Yuyaqña kaspapas Diostaqa servisunmanmi
2009 watapi 19 p’unchay diciembre killapin Málaga llaqtapi (España) bautizakurqanku mamantin ususintin iskayninkupas Ana sutiyoqkama. Chay watapi España nacionpi 2.352 runakunaña bautizakurqanku chaypas, chay iskay warmikunaq bautizakusqanqa ancha kusikunapaqmi karqan. Mamanmi 107 watayoq karqan ususintaq 83 watayoq.
¿Imanaqtinmi bautizakuyta decidikurqanku? 1970 watakuna ukhupin ususinta huk vecinan wasinman invitasqa Qelqamanta Yachanapaq Huñunakuyman. Askha kutitaña rirqan chaypas, llank’asqanraykun iñiyninpi mana wiñarqanchu.
Chunka wata qhepamanmi wakin wawankuna Biblia estudiayta qallarirqanku, hinaspa bautizakurqanku. Ususin Mari Carmenmi yapamanta Bibliamanta rimapayarqan chaymi estudiayta qallarirqanku, Ana sutiyoq abuelanpas yachaytan munarqan. Llapan familianmantan 10 Jehová Diospa testigon kapurqanku.
Bautizakusqanku p’unchaymi iskayninku kusisqallaña kasharqanku. Mamanmi nirqan: “Jehová Diosqa ancha munakuyninpin yanapawarqan payta reqsinaypaq”, nispa. Ususintaq nirqan: “Mosoq pacha hamunankaman Jehová Diosta servishallasaq tukuy atisqaytataq predicasaqpas”, nispa.
Kay iskay viudakunaqa kusisqan huñunakuykunapi kanku. Huk umallin nin: “Manan hayk’aqpas faltakamunkuchu, Qhawaq revistata estudiakuqtinpas kutichillankupunin tapuykunaman”, nispa.
Chhayna Dios sonqo kasqankun yuyarichiwanchis ñawpa tiempopi Ana sutiyoq viuda warmita. “Payqa Dios yupaychana wasimantan mana lloqsiqchu, tuta-p’unchay ayunaspa mañakuspa Diosta yupaychaq.” Chayraykun Jesustapas rikurqanraq wawallaraq kashaqtin (Luc. 2:36-38). 84 watanpi kashaspapas Jehová Diostaqa servishallarqanmi, kaqllatataqmi nisunman kunan tiempopi chay iskaynin Ana sutiyoq warmikunamantapas.
¿Kanchu Bibliamanta yachay munaq familiaykikuna? ¿Tarirqankichu predicasqaykipi yuyaq runata Bibliamanta yachay munaqta? Yuyaqña kaspapas atinkumanmi Dios serviyta imaynan iskaynin Anakunapas ruwashanku hinata.
[25 paginapi willakuy]
“Jehová Diosqa ancha munakuyninpin yanapawarqan reqsinaypaq”
[25 paginapi willakuy]
“Mosoq pacha hamunankaman Jehová Diosta servishallasaq”