¿Imatan ñawpaqman churanki?
1 ¿Ima niwaqtaq chaymanta? Llapallanchismi munanchis Diospa Reinon ñawpaqman churayta (Mat. 6:33). ¿Chayman hinachu imatapas ruwashanchis? Biblian niwanchis: “Qankuna kikiykichista reqsikuychis”, nispa (2 Cor. 13:5). ¿Imaynatan yachasunman sichus Diospa Reinonta ñawpaqman churashanchis icha manachus chayta?
2 Imatan ruwashanchis tiemponchiswan: Reparakunanchis ima ruwaykunapin tiemponchista usuchishanchis chayta (Efe. 5:15, 16). ¿May tukuytan tiemponchista qoshanchis fiestakunaman, pukllaykunaman, televisión qhawayman, Internetmanpas? Chaykunapi tiempo usuchisqanchista tupachisunman espiritual ruwayninchiskunawan chayqa, reparasunchis mayqenmanchus astawan tiempo qosqanchista. ¿Nishutachu llank’anaman qokushanchis Diospaq llank’ananchista saqespa, ima munasqanchistapas rantinanchis raykulla? ¿Saqeshanchischu huñukuyninchista predicananchista paseokunaman lloqsinanchis rayku?
3 Imakunatan ñawpaqman churana: Yaqa llapanchismanmi tiempo mana aypawanchischu tukuy munasqanchista ruwanapaq. Chay rayku Diospa munayninta ñawpaqman churanapaqqa ‘aswan allin kaqkunata’ reparaspa chaykunapaq tiempota hap’ina (Fili. 1:10). Chaytaqa ruwasunman Diospa Siminta estudiaspa, predicaq lloqsispa, familianchista uywaspa, huñunakuykunaman rispapas (Sal. 1:1, 2; Rom. 10:13, 14; 1 Tim. 5:8; Heb. 10:24, 25). Chaykunamanta kallantaqmi huk allin ruwaykuna: ejercicio ruway, pukllay, hukkunapas (Mar. 6:31; 1 Tim. 4:8). Ichaqa chay ruwaykunataqa manan ñawpaqmanchu churana, maychus kanallanpin kanan.
4 Huk wayna universidadpi estudiaspa allin llank’anayoq kananmantaqa precursor kayta akllakuran Diospa Reinonta ñawpaqman churananpaq. Hinan huk simi rimayta yachaspa maypichus astawan predicanapaq kasqanman astakuran. Paymi niran: “Kunan hinaqa manan hayk’aqpas kusikuranichu. ¡Predicayqa anchatapuni kusichiwan! Munaymanmi lliw wayna-sipaskuna kay hina ruwanankuta, noqa hina kusisqa kanankupaq. Tukuy kaqninchiskunawan Jehová Diosta serviymantaqa manan imapas aswan allinqa kanmanchu”, nispa. Diospa Reinonta ñawpaqman churaspaqa askha saminchaykunata chaskisun, hanaq pacha Yayanchis Jehová Diostapas kusichisun (Heb. 6:10).