¿Imatawanñan suyanki bautizakunaykipaq?

1. ¿Imakunan razón kashan bautizakunapaq?

YACHASQANCHIS jina Jehová Dios kaqtinmi mijuypas tukuy ima allinkunapas kan; paymi kausaytapas qowarqanchis. Chhaynataq chayqa munakunkichá paytaqa. Maytachá munashanki chay munakusqaykita rikuchiytapas. ¿Imatan chaypaq ruwawaq? Chaytaqa rikuchiwaq bautizakuspan. Bautizakunki chayqa Diospa familianmantan kapunki, paypa brazonmanmi jaykunki. Payman entregakunki chayqa payqa qhawarisunkin cuidasunkin (Sal. 73:24; Isa. 43:​1, 2). Manan chayllapaschu, Diosman entregakuspa bautizakunki chayqa, wiñay kausaytan chaskinki (1 Ped. 3:21).

2. ¿Imamantan kaypi yachasunchis?

² Ichaqa imapaschá jark’ashasunki bautizakunaykita. Chhaynapi tarikushanki chayqa ama llakikuychu, manan qanllachu chhaynapi kashanki. Qanmanta ñaupaqta bautizakuqkunapas imaymanapin tarikurqanku, imaymanatan cambiananku karqan bautizakunankupaq. Kunanqa may kusisqan Jehová Diosta servishanku. Kaypin rimasunchis apostolkunaq tiemponpi bautizakuq runakunamanta. Yachasunmi imaraykus paykunapaq sasa karqan bautizakuy, imas yanaparqan bautizakunankupaq chayta. Waynaña kuraqña kanki chaypas, allinta piensay imaynatas paykunaq ejemplon yanapasunkiman chaypi.

SAMARIA RUNAKUNAQ BAUTIZAKUSQAN

3. ¿Ima sasachakuykunatan Samaria runakuna atipananku karqan bautizakunankupaq?

³ Jesuspa tiemponpiqa Samaria runakunaqa juj religionniyoqmi karqanku. Paykunaqa ñaupaq tiempopiqa Siquem, Samaria llaqtakunaq qayllanpin tiyarqanku. Chayqa Judeaq wichay ladonpin kasharqan. Paykunaqa Bibliapi qallariypi kaq pisqa librokunallapin creerqanku. Chaykunan kashan Genesismanta Deuteronomio librokama. Yaqapaschá Josué libropipas creerqanku. Chaymi bautizakunankupaqqa Bibliapi llapa librokunata allinta reqsinanku karqan. Ichaqa allintan yacharqanku Deuteronomio 18:​18, 19 textopi Diospa promesanta. Chaymi paykunapas Mesiaspa chayamunanta suyakusharqanku (Juan 4:25). Chhaynaqa bautizakunankupaqqa, Jesús prometesqa Mesías kasqanpin iñinanku karqan. Chaytan ruwarqanku askha Samaria runakuna (Juan 4:39). Chaypaqqa yaqapaschá wakinninkuqa anchata kallpachakunanku karqan amaña judío runakunata cheqnikunankupaq (Luc. 9:​52-54).

4. Hechos 8:​5, 6, 14 textopi nisqanman jina, ¿imatan wakin Samaria runakuna ruwarqanku Felipe paykunaman allin willakuykunata willaqtin?

⁴ ¿Iman yanaparqan Samaria runakunata bautizakunankupaq? Allin willakuykunata willaq Felipe paykunaman Cristomanta willaqtinmi paykunamanta askha Diospa siminta chaskikurqanku (leey Hechos 8:​5, 6, 14). Felipe judío runaña karqan chaypas, Samaria runakunaqa paytaqa uyarirqankun. Yaqapaschá yuyarirqanku Diosqa “manan pimanpas sayapakunchu” nisqa textota (Deut. 10:​17-19). Imaynaña kaqtinpas tukuy yuyaywanmi Cristomanta Felipeq rimasqanta uyarikurqanku. Chaymantapas Felipeqa askha milagrokunatan ruwarqan, onqosqakunatan qhaliyachirqan, millay espiritukunatapas qarqorqanmi. Chaykunata rikuspachá Samaria runakunaqa repararqanku Felipetaqa Dios kachamusqanta (Hech. 8:7).

5. ¿Imaynatan yanapasunkiman Samaria runakunamanta yachasqayki?

