Onésime, Géraldine esposanpiwan
Jehová Diosqa bendecinmi llaqtankuman kutipuqkunata
QHAPAQ llaqtakunaman ripuq iñiqmasikunan kutipushanku llaqtankuman. Jehová Diosta, runamasinkuta munakuspan, Diosmanta willaqkunata necesitakusqan ladokunaman ripuranku (Mat. 22:37-39). ¿Imakunatan saqepunanku karan? ¿Imaynatan Jehová Dios bendeciran chayta ruwasqankumanta? Chaypaq rimasunchis Camerún nacionmanta, chayqa kashan África occidental ladopin.
CHALLWAKUNAQ KASQANPI
Onésime sutiyoq iñiqmasinchismi 1998 watapi Camerún nacionmanta ripuran, waj nacionpitaqmi 14 watakunaña tiyasharan. Juj kutinmi juñunakuypi juj iñiqmasinchis Diosmanta willayta tupanachiran, khaynata: “Kaypi piensaychis iskay amigokunan sapaq sapaqpi challwashanku, jujninmi askhata jap’ishan jujnintaq pisita. Pisita challwaqqa askha challwakunata jap’iqpa ladonmanmi ripunman ¿riki?”, nispa.
Chay tupanachiyta uyarispan Onésime iñiqmasinchisqa piensaran Camerún llaqtanman kutipunanpaq, chaypin iñiqmasikunaqa yanapanata necesitasharanku Bibliamanta astawan yachay munaq runakunata yachachinankupaq. Ichaqa llakisqan kasharan llaqtanpi jujmanta imayna kausananmanta, askha watakuna waj nacionpi tiyasqanrayku. Chayta yachananpaqmi soqta killa Camerún nacionman riran, 2012 watapitaqmi astakapuran.
Onésime iñiqmasinchismi nin: “Nishu calormi karan, chaymantapas jujmantan chaypi kausayman yachakunay karan. Juñunakuykunapiqa bancakunallapin tiyanay karan”, nispa. Chaymantan nillarantaq: “Juñunakuykunapi yachachikuykunata uyarispan ichaqa manaña yuyaqchu kani allin sillakunapi tiyasqayta”, nispa.
2013 watapin iñiqmasinchis Onésime casarakapuran Géraldine hermanawan, paypas camerunmanmi kutipuran isqon wata Francia nacionpi tiyasqanmanta. ¿Imaynatan Jehová Dios bendiciran chayta ruwasqankumanta? Onésime iñiqmasinchismi nin: “Iskayniykun rirayku Diospa gobiernonmanta willaqkunapaq escuelaman, chaymantapas Betelpin yanapakurayku. Qayna watan iñiq t’aqaypi 20 estudiantekuna bautizakuranku. Kunanqa maypichus askha challwakuna kashan chaypin kashayku”, nispa (Mar. 1:17, 18). Géraldine hermananchismi nillantaq: “Manan piensaraykuchu askha bendicionkunata chaskinaykupaq”, nispa.
JUJKUNATA YANAPAYQA MAY KUSIKUNAPAQMI
Judith, Sam-Castel qosanpiwan
Judith hermananchisqa Estados Unidos nacionmanmi astakapusqa, payqa munasharanmi Diosmanta astawan willayta. Paymi nin: “Camerunta sapa kuti familiayta visitaq reqtiymi, waqaspa kutimpuq kani Bibliamanta yachachisqay runakunata jujmanta saqemusqaymanta”, nispa. Chaywanpas manan Camerún nacionman kutipuyta munaranchu. Allin llank’anayoqmi karan, chaywantaqmi papanta jampichisharan imachus necesitasqantapas pagasharan. Ichaqa Jehová Diospin confiaran, chaymi kutipuran Camerún nacionman. Chaymantapas yuyarinraqmi imakunatachus saqemuran Estados Unidos nacionpi chayta. Jehová Diosmanmi mañakuran jujmanta Camerún nacionman yachakunanpaq, chaymantapas watukuq umalliq esposanpiwanmi kallpacharanku.
