Jesusqa “Diospa ajllasqan Cristo” kasqanta (Luc. 9:​20, 35).

4. ¿Imakunapin mayninpi tarikusunman?

⁴ Ñaupaq parrafopi yachamusqanchis jina, wakin runakunaqa Jesuspa yachachisqanta mana entiendespan payta saqerparirqanku. Noqanchistapas chayqa pasawasunmanmi. ¿Imaynapi? Yaqapaschá Bibliamanta ima yachachikuytapas jujniraymanta explicakamunman; jujniraymanta predicananchispaq imapaschá niwasuman. Mayninqa yaqapaschá ima sasachakuypipas llakipipas tarikusunman, Diosqa jinallatapaschá chaykuna pasawananchista qhawanman. Mayninqa yaqapaschá mayqen hermanopas sonqonchista k’iriwasunman. Chhaynakunapi tarikuspa, ¿imaynan kanchis? ¿Imatan ruwanchis?

5. ¿Imaraykun iñiypi fuerte kananchis? Willay juj ejemplota (Colosenses 1:23).

⁵ ¿Imatan ruwasunman chhaynakunapi tarikuspa amapuni Jehová Diosmanta t’aqakunanchispaq? Chaypaqqa tukuy sonqon paypi iñinanchis. Chaypaq juj wasipi piensarisun. Terremotokunaq pasasqan ladopi tiyasunman chayqa ¿imaynatan juj wasita ruwasunman? Chay wasi ama urmaykunanpaqqa allintan cimentacionninta ruwananchis ¿riki? Chhaynallataqmi iñiyninchiswanpas. Imaña kaqtinpas qaqata sayananchispaqqa tukuy sonqon Jehová Diospi confiananchis. Arí, allin cimentasqa wasi jinan iñiyninchis kanan (1 Cor. 15:58; leey Colosenses 1:23).

6. ¿Imaraykun apostolkuna mana Jesusta saqerparirqankuchu?

⁶ ¿Imaraykun apostolkuna mana Jesusta saqerparirqankuchu? Ñaupaqpi yachamusqanchis jina, paykunaqa allintan yacharqanku Jehová Dios kamaqninchis Dios kasqanta, Jesús Diospa sapallan churin kasqantapas. Yacharankun Jesusqa “wiñay kausay simikunata” rimasqantapas, yachallarankutaqmi Jehová Diosqa Jesuswan kashasqantapas. Ñaupaqpi yachamusqanchis jina, kay tiempopiqa imaymanakunan Jehová Diosmantaqa t’aqawasunman. Ichaqa imakunas t’aqawasunman chayta yachananchismantaqa, imakunas yanapawasunman Jehová Diosmanta ama t’aqakunanchispaq chaykunamanta yachasunchis, kinsamanta yachasunchis. 1) Jehová Diosmi tukuy imata kamaq Diosqa, 2) Bibliaqa Jehová Diospa yuyaychasqanmi 3) Jehová Diosmi pusarishan llaqtantaqa. Chaykunata allinta sonqonchispi yuyayninchispi jap’ikusun chayqa, imaña kanqa chaypas manapunin Jehová Diosmantaqa t’aqakusunchu.

JEHOVÁ DIOSMI KAMAQNINCHIS DIOSQA

7. ¿Imanishanmi Apocalipsis 4:11 textopi? ¿Imaraykun mana jayk’aqpas chayta qonqananchischu?

⁷ (Leey Apocalipsis 4:11). Chay textopi nisqan jina, Jehová Diosmi tukuy imata kamaq Diosqa, chaymi payllata adorananchis. Paypa tukuy ima ruwasqanpi yuyaymanasun chayqa, sut’itan reparasun imaynas payqa imapiña tarikusun chaypas yanapawasunpuni chayta. Ichaqa Satanasqa manan munanchu Jehová Diospi creenanchista, chaymi Diosmanta imaymana yanqa yachachikuyta rijurichimushan. Manan chayllapaschu, wakin allin reqsisqa científico runakunapas “yanqallamantan tukuy imapas paqarimurqan” ninkun. Chaykunaqa yaqapaschá Jehová Diosmanta iskayachiwasunman. Chay ama pasawananchispaqqa allintan umanchispi sonqonchispipas jap’inanchis imaynas Jehová Diosqa kamaqninchis chayta, imaynas payqa munakuwanchis chaytapas, chhaynapin mana jayk’aqpas paymantaqa t’aqakusunchu (Heb. 11:6).

8, 9. ¿Imatan ruwawaq Jehová Diosmanta iskayaspayki? (Qhaway kay parrafopaq fotota).