⁵ Samaria runakunaqa manataq judío runakunawan allintachu apanakuqku chayqa, manataq Bibliatapas allintachu reqsirqanku chayqa, manapaschá munankumanchu karqan Cristiano jina bautizakuytaqa, ichaqa manan chayqa pasarqanchu. Paykunamanta willaspan Bibliapi nin: “Diospa gobiernonmanta Jesucristoq sutinmantawan allin willakuykunata Felipe willaqtinmi ichaqa chaypi iñipurqanku, jinaspa qharikunapas warmikunapas bautizakapurqanku”, nispa (Hech. 8:12). Paykunaqa allintan yacharqanku imaynas Felipeq yachachisqanqa cheqaq kasharqan chayta, chaymi usqhaylla bautizakapurqanku. ¿Imaniwaqmi personaykimanta? ¿Cheqaqpunichu qanpaq Diospa palabran? Rikusqaykiman jina, ¿Jehová Diospa testigonkuna kallpachakunkuchu Jesuspa nisqanman jina munanakunankupaq? (Juan 13:35). Chhayna chayqa amaña iskayaychu bautizakunaykimanta. Jehová Diosqa bendecisunkipunin chayta ruwanki chayqa.

6. ¿Imatan yachasunman hermanonchis Rubenmanta?

⁶ Ruben hermanonchismanta yachasun, payqa Alemania nacionmantan. Testigo familiapis payqa uywasqa kasqa, ichaqa waynallaraq kashaspas Diosmanta iskayasqa. ¿Iman payta yanaparqan amaña iskayananpaq? Payqa reparakusqas astawan Diosmanta yachanan kasqanta. Chaysi tukuy atisqanta kallpachakusqa estudiananpaq. Paymi nin: “Manan jinalla kayta munarqanichu, chaymi sapallaypi estudiarqani. Askha kutitan evolución nisqamanta estudiarqani”, nispa. ¿Existe un Creador que se interese por nosotros?, nisqa librotas leesqa. Chaysi iñiyninpi mayta yanapasqa. Paymi nillantaq: “Chay librota leespan niq kani: Jehová Diosqa cheqaqpunin kasqa, nispay”, nispa. Chaymantapas Oficina Central nisqatas visitaq risqa. Chaypis pachantinpi Diosta serviqkuna juj nisqalla servisqankuta rikusqa. Chaysi mayta payqa admirakusqa. Alemania nacionman kutipuspataqsi 17 watanpi kashaspa bautizakapusqa. Chhaynaqa Bibliapi yachasqaykimanta imamantapas iskayashanki chayqa, qelqanchiskunapi astawan t’aqwiriy chaymanta. Cheqaq kaqta yachayqa yanapasunkin amaña iskayanaykipaq (Efes. 4:​13, 14). Imaynas pachantinpi hermanokuna allinta munanakunku, imaynas Diostapas kuska servinku chayta yachanki chayqa, astawanmi paypa llaqtanman jaykuyta munanki. Iñiq t’aqaykipipas chayta reparanki chayqa chay llaqtapipunin kayta munanki.

SAULOQ BAUTIZAKUSQAN

7. ¿Imakunapin Saulo cambianan karqan?

⁷ Tarso llaqtayoq Saulomanta rimasun. Payqa judío runan karqan, tukuy sonqotaqmi religionninpi kaq yachachikuypi iñiq. Allinpunin kasharqan religionninpi ñauparinanpaqpas (Gál. 1:​13, 14; Filip. 3:5). Chay tiempopiqa judío runakunaqa Diosmanta t’aqakuq apóstata runakunata jinan Jesusta qatikuqkunata qhawariqku. Chayraykun Saulopas sinchita chay iñiqkunata qatikachaq. Payqa chayta ruwaspa Diospa munayninta ruwananpaqmi piensakurqan (Hech. 8:3; 9:​1, 2; 26:​9-11). Jesuspi iñispa bautizakuqtinqa paypas qatikachasqan kanallantaq karqan.

8. a) ¿Iman Saulota yanaparqan bautizakunanpaq? b) Hechos 22:​12-16 textopi nisqanman jina, ¿imaynatan Ananías yanaparqan Saulota? (Qhaway kay parrafopaq dibujota).

