“Yapaychis”
1. ¿Imatan llapanchis ruwananchis?
1 Cristiano hina wayqepanantin kasqanchisraykun, llapanchis kallpachakunanchis congregacionpi munanakuy kananpaq (1 Ped. 1:22; 2:17). Chay munanakuyqa kanqa hukkuna munakuypi ‘yapaqtinchismi’ (2 Cor. 6:12, 13). ¿Imaraykun allinta reqsinanchis sapanka hermanonchiskunata?
2. ¿Imaraykun wayqepananchiskunawan amistadta ruwananchis?
2 Kallpachanan amistadninchista. Cristiano hermanonchiskunata allinta reqsispan, astawan estimanchis iñiyninta, aguantasqanta, huk sumaq kayninkunatapas. Imapas pantasqankuqa mana reparaymi kapun, amistadninchistaq astawan yapan. Allinta reqsinakuspan, yachanchis imayna kallpachanakuyta, consolanakuytapas (1 Tes. 5:11). Sapankanchismi hukkunata “kallpachaspa yanapanakusunman” Satanaspa mundonpi pantachiq tentacionkuna atipananchisrayku (Col. 4:11). Tukukuy p’unchaypi askha tentacionkuna kasqanrayku, ¿manachu agradecekunchis Jehovata serviqkuna ukhupi allin amigokuna tarisqanchismanta? (Pro. 18:24.)
3. ¿Imaynatan hukkunata kallpachaspa yanapasunman?
3 Allin amistadkunaqa hatun pruebakunapi tarikuqtinchismi kallpachaspa consuelota qowanchis (Pro. 17:17). Mana imapaq valeq kananpaq piensaq cristianan kayta yuyarin: “Amigoykunaqa sumaq kayniykunatan reparachiwanku mana valeq kasqaypi piensasqayta atipanaypaq”. Chhayna amigokunaqa Diospa churasqanmi (Pro. 27:9).
4. ¿Imaynatan hermanonchiskunawan amistadta ruwaswan?
4 Wayqepananchiskunapi interesakusun. ¿Imaynatan munakuyninchista yapachiswan iñiqmasinchis wayqepananchiskunapaq? Reunionninchiskunapi saludaspapas, kallpachakusun paykunawan imallamantapas rimananchispaq. Sapankapi interesakusun, ama ichaqa vidankupi metekusunchu (Fili. 2:4; 1 Ped. 4:15). Paykunawan kuska mikhunapaq invitaspan rikuchillaswantaq paykuna munakusqanchista. (Luc. 14:12-14). Rimanakullaswantaqmi servicioman kuska lloqsinapaqpas (Luc. 10:1). Hermanonchiskunata allinta reqsinanchispaq ñoqanchis kikinchis kallpachakuspan, yanapanchis congregacionpi hukllachasqa kananchispaq (Col. 3:14).
5. ¿Imaynatan amistadninchiskuna yapanman?
5 ¿Wiñaymasillanchistachu icha ñoqanchiswan imaymanapi tupaqllatachu akllanchis amigonchis kanankupaq? Manan chhayna piensaywan atipachikuspachu congregacionpiqa pisillata amistadta maskhananchis. Davidpas Jonatanwan, Rutpas Noemiwan allin amistadtan ruwaranku manan ichaqa wiñaymasichu karanku nitaq igual familiamantachu (Rut 4:15; 1 Sam. 18:1). ¿Maskhasunmanchu huk amistadkunata? Chayta ruwaspaqa askhatan bendicionkunata chaskisun.
6. ¿Imaynatan yanapawanchis hermanonchiskunata astawan munakusqanchis?
6 Hukkunata astawan munakuspan kallpachanakunchis yanapanchistaq congregacionpi thak kawsay kananpaqpas. Jehová Diospas bendeciwanchismi wayqepananchiskunata munakuqtinchisqa (Sal. 41:1, 2; Heb. 6:10). ¿Reqsisunmanchu aswan allinta sapanka hermanonchiskunata, llapantapas congregacionpi kaqkunata?