“Ajllakuychis mayqen diostan” servinkichis

1. ¿Imatan ruwananchis cheqaq kusisqa kananchispaq? (Isaías 48:​17, 18).

KAMAQNINCHIS Jehová Diosqa munakuwanchismi. Payqa kunanpas jamuq tiempopipas kusisqa kausananchistan munan (Ecl. 3:​12, 13). Chaymi payqa imaymana yachaqta kamawarqanchis. Ichaqa manan noqanchispura gobiernanakunanchispaqchu kamawarqanchis, manan noqallanchismanta allin kaqta mana allin kaqta ajllakunanchispaq jinapaschu kamawarqanchis (Ecl. 8:9; Jer. 10:23). Chaymi cheqaqtapuni kusisqa kausananchispaqqa payta kasukunanchis, paypa munaynintan ruwananchis (leey Isaías 48:​17, 18).

2. a) ¿Imayna piensananchistan Satanás munan? b) ¿Imatan Jehová Dios ruwarqan chay yanqa kasqanta rikuchinanpaq?

² Satanasqa munan runakunapura gobiernanakuspa, Jehová Diostapas mana servispa kusisqa kananchispaq piensananchistan (Gén. 3:​4, 5). Chay cheqaqchus manachus chayta yachakunanpaqmi Jehová Diosqa jinallata qhawarqan runakuna paykunapura gobiernanakunankuta. Ichaqa rikusqanchis jinapas, manan runakunaqa noqanchispura kamachinakunanchispaq jinachu kanchis, fracasomanmi runaq gobiernasqanqa jaykupun. Jehová Diosta kasukuq runakunan ichaqa kusisqa kausanku. Bibliapiqa askhamantan willashan, paykunamanta jujninmi karqan Jesús. Kaypin yachasunchis imaraykus Jesusqa Jehová Diosta servinanpaq ajllakurqan chayta. Chaymantataq yachasunchis imaraykus Jehová Diosqa servinanchispaq jinapuni chayta. Chay qhepamantaq yachasunchis imaraykus Jehová Diosta servinanchispaq ajllakunanchis chayta.

¿IMARAYKUN JESÚS JEHOVÁ DIOSTA AJLLAKURQAN?

3. ¿Imatan Satanás Jesusman munachirqan? Ichaqa, ¿imatan Jesusqa ruwarqan?

³ Jesús kay pachapi kashaspaqa ajllakunanmi karqan pitas servinqa otaq adoranqa chayta. ¿Imaraykun chayta ninchis? Bautizakusqan qhepallamanmi Satanasqa kay pacha gobiernokunata munachirqan. Jinaspa nirqan: “Qonqorikuspachus juj kutillata adorawanki chayqa, llapan kaykunatan qopusayki”, nispa. Jesusmi ichaqa nirqan: “¡Ripuy kaymanta, Satanás! Qelqasqan kashan: Jehová Diosniykitan adoranki, pay sapallantataqmi servinkipas”, nispa (Mat. 4:​8-10). ¿Imaraykun Jesús chayta ninman karqan? Wakinmanta kaypi yachasunchis.

4, 5. ¿Imakunan razón karqan Jesús Jehová Diosta ajllakunanpaq?

⁴ ¿Imaraykun Jesús Jehová Diosta ajllakurqan? Payta tukuy sonqowan munakusqanraykun (Juan 14:31). Jinaspapas payqa yacharqanmi chaytapuni ruwana kasqanta (Juan 8:​28, 29; Apo. 4:11). Payqa yacharqanmi Jehová Diosqa kamaqninchis kasqanta, munakuq, qoykukuq, confianapaq jina kasqanta (Sal. 33:4; 36:9; Sant. 1:17). Chaymantapas Jehová Diosqa sut’illantapunin Jesusmanqa imatapas willaq. Imayoqña karqan chaypas Papanpa qosqanmi chayqa karqan (Juan 1:14). Satanasmi ichaqa mana chhaynachu karqan, aswanmi paypa kausanpi runakuna wañusharqanku. Chaymantapas payqa llulla envidioso iman karqan, payllapin piensaqpas (Juan 8:44). Chhaynaqa, Jesusqa allintan reqsirqan Jehová Diostapas Satanastapas. Manataqmi piensallarqanpaschu Jehová Dios contra churakuytaqa, ni Satanás jina kaytapas (Filip. 2:​5-8).