¿Imaynan tarikuran astakusqanmantapacha? Judith hermananchismi nin: “Kinsa watapin tawa estudianteykunata bautismoman chayachirani chaywanmi kusisqa karani”, nispa. Chaymantapas tukuy tiempo Jehová Diosta servinanpaqmi niranku. Kunanqa Sam-Castel qosanpiwanmi watukuq umalli jina yanapakushanku. ¿Imataq papanwanri pasaran? Judith hermananchisqa, familianpiwanmi tariranku juj nacionpi hospitalta, chay hospitalpin papanta gratislla operaranku. Operacionqa allinmi lloqsiran.
JEHOVÁ DIOSPA YANAPAYNINTA RIKURANKU
Caroline, Víctor qosanpiwan
Víctor iñiqmasinchismi astakapuran Canadá nacionman. Qhawaq qelqapi universidadpi estudiaymanta yachachikuyta leespan, universidadpi estudiashasqanpi piensaran, chaymi saqepuran estudiashasqanta, jinaspataq pisi tiempollapaq juj carrerata estudiayta qallariran. Paymi nin: “Chayta ruwasqayraykun ratulla juj llank’ayta tarirani, chaypin munasqayman jina precursor kapurani”, nispa. Chaymantataq Caroline hermanawan casarakapuran, Camerún nacionmantaqmi astakapuranku. Chaypi kashaspanku sucursalta visitaranku, chaypin kallpachamusqaku chay nacionpi servinankupaq. Víctor iñiqmasinchismi nin: “Manan razón karanchu mana ninaypaq, ima necesitasqallaykuwantaq kausarayku chayqa, arí niraykun”, nispa. Caroline hermananchis mayninpi onqoranña chaypas, manan iskayarankuchu chayta ruwanankumanta.
Víctor, Caroline iñiqmasinchiskunan precursor regular jina yanapakuyta qallariranku, Bibliamanta yachay llapa munaqkunata yachachinankupaq. Juj tiempon qolqe waqaychakusqallankuwan kausaranku, chaymantan ichaqa juj tiempo llank’aranku Canadá nacionpi, jinaspa Camerún nacionman kutispa precursor jina yanapakushanallankupaq. ¿Imaynatan Jehová Dios bendeciran chay ruwasqankumanta? Diospa gobiernonmanta willaqkunapaq escuelamanmi riranku, chaymantapas precursor especial jinan yanapakuranku, kunantaq Diosta yupaychanapaq wasikuna jatarichiypin yanapakushanku. Chaymantan Víctor nin: “Yanapakuq purispaykun repararayku Jehová Diospa yanapayninta”, nispa.
JEHOVÁ DIOSTA SERVINANKUPAQ RUNAKUNATA YANAPAYQA ANCHA KUSIKUNAPAQMI
Stéphanie, Alain qosanpiwan
2002 watapin Alain sutiyoq iñiqmasinchis Alemania universidadpi estudiasharan, chayllamanmi leeran, Wayna-sipas, ¿imata ruwanaykipaqmi yuyaykushanki? nisqa qelqata, chaymi kallpacharan Diosta astawan servinanpaq. 2006 watapitaqmi soltero qharikunapaq escuelaman riran, paytaqa Camerún nacionninmanmi kutichipuranku.
Chaypin wakin p’unchaykuna llank’asharan. Jinaspan tariran juj aswan allin llank’anata, ichaqa llakikuranmi Diosmanta willananpaq pisi tiempon kapunanmanta. Chaymi precursor especial kananpaq niqtinku mana iskayaspa “arí” niran. Llank’ananmanta jefenmi mana ripunanta munaspa “astawan pagasayki” nispa niran, ichaqa Alainqa manan munaranchu. Chay qhepamanmi Stéphanie hermanawan casarakapuran, chay hermanan Francia nacionpi askha watakunaña tiyasharan. ¿Ima sasachakuykunapin tarikuran hermananchis, Camerún nacionman astakuspa?
