¿Pitaq Diosri?

Askha runakunan “Diospiqa creenin” ninku, pi kasqanta tapuriqtinchistaq manan kaqllatachu kutichinku. Wakinqa piensankun Diosqa millay kananpaq, jinaspa ima juchanchismantapas castigawananchispaq. Wakintaq piensanku Diosqa munakuq kasqanrayku imataña ruwaqtinkupas perdonananpaq. Wakintaq piensanku Diosqa nishu karupi kasqanraykun mana runakunapi interesakunanpaq. Imaymanatataq Diosmanta piensanku chayqa, chayraykupaschá wakinqa “manan Diostaqa reqsiyta atisunmanchu” ninku.

¿Importantechu kanman Diosta reqsiy? Arí. Diosta reqsispaqa manan yanqapaqchu kausanki (Hechos 17:26-28). Diosman astawan qayllaykunki chayqa, payqa astawanmi munakusunki jinaspa astawan yanapasunki (Santiago 4:8). Chaymantapas Diosta reqsisun chayqa wiñaypaqmi kausasun (Juan 17:3).

¿Imaynatan Diosta reqsiwaq? Juj allin reqsisqayki amigoykipi piensay. ¿Imaynapin amigontin kapurankichis? Ñaupaqtaqa sutintachá tapuranki, chaymantataq imayna runa kasqanta reqsiranki, yacharankin imas gustan imachus mana, imakunatas ruwaran imakunatas ruwayta piensashan chaykunata. Tukuy chaykunata yachaspan paywanqa amigontin kapurankichis.

Chhaynatan Diostapas reqsiwaq, chaypaqmi kay tapuykunamanta yachanayki:

• ¿IMAN DIOSPA SUTIN?

• ¿IMAYNAN DIOS?

• ¿IMATAN DIOS RUWARAN?

• ¿IMATAN DIOS RUWANQA?

• ¿IMAYNATAN BENEFICIASUNKIMAN DIOSTA REQSISQAYKI?

Kay revistapin Bibliawan chay tapuykunata kutichishan. Kay revistapi kaq temakunaqa Diosta reqsinaykipaqmi yanapasunki, yanapallasunkitaqmi imaynatan Diospa amigo kay beneficiasunkiman chaymantapas.