⁵ ¿Imaraykupiwanmi Jesús Jehová Diosta ajllakunman karqan? Payqa yacharqanmi Diosta kasukuqtin imaymana allinkuna kananta (Heb. 12:2). Chaymantapas yacharqanmi Diosta tukuy sonqo adoraqtinqa chay Diosninpa sutin ch’uyanchasqa kananta, Satanaspa rijurichisqan ñak’ariytapas ch’usaqman tukuchinanta.

¿IMARAYKUN JEHOVÁ DIOSLLATA ADORANANCHIS?

6, 7. ¿Imaraykun yaqa llapa runakuna mana Diostachu adoranku? Ichaqa, ¿imaraykun Jehová Dioslla adorasqa yupaychasqa kanan?

⁶ Kay tiempo runakunaqa manan Jehová Diosta reqsinkuchu. Manan yachankuchu imaynapunis pay chayta, imakunatas noqanchisrayku ruwarqan chaytapas. Ñaupa tiempopi Atenas llaqtapi runakunapas chhaynan karqanku, chaymi Pabloqa paykunaman Diosmanta willarqan (Hech. 17:​19, 20, 30, 34).

⁷ Pabloqa cheqaq Diosmanta willaspan paykunata nirqan: “[Paymi runakunaman] qon kausayta, samayta, tukuy imaymanatawan”, nispa. Chaymantapas willarqanmi imaynas payrayku “kausanchis, purinchis, kaypipas kashanchis” chayta. Willarqanmi imaynas “juj runallamanta llapa runakunata ruwarqan” chaytapas. Chhaynaqa, paytaq kamaqninchis chayqa, payllan adorasqapas yupaychasqapas kanan (Hech. 17:​25, 26, 28).

8. ¿Imatan Jehová Dios mana jayk’aqpas ruwanmanchu?

⁸ Jehová Diosqa kamaqninchistaq tukuy munayniyoq Diostaq chayqa, atinmanmi llapa runakuna payta servinankupaq obligayta. Ichaqa manan jayk’aqpas payqa chaytaqa ruwanmanchu. Aswanmi payqa munan runakuna paykunallamanta payta servinankuta. Llapa runakuna salvasqa kanankuta iman munan (1 Tim. 2:​3, 4). Chaypaqmi payqa imaymanata kamarqan chayta rikuspa cheqaqpuni kasqanta yachananchispaq, mayta munakuwasqanchista rikunanchispaq ima. Chaymantapas payta serviq runakunatan yachachiwanchis juj runakunaman paymanta willananchispaq. Imakunatas ruwanqa, imaynatas ruwanqa chaykunata willamunanchispaq (Mat. 10:​11-13; 28:​19, 20). Chaymantapas llaqtanpiqa askha iñiq t’aqakunan kan, sapankamanmi Diosqa churan umalliqkunata. Chay umalliqkunataq munakuywan llaqtanta michinku (Hech. 20:28).

9. ¿Imaynatan Jehová Dios rikuchirqan runakuna munakusqanta?

⁹ Wakin runakuna manaña paypi creenkuchu chaypas, Jehová Diosqa munaytan paykunata qhawarin. Arí, yaqa llapa runakunaña munayninkuman jinalla purishanku chaypas, Jehová Diosqa llapa imachus necesitasqankutan paykunaman qon. Chaywanmi rikuchin may sumaq sonqo kasqanta (Mat. 5:​44, 45; Hech. 14:​16, 17). Chaymantapas Jehová Diospa munayninpin runakunaqa familiayoq, amigokunayoq kanku. Paypa munayninpin llank’asqankumantapas imaymana allinkunata chaskinku (Sal. 127:3; Ecl. 2:24). Rikusqanchis jina, kamaqninchis Jehová Diosqa llapa runakunatan munakun (Éx. 34:6). Ichaqa, ¿imakunan razón karqan noqanchis payta ajllakunanchispaq? Chaymanta qatiqpi yachasunchis.

