9 YACHACHIKUY
Familiaykiwan kuska Diosta yupaychay
“Yupaychaychis Diosta, paymi hanaq pachatapas kay pachatapas [...] kamaqqa” (Apocalipsis 14:7)
Jehová Diosmi munan llapa familiakuna kusisqa kawsanankuta. Chaypaqmi askha yanapaykunata qowanchis, wakintan kay folletopi yacharqanchis. Hinaspapas payta ñawpaqta servisun chayqa, ‘tukuy [necesitasqanchistan] qowasun’ (Mateo 6:33). Diosqa amigonkuna kananchistan munan. Chaymi ñoqanchispas kallpachakunanchis ancha munakuq Diospa amigon kananchispaq (Mateo 22:37, 38).
1 DIOSMAN ASTAWAN K’ASKAKUY
BIBLIAN NIN: “Qankunaq Yayaykichismi kasaq, qankunataq churiykuna ususiykuna kankichis, ninmi Tukuy-atiyniyoq Señor Diosqa”, nispa (2 Corintios 6:18). Diospa amigon kanapaqqa, sapa kutillanmi paywan parlananchis. Sut’illantan willakunanchis sonqonchispi ima kasqanta, imakuna llakichiwasqanchistapas. Pay kikinmi niwanchis: “Mañakushallaychispuni”, nispa (1 Tesalonicenses 5:17; Filipenses 4:6). Sichus sapa kutilla familiaykiwan kuska mañakunki chayqa, wawaykikunan reparanqa Dios munakusqaykita.
Hinaspapas Diospa amigon kanapaqqa yachachiwasqanchistan uyarikunanchis. ¿Imaynatan chayta ruwasunman? Chaypaqqa Bibliata, qelqanchiskunatawanmi estudiananchis (Salmo 1:1, 2). Imachus yachasqanchispin yuyaymanananchis (Salmo 77:11, 12). Hinaspapas huñunakuykunamanmi rinanchis (Salmo 122:1-4).
Chaymantapas paymantan hukkunaman yachachinanchis. Chaymi yanapawasun payman astawan k’askakunanchispaq (Mateo 28:19, 20).
¿IMATAN RUWAWAQ?
Tiempoykita t’aqay Bibliata sapa p’unchay leenaykipaq, Diosmanta mañakunaykipaq ima.
Familiaykita yanapay ama kusirikuykunallapi kanankupaq aswanpas Diosta ñawpaqta servinankupaq.
2 FAMILIAYKIWAN DIOSTA YUPAYCHAY
BIBLIAN NIN: “Diosman asuykuychis, hinan payqa asuykamusunkichis”, nispa (Santiago 4:8). Tiempota t’aqay familiaykiwan kuska Diosta yupaychanaykipaq (Génesis 18:19). Sapankankuta yanapay Diosman astawan asuykunankupaq, qanpas kallpachakuy sapa p’unchay Dioswanpas kashawaq hina kawsanaykipaq. Biblian nin: “Yachachillaychispuni [Diosmanta] wawaykichiskunaman, chaykunamanta rimapayallaychispuni wasipi kashaspa, purishaspapas, hinallataq puñuykushaspa, hatarishaspapas”, nispa (Deuteronomio 6:6, 7). Chayta ruwaspan qanpas Josué hina ninki: “Ñoqaqa familiantinmi Señor Diosllatapuni servisaqku”, nispa (Josué 24:15).
¿IMATAN RUWAWAQ?
Programata ruway familiaykipi sapankanku imachus necesitasqanman hina estudiota aparinaykipaq.