¡Kaymi qhapaq kaykuna!
1. ¿Imarayku yuyaykunayki precursor regular kanaykipaq?
1 ¿Kusisqachu kawsayta munanki? ¿Runakunata yanapasqaykimanta kusikunkichu? ¿Jehová Diospaq astawan llank’ayta munawaqchu? Chhayna kaqtinqa manachu yuyaykuwaq precursor regular kanaykipaq. Ichaqa precursor kaspapas manan qonqanaykichu familiaykipaq ima ruwanaykita, Bibliaq huk kamachikuyninkuna hunt’anaykitapas, chaymantapas cuidakunayki mana onqonaykipaq mana pisipanaykipaqpas.
2. Willay ima saminchaykunata precursorkuna chaskinku.
2 Kamachikuq Salomonmi Jehová Diospa saminchayninta tupanachiran qhapaq kaywan (Pro. 10:22). Jehová Diospa saminchayninqa qhapaqyachikunmi, precursorkunataq chay saminchayta chaskinku. Yachanapaq, precursorkuna ‘tiemponkuta mana usuchispa’ predicanku, chaymi paykunaqa mana munayninkutaraqchu ñawpaqman churanku aswanpas kusikuywan hukkunata yanapanku (Col. 4:5; Hech. 20:35). Jehová Diosqa ancha chaniyoqpaqmi qhawarin precursorkunaq ruwayninkuta, chaymi ‘qhapaq kaykunataqa hanaq pachapi huñupun’, chaykunaqa manan hayk’aqpas chinkanqachu (Mat. 6:20; Heb. 6:10). Precursorkuna ‘allin ñawiyoq’ kanku chaymi mana sinchitachu llakikunku ima necesitasqankumanta, aswanpas Jehová Diospi hap’ipakunku astawantaq hukllachakunku (Mat. 6:22, 25, 32; Heb. 13:5, 6).
3. ¿Imaynapin mana tupanchu kay pachapi qhapaq kay maskhay espiritualpi qhapaq kay maskhaywan?
3 Kay pachapi qhapaq kayta maskhaqkunaqa ‘mana valeq waqllichiq munapayaypi rikukunku’ (1 Tim. 6:9, 10; Sant. 5:1-3). Jehová Diospa saminchayninmi ichaqa allinninchispaq. Precursorkunaqa sapa p’unchay predicanku chaymi yanapan iñiyninkupi kallpachasqa kanankupaq imatapas allin kaqtapuni ruwanankupaq (Fili. 1:10). Huk wayqenchismi ingeniero kaspa sinchita llank’aran tiempontapas manan aypachikuranchu, chaymi llank’ananta saqespa precursor kapuran. Paymi nin: “Llank’ayniymi sinchita sayk’uchiwaran. Ichaqa precursor kaspa Diospaq llank’ayniyqa manan sayk’uchiwanchu. Kunanqa runakunata yanapashani Diosmanta yachachispa. Kay llank’aymi ichaqa anchata kusichiwan”, nispa.
4. ¿Imaynapin precursor regularkuna kusikunku hukkunata yanapaspa?
4 Hukkunaq allinninpaq: Lliwmi ‘sasa tiempokunapi’ kawsashanchis (2 Tim. 3:1). Chaymi llapa runakuna usqhaylla necesitanku yanapanata. Reinomanta predicaspa rikunchis imayna llakisqa runakuna uyarikunku allin willakuykunata, kusikunkutaq ancha sumaq suyakuyta willaqtinchis. Precursor regularkuna pusaq pachak horata hinaraq watapi predicanku, chaymi anchata kusikunku chhayna llank’asqankuwan (1 Tim. 4:16).
5, 6. ¿Iman yanapasunkiman precursor regular kanaykipaq?
5 ¿Yuyaykushankiñachu precursor regular kanaykipaq? Chhayna kaqtinqa ‘tiempoykita ama usuchiychu’ huk ruwaykunapi (Efe. 5:15, 16). Askha wayqe panakuna chayta ruwankuña imachus kapuqnillanwan kawsanku, chayrayku pisillataña llank’anku, Reinomanta predicanankupaqmi ichaqa astawan tiemponkuta t’aqanku. ¿Manachu qanpas tiempoykita allichawaq precursorkunawan kuska llank’anaykipaq?
6 Jehová Diosta mañakuy allin yachaywan horarioykita ruwanaykipaq (Sant. 1:5). ¿Ima saminchaykunatan chaskinki chayta ruwaqtiyki? Espiritualpi astawan wiñarinki. Chaymantapas Jehová Diosmi tukuy necesitasqaykita qosunki (Mat. 6:33). Chayta ruwaqtiykiqa Jehová Diosmi ‘saminchata llimp’arishaqta [otaq askhanpi] hich’aykamusunki’ (Mal. 3:10).