Uma sacerdotenchis Jesusqa khuyapayakuqmi

1, 2. a) ¿Imapaqmi Jehová Dios wawan Jesusta kay pachaman kachamurqan? b) ¿Imakunamantan kaypi yachasunchis? (Hebreos 5:​7-9).

JEHOVÁ Diosqa yaqa 2.000 wata ñaupaqtan wawan Jesusta kay pachaman kachamurqan, chhaynapi juchamanta wañuymantawan llapa runakunata librawananchispaq, Satanaspa mana allinkuna ruwasqantapas allichananpaq (Juan 3:16; 1 Juan 3:8). Manan chayllapaqchu Jesusqa kay pachamanqa jamurqan. Kay pachaman kachamuspan Jehová Diosqa payta preparasharan uma sacerdote kaspaqa aswan khuyapayakuq kananpaq. Jesusqa 29 watapin bautizakusqan qhepaman uma sacerdote kapurqan.a

² ¿Iman Jesusta yanaparqan kay pachapi kashaqtin allin uma sacerdote kananpaq, khuyapayakuq kananpaq? ¿Imaynatan Jesús khuyapayakuq kasqanmanta yachay yanapawasunman Diosman astawan asuykunanchispaq? ¿Imaynatan khuyapayakuq kasqanmanta yachay yanapawasunman imapiña pantasunman chaypas ama manchakuspa Diosmanta mañakunanchispaq? Chaykunamantan kaypi yachasunchis (leey Hebreos 5:​7-9).

MUNAKUSQAN WAWANTAN KAY PACHAMAN KACHAMURQAN

3, 4. ¿Imakunapin Jesús tarikurqan kay pachaman jamusqan ñaupaq watakunapi?

³ Wakinninchisqa yaqapaschá familianchiskunata amigonchiskunata saqespa juj ladoman astakurqanchis. Chayta ruwayqa sasapunichá karqan. Chaytan señorninchis Jesuspas ruwarqan. Bibliapi nisqan jina payqa janaq pachapin taytanwan kuska tiyasharqan. Chaypiqa juj angelkunamantapas aswan allin puestopin kasharqan. Diospa “paña ladonpin” payqa tukuy sonqowan Diosta servisharan. Diospas paytaqa anchatan munakuq (Sal. 16:11; Prov. 8:30). Chhaynaña karqan chaypas, chaykunata saqespan payqa kay pachaman jamurqan. Kay pachapin juchasapa runakuna ukhupi tiyarqan. Chayta ruwayqa manachá facilchu paypaqqa karqan, ichaqa gustowanmi chayta ruwarqan (Filip. 2:7).

⁴ Kay pachaman jamusqan ñaupaq watakunapiqa imaymanapin Jesusqa tarikurqan. Bibliapi willasqan jina, Jesusqa wajcha familiapin nacerqan. Chaymi paypa tayta-mamanqa nacesqan qhepatapas iskay malqo palomachakunallata Diosman sacrificiopi jaywarqanku (Lev. 12:8; Luc. 2:24). Chaymantapas rey Herodesmi paytaqa wañuchiyta munarqan. Chayta yacharuspan papanwan mamitanwanqa Egipto llaqtaman apapurqanku, chaypin pakakuspa unayta tiyamurqanku (Mat. 2:​13, 15). Chhaynakunapi tarikuyqa may sasapunichá karqan. Janaq pachapi kausasqanmantaqa jujniraymi karqan.

5. ¿Imakunatan Jesús rikurqan kay pachapi kashaspa? ¿Imaynatan chay yanaparqan khuyapayakuq sumaq sonqo kananpaq? (Qhaway kay parrafopaq dibujota).

⁵ Chaymantapas Jesusqa wiñasqanman jinan rikuq imaynatas runakunaqa familianku wañukapuqtin sufriqku chayta. Pay kikinpas chhayna llakipin tarikurqan. Yaqachus jina papan Joseqa pay waynachallaraq kashaqtin wañukapunman karqan. Diosmanta willaspa purishaspapas ñausa runakunata, ñuk’ukunata, lepra onqoyniyoqkunata, upakunata iman Jesusqa rikuq. Paykunataqa anchatan Jesusqa khuyapayaq (Mat. 9:​2, 6; 15:30; 20:34; Mar. 1:​40, 41; Luc. 7:13). Jesusqa janaq pachapi kashaspaqa rikumurqanchá runakunaq sufrisqantaqa, chaywanpas kay pachaman jamuspan aswan allinta rikurqan runakunaq imayna sufrisqanta ñak’arisqanta ima (Isa. 53:4). Chaymantapas pay kikinmi chhayna sasachakuykunapi tarikurqan; payqa llakikurqan, waqarqan, sayk’urqan iman. Chhaynakunapitaq tarikurqan chayqa allintan runakunataqa entiendewanchis.