⁸ ¿Iman Saulota yanaparqan bautizakunanpaq? Juj kutinmi cielomantapacha Jesús payta rimaykurqan. Chaywanmi paypa ñawinqa ñausayapurqan (Hech. 9:​3-9). Chay qhepamanqa kinsa p’unchaymi payqa mana imatapas mijurqanchu. Payqa yaqapaschá piensasharqan imakunachus payta pasarqan chaypi. Piensarqanchá imaynas Jesusqa prometesqa Mesías karqan chaypipas, imaynas Jesusta qatikuqkunaqa cheqaq religión karqanku chaypipas (Hech. 22:20). Maytachá pesapakurqan Estebanta wañuchinankupaq yanapakusqanmantapas. Chay kinsa p’unchay qhepatan Ananías sutiyoq hermano Saulowan rimaq rirqan. Payqa munaytan rimapayarqan Saulotaqa, ñawintapas kicharipurqanmi, kallpacharqanmi bautizakunanpaqpas (leey Hechos 22:​12-16). Sauloqa humilde sonqowanmi uyarikurqan Ananiaspa imachus nisqanta, paypa yuyaychasqanman jinataqmi ruwarqanpas (Hech. 9:​17, 18).

9. ¿Imakunatan yachasunman Saulomanta?

⁹ Saulomantaqa imaymanatan yachasunman. Payqa yaqapaschá jatunchakuywan manchakuywan ima apachikuspa mana bautizakuyta munanmanchu karqan. Ichaqa manan chaytachu ruwarqan. Aswanmi Cristomanta allinta yachaspa jina humilde sonqowan imaymanapi cambiarqan (Hech. 26:​14, 19). Cristota qatikuqmanmi tukupurqan. Yacharqanña qatikachasqa kananta chaypas bautizakapurqanmi (Hech. 9:​15, 16; 20:​22, 23). Bautizakusqan qhepamanpas payqa Diosllapin confiarqan, yacharqanmi tukuy ima pruebapipas yanapananta (2 Cor. 4:​7-10). Qanpas Jehová Diospa testigon jina bautizakunki chayqa, yaqapaschá wakinqa jark’akusunkiku, cheqnikusunkiku imapaschá. Ichaqa manan sapaykichu kashanki. Jehová Diospas Jesuspas qanwan kuskan kanqaku, tukuy imapin yanapasunkiku (Filip. 4:13).

10. ¿Imatan yachasunman Annaq ejemplonmanta?

¹⁰ Anna sutiyoq hermanamanta yachasun, payqa Europa ladopin tiyan. Mamitanpa bautizakusqan qhepamansi paypas isqon watanpi kashaspa Biblia estudiayta qallarisqa. Papanmanta permisota mañakuspas chayta ruwasqa. Kay hermanaqa kurda nisqa familiamantan. Kurda nisqa runakunaq costumbrenman jinaqa, llapa familiapas kuskallan tiyanku. Annaq familiansi yacharusqa Testigokunawan Biblia estudiasqanta, jinas paypa contranpi churakapusqaku. Paykunaq nisqankuman jinaqa, manas allintachu ruwashasqa ñaupa taytankuq religionninta saqepuspaqa. 12 watanpi kashaspas Annaqa papanwan rimasqa bautizakunanpaq, jinas payqa tapusqa: “¿Qanllamantachu chayta ruwayta munashanki, icha pichu chaypaq tanqashasunki?”, nispa. Jinas payqa nisqa: “Munakunin Jehová Diosta, chaymi bautizakuyta munashani”, nispa. Jinas papanqa “bautizakullay”, nisqa. Bautizakusqan qhepamanpas Annaq familianqa burlakuqkus paymanta. Jujninsi nisqa: “Testigo kanaykimantaqa aswan allinqa kanki gustoykita ruwaspan cigarrota pitaspan”, nispa. ¿Iman Annata yanapanman karqan chaykunata aguantananpaq? Paymi nin: “Jehová Diosmi kallpata qowarqan. Papaypas mamitaypas yanapawarqankun”, nispa. Chaymantapas Annaqa imakunapis Jehová Dios yanaparqan chaymantas juj listata ruwakusqa; chaytaqa qhawallanpunis payqa. Yaqapaschá qanpas jujkunaq p’enqananta k’aminanta manchakushanki. Ichaqa ama kayta qonqaychu: Jehová Diosqa qantapas yanapasunkin (Heb. 13:6).

CORNELIOQ BAUTIZAKUSQAN

11. ¿Iman yaqapas jark’anman karqan Cornelioq bautizakunanta?

