Tiemponchista ama usuchisunchu
1 Jehová Dios kusichiyta munasqanchisqa kuyuchiwanchismi espiritual ruwaykunata ruwaspa kawsananchispaq. Diospa Siminmi kamachiwanchis ‘Diospa qhaqaq suyunta ñawpaqta maskhananchispaq’, ‘aswan allin kaqkunatapas akllakunanchispaq’ (Mat. 6:33; Fili. 1:10). ¿Imaynata ‘tiempota mana usuchisunchismanchu’ Reinoq ruwayninkunata ñawpaqman churanapaq, huk ruwaykunatataq qhepaman churananchispaq? (Efe. 5:15-17.)
2 Reinota ñawpaqman churay: Allichay tiempoykita ama yanqa ruwaykunapi usuchinaykipaq. Wakin wayqe-panakunaqa killa qallarinapaq sapaqchanku ima p’unchaykunata predicanankupaq, kallpachakunkutaq kaykunata hunt’anankupaq. Kaqllatataq ruwakunman huñunakuykunaman rinapaq, qelqakunamanta yachaykunanchispaq, asambleakunaman rinapaqpas. Askhan allichanku tiemponkuta, Bibliata leespa p’unchayta qallarinankupaq otaq tukunankupaqpas. Sapanka chaniyoq ruwaykunapaq tiempoykita t’aqay, amataq ima ruwaykunawanpas allichasqaykita qolluchiychu (Ecl. 3:1; 1 Cor. 14:40).
3 Ama nishutaqa kay pachapi kaqkunata usachikuychu [sacar beneficio, usar]: Wakin suyukunapi pasaqllata usuchinku tiemponkuta pukllaypi, q’ochukunapaq ruwaykunapi, samana tiemponkupaq ruwaykunapi, hukkunapiwan. Mana yuyaywan askha runakuna tiemponkuta usuchinku televisorwan computadorawanpas. Ichaqa pikunachus sinchita k’askakunku kay pachapi q’ochukunapaq ruwaykunaman, tecnologiaq mosoq ruwasqankunamanpas chayqa, yukasqan kanqaku suyakuyninkupi (1 Juan 2:15-17). Chayrayku Bibliaqa yuyaychawanchis kay pachapi kaqkunata ama nishutachu usachikunanchispaq (1 Cor. 7:31). Sichus kay yuyayniyoq yuyaychayta kasukusunchis chayqa, Jehová Diosninchista rikuchisun noqanchispaq payta yupaychayqa aswan chaniyoq kasqanta (Mat. 6:19-21).
4 Kay pachapi kaqkunapaqqa pisillañan tiempoqa. Reinoq ruwayninkunata ñawpaqman churaqkunaqa kusisamiyoqmi kanqaku, Diospa chaskisqankutaq kanqaku (Pro. 8:32-35; Sant. 1:25). Chayrayku yuyaywanpuni tiemponchistaqa ama usuchisunchu.