JESUSQA KHUYAPAYAKUQMI

6. ¿Imatan profeta Isaías willarqan Jesusmanta? (Isaías 42:3).

⁶ Jesusqa khuyapayaqmi wajcha runakunatapas pisichasqa runakunatapas, paypin profeta Isaiaspa willasqan junt’akurqan. Bibliapin ñaupa testamento nisqapi willashan imaynas atiyniyoq runakunapas qhapaq runakunapas jatun sach’a jina kanku chayta, imaynas allinta ruruq jallp’a jina kanku chayta (Sal. 92:12; Isa. 61:3; Jer. 31:12). Chaymantapas willashanmi imaynas wajcha runakunaqa pisichasqa runakunapas q’ewisqa carrizokuna jina kanku chayta, imaynas wañunayashaq mecha jina kanku chayta (leey Isaías 42:3). Chhayna pisichasqa runakunamanta rimaspan Isaiasqa willarqan, imaynas Jesusqa chhayna runakunata munayta qhawarinan karqan chayta, imaynas paykunataqa khuyapayanan karqan chaytapas.

7, 8. ¿Imaynatan Isaiaspa willasqan profecía Jesuspi junt’akurqan?

⁷ Mateon willarqan imaynas Isaiaspa willasqan simikunaqa Jesuspi junt’akurqan chayta. Paymi nirqan: “Manan q’ewisqa carrizotapas p’akinqachu, manan wañunayashaq mechatapas wañuchinqachu”, nispa (Mat. 12:20). Chhaynapunin chayqa karqan. Jesusqa llakipi tarikuq runakunatapas, onqosqa runakunatapas, pisichasqa runakunatapas yanaparqanmi kallpacharqan iman. Juj kutinmi Jesusqa tuparqan lepra onqoyniyoq runawan. Chhayna runakunaqa manan juj runakunamanqa asuykuyta atiqkuchu. Chhaynaqa chay lepra onqoyniyoq runaqa may llakisqachá, sonqo nanasqachá kasharqan. “Manapaschá familiaywanqa tupasaqñachu” nispa imapaschá nisharqan. Jesusmi ichaqa qhaliyachipurqan payta (Luc. 5:​12, 13). Chaymantapas juj kutinmi Jesusman apamurqanku sasachakuspa rimaq roqt’u runata. Payqa manataq uyariyta atiqchu chayqa maytachá llakikuq runakunaq rimasqanta mana entiendespaqa. Ichaqa Jesusqa paytapas qhaliyachipurqanmi (Mar. 7:​32, 33). ¿Imakunatawanmi Jesús ruwanman karqan?

⁸ Ñaupa tiempopi wakin judío runakunaqa pitapas ima onqoypas jap’iqtinqa, malpas naceqtinqa “juchallikuranchá, tayta-mamanpaschá juchallikuran, chaychá chhayna kashan” niqkun (Juan 9:2). Chaymi chhayna runakunataqa pisichaqku k’amiqku ima. Jesusmi ichaqa mana chhaynachu karqan, aswanmi chhayna onqosqa runakunata qhaliyachipuq kallpachaq ima. Chhaynapin profeta Isaiaspa willasqanqa junt’akurqan. ¿Imatan chaymanta yachasunman? Jamuq parrafokunapi chaymanta rimasun.