¿IMARAYKUN JEHOVÁ DIOSTA SERVISHANKI?

10. a) ¿Imaraykun Jehová Diosta servishanchis? (Mateo 22:37). b) ¿Imaynatan yanaparqasunki Diospa pacienciakuq kasqan? (Salmos 103:​13, 14).

¹⁰ Noqanchisqa Jehová Diostaqa servishanchis payta tukuy sonqo munakusqanchisraykun ¿riki? Jesús jinan noqanchisqa payta munakunchis (leey Mateo 22:37). Payta astawan reqsisun chayqa astawanmi munakusunchis. Yachasqanchis jinapas Diosninchis Jehová Diosqa may pacienciakuq Diosmi. Runakunaña paymanta t’aqakunku chaypas, munakuywanmi kutichimun. Israel runakunatapas “ama jinachu kaychis, mana allin ñanta saqepuychis” nirqanmi (Jer. 18:11). Chaymantapas payqa yuyarillanpunin noqanchisqa jallp’amanta ruwasqa kasqanchista (leey Salmos 103:​13, 14). Diosninchis chhayna kasqanpi piensaqtinchis, ¿manachu astawanraq sonqonchis tanqawanchis payta astawan munakunanchispaq?

11. ¿Imakunan razón kallantaq Jehová Diosllata servinanchispaq?

¹¹ ¿Imaraykupiwanmi Jehová Diosta servishanchis? Chaytapuni ruwana kasqanraykun ¿riki? Manan payta jinaqa pitapas tarisunmanchu (Mat. 4:10). Chaymantapas payllata serviqtinchisqa sutin jatunchasqa kananpaqmi yanapakushanchis. Chaywanmi rikuchishanchis Satanás llulla kasqantapas. Chhaynapitaq kamaqninchis Jehová Diospa sonqonta kusichishanchis. Kunanmantapachachus Jehová Diosllata adorasun chayqa, payllawanmi wiñay-wiñaypaqpas kasunchis (Juan 17:3).

12, 13. ¿Imatan yachasunman Janemanta Pamelamantawan?

¹² Wakinqa juch’uymantapachan Jehová Diosta servirqanku. Imaña pasaqtinpas manapunin chay munakuyninkuqa chiriyarqanchu. Chaypaq yachasunchis Janemanta Pamelamantawan.a Paykunaqa Bibliata estudiayta qallarishaspaqa jujninqa 10 watanpis kashasqa, jujnintaq 11 watanpi. Papankumanta permisota mañakuspas Testigokunawan Biblia estudiayta qallarisqaku. Ichaqa tayta-mamankuq religionninmanpas rinallankus kasqa. Janen willakun: “Testigokunawan Bibliata estudiasqaymi yanapawarqan compañeroykunata ama kasunaypaq, ama droga cosaskunamanpas ni qhelli ruwaykunamanpas jaykunaypaq”, nispa.

¹³ Adolescente kashaspas paykunaqa Diosmanta willayta qallarisqaku. Qhepamantaq bautizakuspa precursora kapusqaku. Chay tiempoqa papankuta mamitankuta imas cuidananku kasqa, paykunaqa ñas kuraqkunaña kapusqaku. Chay tiemponkuta yuyarispan Jane nin: “Allintan yachani imaynas Jehová Diosqa amigonkunataqa cuidallanpuni chayta. 2 Timoteo 2:19 textopi nisqan jina, Jehová Diosqa reqsinmi paypaq kaqkunataqa”, nispa. Chhaynapunin chayqa, Jehová Diosqa payta serviqkunataqa yanapanpunin.