¹¹ Cornelio sutiyoq runamanta yachasun. Payqa Roma ejercitopin juj capitán karqan, pachaj soldadokunatan umalliq (Hech. 10:​1, willakuy). Chhaynataq karqan chayqa, payqa allin reqsisqachá karqan llaqtanpipas ejercitopipas. Bibliaq willasqanman jinaqa, kay runaqa yanapallaqpunis wajchakunatapas (Hech. 10:2). Paymanmi Jehová Dios apóstol Pedrota kacharqan allin willakuykunata willananpaq. ¿Imaynatan Cornelio chayta chaskikunman karqan? ¿Allin reqsisqa kasqanraykuchu qhapaq kasqanraykuchu “amaraq bautizakusaqchu” ninman karqan?

12. ¿Iman Corneliota yanaparqan bautizakunanpaq?

¹² ¿Iman Corneliota yanaparqan bautizakunanpaq? Paymanta rimaspan Bibliapi nin: “Payqa Dios sonqo runan karqan, [ . . . ] rogakullaqmi Diosmantapas”, nispa (Hech. 10:2). Chaymi Pedro willaqtin jina Cornelioqa llapa familianpiwan Cristopi iñipurqanku, kaq ratun bautizakapurqankupas (Hech. 10:​47, 48). Cornelioqa munasharqanpunichá familianwan kuska Jehová Diosta serviyta, imapiña cambianan karqan chaypas cambiarqanpunichá (Jos. 24:15; Hech. 10:​24, 33).

13. ¿Imatan yachasunman Corneliomanta?

¹³ Corneliopas Saulo jinan allin reqsisqa qhapaq familiamanta karqan. Yaqapaschá paykunaqa chaywan jark’achikunkuman karqan. Ichaqa manan chayqa pasarqanchu. ¿Imaniwaqmi personaykimanta? ¿Cambianaykichu imapipas kashan chhaynapi bautizakunaykipaq? Jehová Diosqa yanapasunkipunin chaypiqa. Paypa munayninta ruwanaykipaq kallpachakusqaykitan bendecinqa.

14. ¿Imatan yachasunman Tsuyoshi sutiyoq hermanomanta?

¹⁴ Tsuyoshi sutiyoq hermanomanta yachasun, payqa Japonmantan. Payqa bautizakunanpaqqa imaymanatas llank’ananpi cambianan kasqa. Payqa escuela Ikenobo nisqapi umalliqtas yanapaq kasqa, chaypiqa imaymanapaqsi t’ikakunata alistaqku. Chaypi umalliqqa wañuqkunata velasqankumansi apaq t’ikakunata. Chaypis budismo religionpi jina imaymana costumbrekunata ruwaq. Chay umalliq mana riyta atiqtinqa paysi rantinta riq, paysi chay costumbrekunata ruwaq. Ichaqa wañuqkuna imaynapichus tarikushanku chayta Bibliapi yachaspas payqa nisqa: “Chhayna costumbrekunapitaq participashani chayqa, manachá bautizakuytaqa atiymanchu”, nispa. Chaymantataq nisqa: “Saqepusaqchá chay llank’anata”, nispa (2 Cor. 6:​15, 16). Chay umalliqwan rimaqtinsi ichaqa payta nisqa: “Llank’allay, manañan chay costumbrekunapiqa participankichu”, nispa. Jinas payqa qhepakullasqa, yaqa juj wata Bibliata estudiashaspataq bautizakapusqa.a Personaykipas Diosta kusichinaykipaq llank’anapi imatapas cambiayta munashanki chayqa ruwallay. Jehová Diosqa manan imatapas faltachisunkichu qanmanpas ni familiaykimanpas (Sal. 127:2; Mat. 6:33).

CORINTO LLAQTAPI RUNAKUNAQ BAUTIZAKUSQAN

15. ¿Iman yaqapas jark’anman karqan Corinto llaqta runakuna bautizakunanta?

¹⁵ Ñaupa Corinto llaqtapi runakunaqa qolqe sonqo runakunan karqanku, qhelli kausaytan apaqkupas. Chay llaqtapi runakunaqa yaqa llapankupas Diospa kamachikuynin contran imatapas ruwaqku. Chhaynataq kausay karqan chayqa, manachá pipaqpas facilchu karqan Diospa siminta chaskikuyqa. Chaywanpas apóstol Pablo chay llaqtaman chayaqtinqa “allin willakuykunata uyarispan askha iñipurqanku, jinaspa bautizakapurqanku” (Hech. 18:​7-11). Manan chayllapaschu, Jesuspunin Pablota juj rijuriypi nirqan: “Kay llaqtapiqa askhan noqapi iñinqaku”, nispa. Jinan Pabloqa juj wata kuskan chay llaqtapi qhepakurqan.