Stéphanie nin: “Mayninpi onqoraniña chaypas tariranin yanapawananpaq jampikunata, chaywanmi allin sientekapurani”, nispa. Jehová Diosmi bendeciran iskayninkuta kallpachakusqankumanta. Alainmi nin: “Katé llaqtaman Diosmanta willaq reqtiykun Bibliamanta yachay munaq runakunata tarirayku, paykunatan yachachirayku telefononta wajaspa. Paykunamantan iskay bautizakapuranku, chaymantataq juj grupo kapuran”, nispa. Stéphanie nillantaq: “May kusikunapaqmi jujkunata Jehová Diosta servinankupaq yanapayqa. Camerún nacionpiqa kusisqan chaykunamanta karayku”, nispa. Kunanqa iñiq t’aqakunata watukuspan yanapakushanku.
“IMACHUS RUWAKUNALLANTAN RUWARAYKU”
Léonce, Gisèle esposanpiwan
Gisèle hermanaqa Italia nacionpin bautizakapuran, medicinatataqmi estudiasharan. Payqa admirakuranmi Bibliamanta yachachisqan precursorkuna imankuchus kan chayllawan kausasqankuta rikuspa, payqa astawanmi Diosmanta willayta munaran. Chaymi precursora kapuran, universidadpiña estudiasharan chaypas.
Gisèle hermananchisqa Camerún nacionmanmi kutipuyta munaran, Diosmanta astawan willananpaq, ichaqa manchakusharanmi. Paymi nin: “Chayta ruwaspayqa Italiapi tiyanaypaq permisota mañakusqaymi mana valepunmanñachu, chaymantapas t’aqakapunaymi karan amigoykunamanta wakin familiaykunamantapas”, nispa. Chaywanpas 2016 wata mayo killapin Camerún nacionman kutipuran. Tiempowantaqmi Léonce iñiqmasinchiswan casarakapuran, sucursalmanta iñiqmasinchiskunataq kallpacharanku Ayos llaqtaman astakapunankupaq, chaypin Diosmanta willaqkunata necesitakusharan.
¿Imaynataq karan chay llaqtapi kausayri? Gisèle hermananchismi nin: “Sapa kutillanmi mana luzniyoq karayku, askha p’unchaykunan chhaynapi tarikurayku, chaymi mana celularniykutapas cargayta atiraykuchu. Chayraykun askha p’unchaykuna celularniykupas apagasqa kasharan. Chaymantapas yacharanin llant’allawan wayk’ukuyta, askha runa kasqanraykun tutakunalla linternawan k’anchakuspa carretillapi unu maskhaq riq kayku”, nispa. Imachus aguantanankupaq yanaparan chaymantan Gisèle nillantaq: “Jehová Diospa yanapayninwanmi chaykunata atiparayku, iskayniykun kallpachanakuq kayku, familiaykupas, amigoykupas yanapawarankun”, nispa.
¿Kusikuranchu Gisèle llaqtanman kutipuspa? Paymi nin: “Arí kusikuranin, qallariypiqa imaymana sasachakuykunan karan noqaykupaq, chaymi pisikallpayarayku. Ichaqa, tukuyta saqespan noqapas qosaypas repararayku imachus ruwanallaykuta ruwasqaykuta. Jehová Diospin confiarayku astawantaqmi payman achhuykurayku”, nispa. Paykunaqa Diospa gobiernomanta willaqkunapaq escuelamanmi riranku, precursor especial jinataqmi kashanku.
Imaynan challwaqkunapas imaymana sasachakuykunapi tarikunku challwata jap’inankupaq, chhaynallataqmi llaqtankuman kutipuq iñiqmasikunapas sasachakuykunapi tarikunku, sonqomanta Diosmanta yachay munaq runakunata yanapanankupaq. Jehová Diosqa manan qonqanqachu sutinrayku chay iñiqmasikunaq imaymana ruwasqankutaqa (Neh. 5:19; Heb. 6:10). Sichus juj lado nacionpi tiyanki chayqa, yachankitaq llaqtaykipi Diosmanta willaqkuna necesitakusqanta chayqa, ¿atiwaqchu kutiyta? Chayta ruwanki chayqa Jehová Diosmi bendecisunki (Prov. 10:22).