Pusachikushallay Jehová Dioswan

1. ¿Imakunatan runakuna necesitanchis? (Mateo 5:3).

RUNAKUNAQA necesitanchispunin mijunata, p’achata, tiyananchispaq wasita ima. Chhaynapaqmi Jehová Diosqa kamawasqanchis. Chaykunamanta mayqenpas mana kapuwasunmanchu chayqa, onqopusunman wañupusunman imapaschá. Ichaqa manan chayllatachu runakunaqa necesitanchis, Jehová Diostapas necesitanchismi (leey Mateo 5:3). Jehová Diosta necesitasqanchista reparakusun jinaspa payman asuykusun, kasukusuntaq kamachikuyninkunata yuyaychayninkunatapas chayqa, kusisqan kasunchis.

2. ¿Imaynapin runakuna callepi mañapakuq runakuna jina kanchis?

² Mateo 5:3 textopiqa, callekunapi mañapakuspa puriq runamantapas rimashanman jinan kashan griego rimaypiqa. Callepi mañapakuspa puriq runapi juj chhikanta piensarisun. Payqa thanta p’achallayoqñas callepi tiyashanman. Sinchita ruphamuqtinpas chirimuqtinpas chhaynallas kakushan. Chaymantapas manas mijunan kanmanchu, chaysi mana kallpayoq yanqallaña kashan. Runakunapas payta qhawayuspas ayqerikunku. Chhaynaqa chay runaqa allin kananpaqqa yanapanatan necesitashan ¿riki? Arí chhaynapunin. Chhaynallataqmi llapa runakunawan pasan. Llapanchismi necesitanchis Diospa yanapayninta. Chaymi paypa yanapayninta mañakunanchis. Chay yanapay qowasqanchisman jinataqmi imatapas ruwananchis.

3. ¿Imakunamantan kaypi yachasun?

³ Kaypin yachasunchis Fenicia llaqtayoq warmimanta. Payqa Jesuspa yanapaynintan mañakurqan. Humilde sonqoyoqmi karqan. Chaymantapas mañakusqanta ruwapunankaman Jesusta rogakurqan, allin iñiyniyoqmi karqanpas. Chay qhepamantaq yachasunchis Dios sonqo kinsa runakunamanta: Apóstol Pedromanta, apóstol Pablomanta, rey Davidmantawan.

FENICIA WARMIQ EJEMPLON

4. ¿Imatan Fenicia llaqtayoq warmi Jesusmanta mañakurqan?

⁴ Juj kutinmi Fenicia llaqtayoq warmi Jesuspa kasqanman rirqan. Jinaspa Jesusta valekurqan ususinta qhaliyachinanpaq. Ususinqa supaypa junt’aykusqanmi kasharqan (Mat. 15:​21-28). Chaymi chay warmiqa qonqoriykukusparaq Jesuspa yanapayninta mañakurqan. ¿Imatan paymanta yachasunman? Chayta qhawarisunchis.

5. ¿Imaynan Fenicia llaqtayoq warmi karqan, imatan Jesús ruwarqan chayta rikuspa? (Qhaway kay parrafopaq dibujota).

⁵ Chay Fenicia llaqtayoq warmiq mañakusqanta uyarispan Jesusqa nirqan: “Manan allinchu wawakunaq t’antanta uña alqochakunaman qoyqa”, nispa. Chayta uyarispaqa yaqapaschá chay warmiqa ofiendekunman karqan. “Maypin alqowan tupanachiwanman” nispapaschá ninman karqan. Ichaqa manan chaytachu nirqan, payqa humilde sonqo warmin karqan. Chaymantapas mañakushallarqanmi Jesuspa yanapayninta. ¿Imaraykun mana sayk’uspa Jesuspa yanapayninta mañakushallanman karqan? Payqa tukuy sonqon Jesuspi iñirqan. Chhayna iñiyniyoq kasqanta rikuspan Jesusqa chay warmita yanaparqan. “Noqaqa Israelpi chinkasqa ovejakunallamanmi kachamusqa karqani” nirqanña chaypas, chay warmiq ususinmantan supayta qarqorqan.

6. ¿Imatan yachasunman Fenicia llaqtayoq warmimanta?