16. ¿Iman Corinto llaqta runakunata yanaparqan bautizakunankupaq? (2 Corintios 10:​4, 5).

¹⁶ ¿Iman Corinto llaqta runakunata yanaparqan bautizakunankupaq? (Leey 2 Corintios 10:​4, 5). Diosqa simin qelqawan espiritunwan iman chay runakunata yanaparqan vidankuta cambianankupaq (Heb. 4:12). Arí, Diospa siminta chaskikuq Corinto runakunaqa, machayta, suwakuyta, qharipura kayta, warmipura kayta iman saqepurqanku (1 Cor. 6:​9-11).b

17. ¿Imatan yachasunman Corinto llaqta runakunamanta?

¹⁷ Wakin Corinto llaqta runakunaqa bautizakunankupaqqa jatun cambiokunatan ruwananku karqan. Chhaynaña karqan chaypas manan paykunaqa mana atiqpaq jinachu qhawarikurqanku, aswanpas tukuy atisqankutan kallpachakurqanku kausayman apaq ñañu ñanninta purinankupaq (Mat. 7:​13, 14). ¿Imaniwaqmi personaykimanta? Yaqapaschá ima viciotapas ima mana allin ruwaytapas saqenayki kashan. ¡Kallpachakushallay atillankin; Diospa yanapaynintapas mañakuy, paymi espiritunta atiyninta qosunki chaykunata saqenaykipaq!

18. ¿Imatan yachasunman Monikamanta?

¹⁸ Monika sutiyoq hermanamanta rimasun, payqa Georgia nacionpin tiyan. Payqa bautizakuytas munashasqa, ichaqa chaypaqqa qhelli ruwaykuna qhawayta qhelli simikuna rimayta imas saqepunan kasqa. Paymi nin: “Jehová Diosmantan mañakuq kani, chaywanmi kallpata jap’iq kani. Payqa yacharqanpunichá allin kaq ruway munasqayta, chaychá sapa mañakuqtiy yanapawallaqpuni”, nispa. Monikaqa 16 watanpi kashaspan bautizakapurqan. Personaykipas yaqapaschá imatapas saqenayki kashan Jehová Diosta servinaykipaq. Chhayna kashan chayqa, mañakushallay espiritunta, chay espirituq yanapayninwanqa atillankin cambiayta. Chaymantapas Diosqa gustowanmi qosunki chay yanapayta (Juan 3:34).

IÑIYNIYKIQA ORQOTAPAS KUYURICHINMANMI

19. ¿Iman yanapasunkiman orqo sayay sasachakuykunata atipanaykipaq? (Qhaway kay parrafopaq fotota).

¹⁹ Imataña cambianayki kanqa bautizakunaykipaq chaypas aman kaytaqa jayk’aqpas qonqankichu: Jehová Diosqa munakusunkin, payqa familianmanta kanaykitan munan. Juj kutinmi Jesús qatikuqnin runakunata nirqan: “Iñiyniykichischus mostaza muju sayayllapas kanman chayqa, kay orqotan niwaqchis: Kaymanta jaqayman suchuriy, nispa, jinan suchurinman, manataq imapas qankunapaqqa mana atikuqqa kanmanchu”, nispa (Mat. 17:20). ¿Imaraykun chayta ninman karqan Jesús? Paykunaqa manaraqmi unayraqchu Jesuswan kuska purisharqanku, chaymi iñiypi astawanraq wiñananku kasharqan. Chaywanpas kallpachakuqtinkuqa Jehová Diosqa yanapananmi karqan paykunata orqo sayay sasachakuykunata atipanankupaq. ¡Personaykitapas yanapasunkipunin Jehová Diosqa!

20. ¿Imakunapin yanaparqasunki kaypi yachasqanchis ejemplokuna?

²⁰ Imapas jark’ashasunki bautizakunaykita chayqa, ama jinachu kay, cambiay chayta. Kaypi yachasqanchis jina, ñaupa tiempopi iñiqkunapas kay tiempopi iñiqkunapas tukuy atisqankutan kallpachakurqanku cambianankupaq bautizakunankupaq ima. Paykunaq ejemplonqa yanapasunkin. Chhaynaqa paykunaq ejemplonpi piensay, chhaynapin qanpas Jehová Diosman entregakuspa bautizakapunki. Chayta ruwanki chayqa, ¡manan ima ruwaytapas chay ruwayta jinaqa tarinkichu!