9. Hebreos 4:​15, 16 textopi nisqaman jina, ¿imakunata ruwaspan Jesús rikuchirqan khuyapayakuq kasqanta?

⁹ (Leey Hebreos 4:​15, 16). Uma sacerdotenchis Jesusqa noqanchistapas khuyapayawanchismi. Griego rimaypi “khuyapayaq” nispaqa runamasinta sonqomanta khuyapayaq llakipayaq runamantan rimashan. Chhayna khuyapayakuq kaymantan apóstol Pablo Hebreos 10:34 textopi rimarqan. Chay tiempopi iñiqmasikunatan kallpacharqan carcelpi tarikuqkunata khuyapayanankupaq. Chhayna khuyapayakuqmi Jesuspas, chayraykun payqa milagrokunatapas ruwarqan. Jesusqa sonqomantapunin runakunataqa munakuq, manan obligasqachu imatapas ruwaq. Lepra onqoyniyoq runata qhaliyachisqanpi piensasun. Jesusqa atinmanmi karqan karullamanta chay runata qhaliyachipuyta. Ichaqa manan chaytachu ruwarqan, aswanmi payman qayllaykuspa llamiykurqan. Chay kutikamaqa askha watañapaschá paytaqa mana pipas llamiykurqanchu. Jesusmi ichaqa munakuywan payta llamiykurqan. Roqt’u runata qhaliyachisqanpi piensallasuntaq. Jesusqa atinmanmi karqan runakunaq ñaupallanpi qhaliyachiyta. Ichaqa manan chaytachu ruwarqan, aswanmi juj ladoman pusaspa sapallanpi payta qhaliyachipurqan. Juchapi puriq warmita juj fariseo runa millayta qhawaykuqtinpas Jesusqa sayapakurqanmi chay warmiman. Chay warmiqa arrepientesqan Jesuspa chakinta maqchirqan jinaspa chujchanwan ch’akichirqan (Mat. 8:3; Mar. 7:33; Luc. 7:44). Rikusqanchis jina Jesusqa manan pisichaqchu onqosqa runakunataqa ni juchapakuq runakunatapas. Aswanmi paykunataqa khuyapayaq, sumaqtan chaskiqpas. Chhaynaqa, ¿manachu Jesusqa noqanchistapas chhaynata khuyapayawasunman?

UMA SACERDOTENCHISPA EJEMPLONTA QATIKUSUN

10. ¿Ima yanapaykunan kashan roqt’u runakunata ñausa runakunatapas yachachinapaq? (Qhaway kay parrafopaq fotokunata).

¹⁰ Noqanchispas Jesús jinan kananchis, pay jinan runamasinchista munakunanchis khuyapayananchis ima (1 Ped. 2:21; 3:8). Manaña Jesús jinachu milagrota ruwaspa roqt’ukunata ñausakunata qhaliyachisun chaypas, atisunmanmi paykunaman Jehová Diosmanta willayta, chhaynapi payman asuykunankupaq. Paykunata yachachinapaqqa askhan yanapaykuna kashan. Makillankuwan rimaqkunapaqqa 100 más rimaykunapin askha yanapaykuna kashan. Ñausa runakunapaqpas braille nisqa rimaykunapin qelqakuna kashan, 60 más rimaypin chayqa kashan. Kashanmi uyarinapaq videokunapas, chayqa 100 más rimaykunapin kashan. Chay yanapaykunaqa allintan yanapashan mana rikuyta atiqkunatapas jinallataq mana uyariyta atiqkunatapas. Chay yanapaykunawanmi askhaña Jehová Diosman asuykushanku.

11. ¿Imaynatan kay tiempopi Diospa llaqtan rikuchishan Jesús jina kasqanta? (Hechos 2:​5-7, 33; qhaway kay parrafopaq fotokunata).

¹¹ Kausarimpusqan qhepamanmi Jesusqa Pentecostés fiestapi llapa discipulonkunaman santo espirituta qorqan, chhaynapi chay fiestaman jamuq llapa runakunaman rimasqanku simipi Diosmanta willanankupaq (leey Hechos 2:​5-7, 33). Kay tiempopipas Diospa llaqtanpiqa 1100 más rimaykunapin askha qelqakunata ruwakushan, chhaynapi llapa clase runakuna Diosmanta yachanankupaq. Wakin simikunata pisillaña rimanku chaypas, paykunapaqpas ruwakushanmi qelqakunataqa. Chay rimaykunamanta wakinmi kashan América nisqa ladopi runakunaq rimasqan simikuna. Chay ladokunapi kaq runakunapas Diosmanta yachanankupaqmi 160 más rimaykunapi qelqakunata orqokamushan. Rumaní nisqa simipipas qelqakunataqa orqokamushanmi. Chay rumaní nisqa rimay askha claseña chaypas 20 más rimaykunapin qelqakunataqa orqokamushan. Chay qelqakunaq yanapayninwanmi askha runakuna Diosmanta yachashanku.

12. ¿Imatawanmi Diospa llaqtanpi ruwakushan?

¹² Chaymantapas Diospa llaqtanpiqa imaymana desgraciaq pasasqanraykun, sasachakuypi llakikuypi tarikuq hermanokunata runakunata ima yanapakushan. Askha hermanokunan chay ruwaypiqa yanapakushanku. Chaymantapas Diospa llaqtanpiqa askhan juñunakuna wasikunapas ruwakushan, chaypin iñiqkunaqa Diosmanta yachanku.