14. ¿Imaynatan rikuchisunman Jehová Diosman sayapakusqanchista? (Qhaway kay parrafopaq fotokunata).

¹⁴ Llapanchispas munasunmanmi Jehová Diospa sutin ch’uyapaq jap’isqa kanantaqa ¿riki? Chaypaq kaypi piensasun: Juj amigoykis kanman may sumaq sonqo, munakuq, khuyapayakuq runa. Juj p’unchaysi uyariwaq paymanta rimaqta; “millaymi, llullan” nispas nishankuman. ¿Imatan ruwawaq chayta uyarispa? ¿Manachu paypa favorninpi rimayta qallariwaq? Chaytan ruwawaq ¿riki? Jehová Dioswanpas chaytan ruwananchis, pipas yanqata imatapas paymanta rimaqtinqa paypa favorninpin rimananchis. Pichus pay, imaynapunichus chaytan sut’inta willananchis (Sal. 34:1; Isa. 43:10). Siminchiswan imachus ruwasqanchiswan iman rikuchinanchis payta munakusqanchista.

15. ¿Imatan apóstol Pablo chaskirqan Jehová Diosta servinanpaq imaymana saqesqanmanta? (Filipenses 3:​7, 8).

¹⁵ Jehová Diosta astawan servinapaqqa yaqapaschá imatapas saqenanchis kanqa, imatapaschá cambiananchis kanqa. Chhayna kaqtinqa ruwananchismi chayta. Chaytan apóstol Pablopas ruwarqan. Payqa imaymanatan saqerqan, chhaynapi Jesusta qatikuspa Diospa munayninta ruwananpaq (Gál. 1:14). Chayta ruwaspan payqa kusisqa kausarqan, chaymantapas janaq pachamanta Cristowan kuska gobiernamunanpaqmi ajllasqa karqan. Apóstol Pabloqa manan jayk’aqpas imachus saqesqanmantaqa pesapakurqanchu ni llakikurqanchu, noqanchispas pay jinan kananchis (leey Filipenses 3:​7, 8).

16. ¿Imatan yachasunman hermananchis Juliamanta? (Qhaway kay parrafopaq fotokunata).

¹⁶ Jehová Dios serviyman kallpanchista yuyayninchista ima churasun chayqa, kusisqan kasunchis. Imaymana bendiciontan chaskisunchis kunanpas jamuq tiempopipas. Chaypaq yachasunchis Julia sutiyoq hermanamanta. Payqa juch’uyllaraq kashaspaqa iglesianpis takiq kasqa. Chaytas juj allin takiq señora rikurusqa, jinaspas yachachisqa paypas allin takiq kananpaq. Qhepamanqa allin reqsisqas kapusqa, jatun conciertokunapis takiqpas. Chay qhepamansi payqa takiqkunapaq allin escuelaman jaykusqa. Chaypis jujnin compañeron willasqa Diosmanta. Willasqas imaynas paypa sutinqa “Jehová” chayta. Chay qhepamansi payqa Biblia estudiayta qallaripusqa, iskay kutitas semanapi estudiasqa. Tiempowanqa Jehová Dios serviymansi tukuy yuyayninta churapusqa, manas takimanñachu. Chay ruwayqa manas facilchu paypaqqa kasqa. Paymi nin: “Wakinmi niwaqku, ¿imatan chayta ruwashanki? Yanqatan tiempoykita usuchishanki, nispa. Noqan ichaqa Jehová Diosllata serviyta munarani”, nispa. Takita saqepusqanmantaqa 30 wata masñan pasarun. ¿Imaninmanmi pay chay ruwasqanmanta? “Kusisqan kashani Jehová Diosta ajllakusqaymanta. Noqaqa allintan yachani imaynas jamuq tiempopiqa Jehová Diosqa sonqoypa llapa munasqanta qowanqa chayta”, nispan nin (Sal. 145:16).