⁶ Noqanchispas chay Fenicia llaqtayoq warmi jinan kananchis. Pay jina humilde sonqon kananchis, mana pisipaspan Diospa yanapaynintaqa mañakushanallanchis. Chaymantapas allin iñiyniyoqmi kananchis. Juch’uyaykukuq humilde sonqo kasun chayqa, mañakusunpunin Diospa yanapaynintaqa. Chaymantapas tukuy sonqowanmi Jesuspi iñinanchis, confiananchismi llaqtanta pusarinankupaq churasqan umalliqkunapipas (Mat. 24:​45-47). Chhayna kasun chayqa, Jehová Diospas Jesuspas gustowanmi qowasunchis imachus necesitasqanchista (tupanachiy Santiago 1:​5-7 textowan). Kunanqa yachasun imaynatas Jehová Dios pusariwanchis, imakunatas pay qowanchis kusisqa kananchispaq, imatas ruwananchis chaykunawan yanapachikunanchispaq chaykunamanta. Chaypaqmi yachasunchis apóstol Pedroq, apóstol Pabloq, Davidpa ejemplonmanta ima.

APÓSTOL PEDRO JINA ESTUDIASHALLAY DIOSPA SIMINTA

7. ¿Imata ruwananpaqmi Jesús apóstol Pedrota kamachirqan, ichaqa imatawanmi ruwanan karqan? (Hebreos 5:14–6:1).

⁷ Apóstol Pedropi piensarisun. Payqa qallariymantapachan yacharqan Jesusqa Diospa kachamusqan Mesías kasqanta. Chaymantapas allintan yacharqan Jehová Diosqa Jesuswan wiñay kausaymanta willachishasqanta (Juan 6:​66-68). Manaraq janaq pachaman ripushaspan Jesusqa apóstol Pedrota nirqan: “Ovejachaykunata michipuway”, nispa (Juan 21:17). Apóstol Pedroqa tukuy sonqowanmi chay kamachisqanta junt’arqan. Chaymantapas Jehová Diospa yanapayninwanmi iskay cartakunata qelqarqan. Chhaynapin iñiqmasikunata allinta iñiyninkupi yanaparqan. Ichaqa pay kikinmi allinta estudianan karqan Diospa siminta. Chaymi estudiarqan apóstol Pabloq qelqasqan cartakunata. Chaychá nirqan: “Chay cartakunapi qelqamusqanmanta wakinqa sasa entiendeymi kasqa”, nispa (2 Ped. 3:​15, 16). Sasa entiendeyña karqan chaypas, payqa tukuy atisqantan kallpachakushallarqan entiendenanpaq. Chaymantapas Jehová Diospa yanapaynintan mañakurqan, entiendesqanman jina imatapas ruwananpaq (leey Hebreos 5:14–6:1).

8. ¿Imatan apóstol Pedro ruwarqan Jehová Dios jujniray kamachikuyta qoqtin?

⁸ Chaymantapas Pedroqa tukuy sonqowanmi confiarqan Jehová Diospi. Chaymi imachus kamachisqanta kasukurqan. Chaypaq piensasun Jope llaqtapi kashaspa juj rijuriy rikusqanpi. Diospa angelninmi payta nirqan juj animalkunata wañuchispa mijunanpaq. Chay animalkuna mijuyqa prohibisqan kasharqan Moisespa chaskisqan kamachikuypiqa. Judío runakunaqa manapunin chay animalkunataqa mijunankuchu karqan. Chaymi nirqan: “Señor, amapuni chaytaqa niwaychu, noqaqa manapunin mijuymanchu ima qhelli kaqtapas ni ima millakuna kaqtapas”, nispa. Jinan chay angelqa nimurqan: “Ama qhelli niychu Diospa ch’uyanchasqan kaqkunataqa”, nispa (Hech. 10:​9-15). Chayllamanmi chayamurqanku Cornelioq kachamusqan kinsa runakuna. Paykunatan Cornelio kachamusqa wasinman Pedrota pusanankupaq. Manaraq chay rijuriyta rikushaspaqa Pedroqa manachá rinmanchu karqan Cornelioq wasintaqa. ¿Imarayku? Cornelio mana Judío runachu kasqanrayku (Hech. 10:​28, 29). Ichaqa, ¿cambiaranchu apóstol Pedro piensasqanta? Arí cambiaranmi. Payqa allintan entienderqan imaynas Jehová Diosqa jujniraytaña kamachikusharqan chayta, chayman jinataqmi ruwarqanpas (Prov. 4:18). Payqa rirqanmi Cornelioq wasinta, jinaspa paywan Diosmanta rimarqan. Chhaynapin Corneliopas wasinpi kaqkunapas Diospa espiritunta chaskirqanku jinaspa bautizakurqanku ima (Hech. 10:​44-48).