UMA SACERDOTENCHISQA SAPANKANCHISTAN YANAPAWANCHIS

13. ¿Imaynatan wiraqochanchis Jesús yanapawanchis?

¹³ Jesusqa allin michiqninchismi, payqa imaymanatan ruwashan iñiypi fuerte kananchispaq (Juan 10:14; Efes. 4:7). Ichaqa mayninqa imaymana sasachakuypi llakipi ima tarikuspan q’ewisqa carrizo jina kashasunman, otaq wañunayashaq mecha jina kashasunman. Yaqapaschá sinchi onqosqa kashanchis, imapipaschá juchapakuranchis, juj hermanowan imapaschá ofiendenakurqanchis. Chaykunaraykun mayninqa llakisqa sonqo nanasqa ima kashasunman. Chhaynapi tarikuspaqa faciltan Diospa promesantapas qonqapusunman. Ichaqa kaytan yuyarinanchis: Jesusqa allintan yachan imaynas kashanchis imakunapis tarikushanchis chayta, payqa khuyapayawanchismi. Chaymantapas payqa Diospa espiritunwanmi yanapawanchis, kallpatan qowanchis (Juan 16:7; Tito 3:6). Chaymantapas umalliqkunawan juj hermanokunawan iman yanapachiwanchis (Efes. 4:8).

14. ¿Imatan yuyarinanchis sinchi llakisqa tarikuspa?

¹⁴ Sichus llakisqa, sonqo nanasqa, pisi kallpa ima kashanchis chayqa uma sacerdotenchis Jesustan yuyarinanchis. Yachamusqanchis jina Jehová Diosqa manan juchanchiskunarayku wañunallanpaqchu paytaqa kachamurqan. Aswanpas imaynas runakuna kanchis, ima sasachakuykunapis tarikunchis chaykunata rikunanpaq iman kachamurqan. Chhaynaqa payqa allintan yachan imapis sapankanchispas tarikushanchis chayta. Chaymi imamantapas llakisqa kashanchis, juchanchismanta ima sonqo nanasqa kashanchis chayqa, yanapayta necesitasqanchis ratu payqa yanapawanchis (Heb. 4:​15, 16).

15. ¿Imaynatan hermano Stefanota yanapakurqan Diospa llaqtanman kutimpunanpaq?

¹⁵ Jesusqa imaymanatan ruwashan Diosmanta t’aqakuq runakuna Diosman kutimpunankupaqpas (Mat. 18:​12, 13). Chaypaq yachasun Stefano hermanonchismanta.b Payqa Diospa llaqtanmantas t’aqasqa kasqa, chunka iskayniyoq wata qhepatas ichaqa juj juñunakuyman risqa. Paymi nin: “Unaymantataq juñunakuyman risharani chayqa manchasqa, p’enqasqa iman kasharani. Ichaqa munasharqanin Diospa llaqtanman kutimpuyta. Noqawan juñukuq umalliqkunaqa munaytan chaskiwarqanku, kallpachawarqanku iman. Mayninqa “imaynapitaq Diostari saqerani, yanqañasuna kaytaqa ruwashani, jina imapas kachun” niqmi kani. Umalliqkunan ichaqa munayta yanapawarqanku ama pisipanaypaq. Diospa llaqtanman kutimpuqtiyqa sumaqtan hermanokunaqa noqatapas familiaytapas chaskiwarqanku. Tiempowanqa esposaypas estudiarqanmi Bibliata. Kunanqa llapaykun juj nisqalla Jehová Diosta servishayku”, nispa. Ancha munakuq uma sacerdotenchis Jesusqa may kusisqachá kashan Diospa llaqtanman kutimpuq hermanokunata rikuspaqa.

16. ¿Imaraykun nisunman “may kusikunapaqmi uma sacerdotenchis Jesús khuyapayakuq kasqanta yachayqa” nispa?

¹⁶ Kaypi yachasqanchis jina uma sacerdotenchis Jesusqa may khuyapayakuqmi. Chhayna khuyapayakuq kasqanraykun kay pachapi kashaspaqa imaymanamanta runakunata yanaparqan. Chhayna khuyapayakuq kasqanraykun kunanpas payqa munayta yanapawanchis. Jamuq tiempopipas payqa yanapawashallasunmi. Mana juchayoq ch’uyaman kutinanchiskaman payqa munayta yanapawasun. May kusikunapaqmi Jehová Dios wawan Jesusta uma sacerdote kananpaq churasqanqa ¿riki?