⁸ Ichaqa, ¿imaynapipas Jehová Diosmanta iskayawaq chayri? ¿Imatan ruwawaq? Chhaynapi tarikushanki chayqa qelqanchiskunata estudiay, chaypin allinta yachanki imaynas Jehová Diosqa kamaqninchis chayta, chhaynapin paypiqa astawan confianki. Chay qelqakunamanta wakinmi kaykuna: ¿Es la vida obra de un Creador?, El origen de la vida. Cinco cuestiones dignas de análisis, nisqa folletokuna. Jinallataq jw.org paginapi “¿Kikillanmantachu paqarimurqan?” nisqapi videokuna qelqakuna ima. Chaytan Estados Unidos nacionmanta hermananchis Jessicapas ruwasqa, paymi nin: “Noqaqa El origen de la vida, nisqa folletotan estudiarqani, chaypin allinta yacharqani imaynas tukuy imapas kamasqa kashan chayta. Noqaqa yacharaniñan chaykunataqa, ichaqa chay folletota estudiasqay qhepamanmi manaña Jehová Diosmantaqa iskayaranichu”, nispa. Wakin hermanokunatapas ¿Existe un Creador que se interese por nosotros? nisqa qelqata estudiaysi yanapasqa Diospi astawan confianankupaq. Qanpas chay qelqakunata leerqankiña chayqa, ¿manachu kallpachakuwaq chaykunata jujmanta leenaykipaq?

⁹ Chay qelqakunata allinta estudianki chayqa astawanmi Jehová Diospi confianki. Manan chayllapaschu, astawanraqmi Diosninchista reqsinki (Rom. 1:20). Chaymantapas preparasqan kanki Diosmanta iskayaqkunata yanapanaykipaq. Rikusqanchis jina, imaymanan sut’ita rikuchin imaynas Jehová Diosqa kamaqninchis chayta.

Nebulosa: IAC/RGO/David Malin Images; pez y automóvil: Mercedes-Benz USA; avión: Kristen Bartlett/University of Florida

BIBLIAQA DIOSPA YUYAYCHASQANMI

10. ¿Imaniwaqmi Bibliamanta? (2 Timoteo 3:​16, 17).

¹⁰ (Leey 2 Timoteo 3:​16, 17). Bibliapiqa Jehová Diospa yachachikuyninkuna yuyaychayninkuna iman kashan. Chaypin willashan imaynapis kausay paqarirqan, imapaqsi kamasqa karqanchis, imayna kausananchistas Dios munan chaykunata. Bibliataqa Jehová Diospunin yuyaycharqan chaymi chay libroqa ancha allinpuni. Chaymi chay librotaqa allinta estudiananchis, kallpachakunanchistaqmi chaypi nisqanman jina kausananchispaq.

11. ¿Imaraykun niwaq “Bibliaqa Diospa yuyaychasqanpunin” nispa?

¹¹ Ichaqa, ¿imaraykun nisunman “Bibliaqa Diospa simin qelqapunin” nispa? Bibliapiqa imamantapas willaspaqa allintan, sut’itan willan (Luc. 3:​1, 2). Chaymantapas jallp’a pachamantaña imamantaña willaspapas imaynachus kashan chayman jinapunin willan (Job 26:7). Satanasña chay librota chinkachiyta munarqan chaypas, askha simikunamanmi t’ijrasqa karqan. Runakunapas yaqa llapankun chay librotaqa jap’inku. 1.600 watakunapi jinaña qelqayta tukurqanku chaypas, 40 runakunaña qelqarqanku chaypas kaqllamantan rimashan. Juj runallapas qelqanman karan jinan kashan. Unayña chay librota qelqakurqan chaypas chay libroqa waranqanpi runakunatan kay tiempopipas yanapashan (Prov. 13:20; 15:21; Mat. 7:12). Chaymantapas chay libropi willasqan profeciakunaqa llapallanmi junt’akurqan, kay tiempopipas junt’akushanmi (Jos. 23:14). Chhaynataq chayqa, ¿kanmanchu razón Bibliamanta iskayanapaq?

12. ¿Imatan ruwasunman Bibliamanta iskayaspa?

¹² Ichaqa imaynapipas niwaq, ¿“Diospa siminpunichu kanman Biblia” nispa chayri? Chay pasasunki chayqa Diospa yanapayninta mañakuy, mañakusqaykiman jinataq ruway. Chaypaq yachasun Jordan sutiyoq hermanomanta, payqa Testigo familiapis wiñasqa. Paymi nin: “Noqaqa manan ima niwasqankutapas creenipachachu. Allintan estudiani chay niwasqanku cheqaqchus icha manachus chayta. Sut’in rimaymi valen: mayninqa noqapas iskayanin. Chay pasawaqtinqa chaymanta rimaq qelqanchiskunatan allinta estudiani”, nispa. Sichus chay hermanonchis jina chaykunamanta rimaq qelqakunata allinta estudiasun chayqa, manan Diospa simin qelqamantaqa iskayasunchu, aswanmi iñiypipas qaqata sayasunchis (1 Cor. 3:​12, 13).

JEHOVÁ DIOSMI LLAQTANTAQA PUSASHAN

13. ¿Imatan ruwasunman Testigokuna Diospa llaqtan kasqanmanta iskayaspanchis?

