“Yachayninqa ruwasqankunawanmi reqsichikun”
1. ¿Imaynatan wakin runakuna qhawariwanchis predicaqtinchis?
1 Predicashaqtinchismi runakuna mayninpi mana allinta tratawanchis. Yaqapaschá radiopi televisionpi yanqa rimaykunata uyarisqankurayku mana kaqta ñoqanchismanta rimanku. Wakin runakunataq “pantachikuq religión” nispa niwanchis. ¿imaynatan chay niwasqanchista qhawarinanchis?
2. ¿Iman yanapawasun ñoqanchismanta mana allinta rimaqtinku mana pisikallpayananchispaq?
2 Ama pisipasunchu. Ñawpaqpin Jesuspas Dios serviqkunapas yanqamanta tumpasqa karqanku (Hech. 28:22). Chaywanpas paykunaqa manan p’enqakurqankuchu predicasqankumanta. Jesusmi nirqan: “Yachayninqa ruwasqankunawanmi reqsichikun”, nispa (Mat. 11:18, 19). Jesusqa tukuy sonqowanmi Diospa munayninta hunt’arqan, payqa yacharqanmi allin sonqoyoq runakuna predicasqanta chaniyoqpaq qhawarinankuta. Ñoqanchista hina Diospa Churinta tratasqankuta yuyariymi yanapawasun mana pisikallpayananchispaq.
3. ¿Imaraykun mana mancharikunanchischu runakuna contranchispi churakuqtinku?
3 Jesusmi willarqan qatikuqninkuna pay hina cheqnisqa kanankuta (Juan 15:18-20). Chaymi mana mancharikunanchischu runakuna ñoqanchis contra sayariqtinku. Chaykunaqa astawanraqmi yapakunqa p’uchukay p’unchaykuna tukupusqanman hina, Satanaspas runakunata contranchispi kallpachasqanman hina (Apo. 12:12). Chaykunaq sucedesqanmi rikuchin Satanaspa kamachisqan runakuna millay kawsaypas tukupunanpaqña kashasqanta. ¡Maytan kusichiwanchis chayta yachayqa!
4. ¿Imaynatan kutichinanchis pipas mana allinta tratawaqtinchis?
4 Llamp’u simiwan kutichiy. Pipas mana allinta tratawaqtinchisqa llamp’u simiwanmi kutichinanchis (Pro. 15:1; Col. 4:5, 6). Allin sonqoyoq kaqtinqa tapusunmanmi imarayku chhayna yuyaykusqanta otaq willasunman Jehová Diospa testigonkuna imayna runa kasqankuta. Sumaqllata kutichiqtinchisqa yaqapaschá iskayanqa ñoqanchis contra rimasqankumanta, hinaspa hukpi Testigokuna visitaqtinku uyarikunman. Ichaqa sinchi phiñasqa kaqtinqa sumaqllata despedikuspan ripunanchis. Imaynataña runakuna qhawariwanchis chaypas, Jehová Diosqa chaniyoqpaqmi qhawarin paypaq llank’asqanchista (Isa. 52:7).