9. Bibliapi sasa entiendena kaqkunata allinta estudiasun chayqa, ¿imakunapin chaykuna yanapawasun?

⁹ Noqanchispas apóstol Pedro jinan Diospa simintaqa estudiananchis. Ichaqa manan fácil entiendey kaqkunallatachu, aswanpas sasa entiendey kaqkunatapas estudiananchismi. Manapaschá facilchu chayqa kanqa, tiempopaq kallpapaq imapaschá. Ichaqa ruwananchispunin. Chayta ruwasun chayqa, astawanmi Jehová Diosman asuykusun, astawanmi munakusunpas. Astawan munakusun chayqa, ganaswanmi paymanta jujkunaman willasunchis, mana manchakuspan may munakuq kasqanta willasunchis (Rom. 11:33; Apo. 4:11). Chaymantapas Pedro jina Diospa siminta allinta estudiasun chayqa, Diospa llaqtanpi ima cambio kaqtinpas apurayllan chayta kasukusunchis. Chhayna kasun chayqa, allintan Diospa llaqtanpipas yanapakusunchis.

APÓSTOL PABLO JINA KALLPACHAKUSUN DIOSPA MUNAYNINMAN JINA KAUSANAPAQ

10. ¿Imatan ruwana Diospa sonqonpaq jina kanapaq? (Colosenses 3:​8-10).

¹⁰ Jehová Diosqa allin genioyoq kananchispaqmi yanapawanchis, chhaynapi paypa sonqonpaq jina kananchispaq. Chaymanta rimaspan apóstol Pablo nirqan: “Saqepuychis ñaupa kausayniykichista”, nispa. Chaymantataq nirqan: “Diospa qosqan mosoq runa kaywan p’achawan jina churakuychis”, nispa (leey Colosenses 3:​8-10). Ichaqa mosoq runa kayqa, allin genioyoq kayqa manan facilchu. Tukuy atisqanchistan chaypaqqa kallpachakunanchis. Chaypaq Apóstol Pablomanta rimasunchis. Pabloqa wayna kasqanmantapachan kallpachakurqan Diospa munayninman jina kausananpaq (Gál. 1:14; Filip. 3:​4, 5). Ichaqa manan allintachu yacharqan imatapunis Dios munarqan chayta. Chaymi mana paypa munayninman jinachu adorarqan. Manan yacharqanchu Jesuspa yachachisqantapas. Chaymantapas payqa jatunchakuq orgulloso runan karqan. Chaymi mana Diospa munayninman jinapunichu imatapas ruwaq. Pay kikinmi willakurqan imaynas millay runa karqan chayta (1 Tim. 1:13).

11. ¿Imayna kananpaqmi apóstol Pablo tukuy atisqanta kallpachakuq?

¹¹ Apóstol Pabloqa manaraq Jesuspi iñishaspaqa ratullan imawanpas renegakuq. Bibliapi willasqan jina, Pabloqa sinchitan phiñakurqan Jesuspa qatikuqninkunapaq, wañuchiyta imaraqmi munasharqan (Hech. 9:1). Jesuspi iñispan ichaqa tukuy atisqanta kallpachakurqan chhayna genionta saqepunanpaq (Efes. 4:​22, 31). Chaywanpas juj kutinmi Bernabewan sinchitapuni discutirqan (Hech. 15:​37-39). Chay kutipiqa Pabloqa manan Diospa munayninman jinachu ruwasharqan. Chaywanpas kallpachakushallarqanmi Diospa sonqonpaq jina kananpaq (1 Cor. 9:27).

12. ¿Iman Pablota yanaparqan imaynachus kasqanta cambiashanallanpaq?

¹² Pabloqa cambiarqanmi imaynachus kasqanta. Humilde sonqo kasqanraykun payqa cambiayta atirqan (Filip. 4:13). Apóstol Pedro jinan paypas Diospa kallpanpi confiarqan (1 Ped. 4:11). Chaywanpas mayninqa pantaruqmi jinaspa llakisqa kaq. Chhaynapi tarikuspaqa imakunapichá Dios yanaparqan chaykunapin piensaq. Chay kallpawanmi payqa ñaupaqllaman riq (Rom. 7:​21-25).

13. ¿Imaynatan apóstol Pablota qatikusunman?

¹³ Noqanchispas unayña Jehová Diosta servishanchis chaypas, apóstol Pablo jinan kallpachakunanchis Diospa munayninman jina kausananchispaq. Paypa sonqonpaq jinan genionchisqa kanan. Imaynapipas pantarusunman, qallunchis imaña ganaruwasunman chaypas manan chaywanchu mana atiqpaq jina qhawarikunanchis. Aswanmi kallpachakushanallanchis allin genioyoq llamp’u sonqolla kananchispaq (Rom. 12:​1, 2; Efes. 4:24). Ichaqa kaytan mana jayk’aqpas qonqananchischu. Sichus astawanraq allinyayta munanchis chayqa, genionchisqa manan noqanchispaq munayninchisman jinachu kanan, aswanpas tukuy atisqanchistan kallpachakunanchis genionchis Diospa munayninman jina kananpaq.