¹³ Yaqapaschá mayninqa nisunman: “Testigokunapunichu kankuman Diospa llaqtan”, nispa. Chhaynata iskayashanchis chayqa manan jinallaqa kananchischu. Yaqapaschá tapukusunman: “¿Pikunan cheqaqtapuni kallpachakunku Bibliapi nisqanman jina kausanankupaq? ¿Pikunan Bibliaq nisqanman jinapuni imatapas yachachinku? ¿Pikunan Diospa munayninta ruwashanku?”, nispa (Mat. 7:​20, 21; 2 Tim. 4:​3, 4).

14. ¿Pikunan junt’ashanku Mateo 24:14 textoq nisqanta? ¿Imaynatan chayta ruwashanku?

¹⁴ Yachasqanchis jinapas, Jehová Diosqa munan allin willakuykuna pachantinpi willakunantan. Tukukuy tiempokunapin chayqa astawanraq ruwakunan karan. ¿Pikunan chayta ruwashanku? (Mat. 24:14). Yachasqanchis jina, Jehová Diospa testigonkunallan chay llank’aytaqa lliu kay pachapi aparishanku. Paykunallan 240 más nacionkunapi llaqtakunapi ima Diospa gobiernomanta willashanku. Arí, chay llank’aytaqa 100 wata masñan aparishanchis. Noqanchispaqqa chay ruwaymi imamantapas aswan jatun ruwayqa (Mat. 28:​19, 20).

15. ¿Imaynatan Testigokuna Diospa sutinta runakunaman reqsichimushanchis? (Mateo 6:9; Isaías 43:10).

¹⁵ (Leey Mateo 6:9; Isaías 43:10). Manan chayllapaschu, noqanchisqa Diospa sutintan apanchis. ¡May munaymi Diospa sutinwan reqsisqa kayqa ¿riki?! Yachasqanchis jinapas, kay tiempopiqa yaqa llapa runakunapas manan yachankuchu Diospa sutintaqa. Noqanchismi ichaqa Diospa sutinta reqsichimushanchis. Chaymantapas wakin Bibliakunapiqa orqopushankun Diospa sutinta. Mosoq pacha Biblia nisqa Bibliapin ichaqa maypichus kananpi rijurishan; 7.000 más kutitan rijurishan.

16. Juan 13:​34, 35 textopi nisqan jina, ¿Imaynatan Jehová Diospa llaqtanpi kausanchis? (Qhaway kay parrafopaq fotota).

¹⁶ (Leey Juan 13:​34, 35). Chaymantapas kay pachapi runakuna t’aqanasqaña kausashanku chaypas, Diospa llaqtanpiqa juj nisqallan kausashanchis. Maymantaña kanchis chaypas, imayna uywasqaña karanchis chaypas munaytan juj nisqalla kausanchis. ¿Jayk’aqllapas maytapas viajarqankichu? Chay risqayki llaqtapiqa rirankipunichá juñunakuymanqa. Riranki chayqa rikurankipunichá imaynas noqanchisqa juj familia jina kausanchis chayta, imaynas munanakuspa kausanchis chaytapas. ¡¿Manachu chaykuna sut’ita rikuchin imaynas Jehová Diospuni kay llaqtanta pusarishan chayta?! Chhaynan ¿riki? Chaykunata sonqonchispi umanchispi allinta jap’ikusun chayqa, manapunin jayk’aqpas Jehová Diospa llaqtanmantaqa iskayasunchu.

AMAPUNI JAYK’AQPAS DIOSMANTAQA T’AQAKUSUNCHU

17, 18. a) ¿Imakunapin yaqapas tarikusunman? b) Diospi, palabranpi llaqtanpipas tukuy sonqo confiasun chayqa, ¿imatan apóstol Pedro jina nisun?

¹⁷ Manchakuy sinchi sasa tiempokunapitaq kausashanchis chayqa, llapanchismi imaymana llakipi pruebapi ima tarikusun (2 Tim. 3:​1, 13). Mayninqa manapaschá imatapas allintachu entiendesun. Yaqapaschá Diospa llaqtanpi imatapas nikamunqa, noqanchisqa manapaschá chayta allintachu entiendesun, sasapaschá kanqa chayta kasukuypas. Mayninqa yaqapaschá mayqen hermanopas sonqonchista k’iriwasun, manapaschá chayta imayna allichayta atisunchu. Chhaynapi tarikuspaqa yaqapaschá nisunman: “¿Khaynachu kanan kaykuna? ¿Imaraykutaq kayri pasawashan?”, nispa.

¹⁸ Chhayna pruebakunapiña tarikusun, ima sasachakuypiña tarikusun chaypas, sichus allinta yachasun imaynas Jehová Dioslla kamaq Diosqa, imaynas Bibliapiqa siminpuni kashan, imaynas Testigokunaqa paypa llaqtan chayta chayqa, manapunin imapas Diosmantaqa t’aqawasunchu. Aswanmi apóstol Pedro jina noqanchispas nisunchis: “Señor, ¿pimantaq riykumanri? Qanpa rimasqaykikunaqa wiñay kausay simikunan”, nispa.