¿Imaynatan wawaykichista yachachiwaqchis?

Diosmi tayta-mamakunata kamachin wawankuta uywanankupaq (Colosenses 3:20). Chaymi qankuna taytakuna wawaykichista yachachinaykichis Dios munakuyta, allin runa kaytapas (2 Timoteo 1:5; 3:15). Yachanaykichismi iman sonqonkupi kasqanta, chaypaqmi ichaqa ñawpaqta qankuna sonqoykichista qhawarikunaykichis. Sichus sonqoykichispi Diosta munakunkichis chayqa, paykunapas Diostan munakunqaku (Salmo 40:8).

1 YANAPAY SUT’ILLANTA IMAMANTAPAS RIMANANKUPAQ

BIBLIAN NIN: “Llapaykichis usqhaylla uyariq kaychis, ichaqa allin yuyaywan rimaychis”, nispa (Santiago 1:19). Llapa tayta-mamakunan munanku wawanku sut’illanta imamantapas rimanankuta. Ichaqa qankunan ñawpaqtaqa listo kashanaykichis willakuy munasqanta uyarinaykichispaq. Chaypaqmi wasipi thak kawsay kanan (Santiago 3:18). Sichus imamantapas usqhaylla phiñakunki otaq k’arakta rimanki chayqa, manan imatapas willasunkichu. Chaymi pacienciayoq kanayki, sapa kutillataq ninayki: “Waway, munakuykin”, nispa (Mateo 3:17; 1 Corintios 8:1).

¿IMATAN RUWAWAQ?

• Wawayki imamantapas rimayta munan chayqa, makilla uyariy.

• Rimashallay wawaykikunawan, ama sasachaykuna kanantaraqchu suyay.

2 REPARAY SONQONKUPI IMA KASQANTA

BIBLIAN NIN: “Yuyayniyoq runaqa yachaywanmi ruwan”, nispa (Proverbios 13:16). Wayna-sipaskunaqa mayninpin yapaykuspa imatapas rimanku otaq hawa sonqolla imatapas ninku. Chaymi mana rimasqallantachu uyarinayki, aswanpas reparanaykin imapunichus sonqonkupi kasqanta. Biblian nin: “Manaraq allinta uyarishaspa simita kutichiqqa mana yuyayniyoqmi”, nispa (Proverbios 18:13). Chayrayku ama phiñakuychu imatapas manaraq allinta yachashaspaqa (Proverbios 19:11).

¿IMATAN RUWAWAQ?

• Imataña wawayki willasunki chaypas, ama tatichiychu nitaq phiñakuychu.

• Yuyariy wayna-sipas kashaspa imayna sientekusqaykita imakuna munasqaykitapas.

3 HUK HINALLA IMATAPAS RUWAYCHIS

BIBLIAN NIN: “Churilláy, uyariy taytaykiq yachachiyninta, kasukullaypuni mamaykiq yachachisqasuykita”, nispa (Proverbios 1:8). Jehová Diosqa iskayniykichistan kamachisunkichis wawaykichista uywanaykichispaq. Chaymi kuskamanta yachachinaykichis respetoyoq kayta kasukuytapas (Efesios 6:1-3). Sichus mana ‘huk-nisqallachu, huk yuyayllachu’ imapipas kankichis chayqa, ratollan wawaykichis reparanqa (1 Corintios 1:10). Imapas kaqtinqa sapaykichispi rimaychis. Amapuni wawaykichispa ñawpaqenpiqa hap’inakuychischu, mana chayqa manan respetasunkichischu.

¿IMATAN RUWAWAQ?

• Rimaychis wawaykichista imayna wanachinaykichismanta.

• Wawaykichista imayna uyway munasqaykichis mana tupaqtinqa, qhawariychis iman aswan allin kanman chayta.

4 QHAWARIYCHIS IMACHUS RUWANAYKICHISTA

BIBLIAN NIN: “Wawata yachachiy imaynatachus kawsananpaq” (Proverbios 22:6). Wawaykichista allinta yachachinaykichispaqqa, ñawpaqtan qhawarinaykichis imakuna yachachinaykichista, imayna wanachinaykichistapas (Salmo 127:4; Proverbios 29:17). Ichaqa yuyariy, wanachiyqa manan castigayllachu, aswanpas imarayku imatapas kamachisqaykita entiendechiymi (Proverbios 28:7). Hinaspapas rikuchiy Diospa yachachikuynin kamachikuyninpas allinninpaq kasqanta. Chaykunan yanapanqa allin concienciayoq kananpaq (Salmo 1:2; Hebreos 5:14).

¿IMATAN RUWAWAQ?

• Wawaykita yanapay Diospi confiananpaq.

• Wawaykiman willay internetpi ima peligrokuna kasqanmanta imayna cuidakunanmantapas. Yachachiy violadorkunamanta cuidakunanpaq.