DAVID JINA DIOSPA PAKAYKUYNINTA MASKHASUN

14, 15. ¿Imaynatan Jehová Dios kay tiempopi llaqtanta pakaykushan otaq cuidashan? (Salmos 27:5; qhaway tapanpi kaq fotota).

¹⁴ Cheqaqta kusisqa kanapaqqa Jehová Dios pakaykuwananchista iman maskhananchis. Ichaqa, ¿imaynatan Jehová Dios pakaykuwanchis? ¿Imatan ruwana pay pakaykuwananchispaq?

¹⁵ Rey Davidqa allintan yacharqan sasa tiempokunapi Jehová Dios yanapananta (leey Salmos 27:5). Ichaqa, ¿imaynatan Jehová Dios kay tiempopi llaqtanta pakaykushan otaq cuidashan? Llapa mana allinkunamantan cuidawashanchis, chhaynapi iñiyninchispi ama pisikallpayananchispaq. Chaymantapas imataña noqanchis contra ruwankuman chaypas, manan atipawasunchu (Sal. 34:7; Isa. 54:17). Satanaspas, supaykunapas, cheqnikuwaqninchis runakunapas atiyniyoqña kanku chaypas, manan jayk’aqpas mana allichakuy atiytaqa dañota ruwawasunmanchu. Wañuchiwasunmanña chaypas Diosninchisqa kausarichimpuwasunmi (1 Cor. 15:​55-57; Apo. 21:​3, 4). Jehová Diosqa llakisqa kaqtinchispas yanapawanchismi, chhaynapi tukuy yuyaywan payta servinanchispaq (Prov. 12:25; Mat. 6:​27-29). Chaymantapas anchatataq munakuwanchis chayqa, jatun familiatan kay pachapi qowanchis. Paykunaqa hermanonchiskunan kanku, paykunan tukuy imapi yanapawasun. Kanmi umalliqkunapas, paykunapas allintan cuidawasun (Isa. 32:​1, 2). Juñunakuykunapin Jehová Diosqa munakuwasqanchista rikuchiwanchis (Heb. 10:​24, 25).

16. ¿Imaynatan Jehová Dios Davidta pakaykurqan cuidarqanpas?

¹⁶ David Jehová Diosta kasukuqtinqa, allin yuyaytan Davidman qoq. Chhaynapin Davidqa allinta piensaspa imatapas ruwaq, chaywantaq payqa anchata kusikuq (tupanachiy Proverbios 5:​1, 2 textowan). Diosta mana kasukuqtinmi ichaqa Davidqa imaymana sasachakuypi tarikuq. Jehová Diosqa manan sasachakuynintaqa chinkachiqchu (2 Sam. 12:​9, 10). Jujkunaq kausanpi sufrisparí, ¿imatan David ruwaq? Diospa yanapaynintan mañakuq. Jinan Diosqa yanapaq kallpachaq ima. Allintataq rikuchirqan imaynas paytaqa munakurqan chayta (Sal. 23:​1-6).

17. ¿Imaynatan Davidta qatikusunman?

¹⁷ Noqanchispas David jinan ruwananchis. Ima decisiontaña ruwananchis kaqtinpas Jehová Diospa yanapaynintan maskhananchis. Chaymantapas ima mana allintapas ruwasqanchisrayku ima llakipipas tarikusun chayqa, Jehová Diosqa manan chaymantaqa jark’awasunchu (Gál. 6:​7, 8). Jujkunaq kausanpi imapipas ñak’arisun chayqa, Diospa yanapaynintan mañakunanchis, paymi yanapawasunchis, kallpata ima qowasunchis (Filip. 4:​6, 7).

PUSACHIKUSHALLASUN JEHOVÁ DIOSWAN

18. ¿Imaynatan muyuriqninchispi runakuna Diosta qhawarinku? ¿Imatan ruwananchis Dios pusashawanallanchispaq? (Qhaway kay parrafopaq fotokunata).

¹⁸ 2026 watapaq texton nin: “Kusisqan kanku Diosta necesitasqankuta reparakuqkunaqa”, nispa. Chay textopi nisqanman jinan noqanchisqa imatapas ruwananchis. ¿Imarayku? Yanqa kausaylla kausaq runakuna ukhupin tiyashanchis. Chaymantapas paykunaqa Diospa yanapayninta maskhanankumantaqa runakunaq yachaynillantan maskhashanku. Chaywanmi runakunaq sonqonta tiyaykachiyta munanku. Noqanchisqa manapunin munasunmanchu paykuna jina kaytaqa. Chaymi tukuy atisqanchista kallpachakunanchis Diospa siminta estudiananchispaq, Diospa sonqonpaq jina genioyoq kananchispaq, Diospa pakaykuyninta maskhananchispaq ima.