JEHOVÁ DIOSLLATAPUNI SERVIY

17. Ñataq tukukuy p’unchaykunapiña kashanchis chayqa, ¿imatan ruwananku manaraq Diospa partenmanta kaqkuna, imatataqmi ruwananchis Diospa partenmanta kaqkuna?

¹⁷ Yachasqanchis jina, noqanchisqa tukukuy p’unchaykunapiñan kausashanchis. Chaymanta rimaspan apóstol Pablo nirqan: “Juj chhikantawan” suyasunchis, “pichus jamushan chayqa tiempollanpipunin chayamunqa”, nispa (Heb. 10:37). Manañataq nishuñachu faltashan Diospa p’unchaynin chayamunanpaq chayqa, manan nishuñachu tiempo kashan runakuna Diospa partenmanta churakunankupaqqa (1 Cor. 7:29). Ichaqa ñachus servishanchisña Jehová Diosta ¿chayri? Chayqa allinmi. Diosta servisqanchis tiempopi imaymana sasachakuypiña tarikusun chaypas, chayqa juj tiempollapaqmi kanqa.

18. ¿Imata ruwananchistan munanku Jehová Diospas Jesuspas?

¹⁸ Jesusqa llapa runakunatan kallpacharqan payta qatikushanallankupaq (Mat. 16:24). Chhaynaqa, unayña Jehová Diosta servishanchis chaypas, mana sayk’uspan paytaqa servishanallanchis. Manaña chayta ruway facilchu chaypas, Diosta servinanchispaq kallpachakushallasun chayqa imaymana bendiciontan chaskisunchis, kusisqan kausasunpas (Sal. 35:27).

19. ¿Imatan yachasunman Gilbertomanta?

¹⁹ Wakinmi piensanku Diosta servispa imaymanata pierdekunankupaq. Waynallaraq sipasllaraq kashanki chayqa, yaqapaschá qanpas nishanki: “Diosta servispaqa manañachá ima munasqaytapas ruwasaqñachu”, nispa. Chaymi pasasqa Gilberto sutiyoq waynawanpas. Paymi nin: “Noqaqa piensarqani Jehová Diospa testigonkuna imaymanata prohibinankupaqmi. “Reqsisqay waynakunaqa fiestakunallapimá kashanku, enamoradayoq imamá purikushanku. Comunllatan wañuchinakuymanta videojuegotapas pujllakunku. Noqataq ichaqa juñunakuyllapi predicayllapi kashani” nispan piensaq kani”, nispa. ¿Allinchu kanman karqan Gilbertoq chhayna piensasqan? Paymi nillantaq: “Chhaynata piensasqayraykun mana allin ñanman jaykurqani. Jehová Diostaña servisharqani chaypas, mayninqa mana allin ruwaykunatan ruwasharqani. Chaykunataña ruwasharqani chaypas, manan kusisqachu kasharqani. Chaymi piensayta qallarirqani imaynapis chhaynapi tarikusharqani chaypi. Bibliapi imachus yachasqaykunatan yuyarirqani, imaynas chayta kasukuyqa allinpuni chaykunapin piensayta qallarirqani. Jinan jujmanta kallpachakurqani Jehová Diosta tukuy sonqoywan servinaypaq. Chaymantapas sut’itan repararqani imaynas chaymantapachaqa Jehová Diospas mañakusqaytaqa uyarimuwaqpuni chayta”, nispa.

20. ¿Imata ruwananchispaqmi tukuy atisqanchista kallpachakunanchis?

²⁰ Salmos takita qelqaq runan Jehová Diosta nirqan: “May kusisqan ajllakusqayki runaqa, may kusisqan patioykipi tiyananpaq pusamusqayki runaqa”, nispa (Sal. 65:4). Chhaynapunin chayqa, Jehová Diospa partenmanta kayqa manan imawanpas igualakunmanchu. Chhaynaqa, Josué jina noqanchispas nisun: “Noqawan wasiypi kaqkunapiwanqa Jehová Diosllatan servisaqku”, nispa (Jos. 24:15).