¿IMA NINMI BIBLIA?
Wañuymanta
¿Maymanmi wañusqakuna ripunku?
“Ñut’u hallp’an kanki, ñut’u hallp’amantaqmi tukupunki” (Génesis 3:19)
¿IMA NINKUN RUNAKUNA?
Wakinqa ninku: “Pipas wañuspaqa hanaq pachamanmi ripun, hukkunataq infiernoman otaq purgatorioman, wakintaq mana yachakunchu maypi kasqankuta”, nispa. Hukkunataq reencarnación nisqapi creenku. Religionpi mana creeqkunan ichaqa piensanku pipas wañupuqtin ch’usaqman tukupusqanta.
¿IMA NINMI BIBLIA?
Eclesiastés 9:10 texton nin: “Wañuy-pachapiqa manan ima llank’anapas yuyanapas reqsinapas yachanapas kanchu”, nispa. ¿Iman suceden runakunatapas animalkunatapas wañuqtinku? Eclesiastés 3:20 texton nin: “Lliwmi kaq cheqasllaman ripun, llapallanmi ñut’u hallp’amanta ruwasqa karqan, llapallantaqmi ñut’u hallp’aman tukupunqa”, nispa.
¿Imaynapin wañusqakuna tarikunku?
“Wañukapuspanqa hallp’amanmi tukupun, chay p’unchaypachan yuyaykusqankunaqa chinkapun” (Salmo 146:4)
¿IMA NINKUN RUNAKUNA?
Kaytan ninku: “Sichus pipas allinkunata ruwan chayqa, wañuspaqa wiñaypaqmi kusisqa kawsanqa. Ichaqa sichus pipas mana allinkunata ruwan chayqa, wañuspaqa wiñaypaqmi ñak’arinqa”, nispa. Wakintaq ninku: “Wañusqanchis qhepamanqa ñawpaqtan ch’uyanchasqa kananchis, chayta ruwaspallan Dioswan kayta atisun”, nispa.
¿IMA NINMI BIBLIA?
Wañupuqkunaqa manañan kusikunkuñachu nitaqmi ñak’arishankupaschu. Wañuqqa manan imatapas yachanñachu, chaymi mana yanapawasunmanchu nitaq ima mana allintapas ruwawasunmanchu. Eclesiastés 9:5, 6 texton nin: “Kawsashaqkunaqa yachankun wañukapunankuta, wañukapuqkunan ichaqa mana imatapas yachankuchu [...]. Munakuyninkupas cheqnikuyninkupas envidiakuyninkupas tukukapunñan, manañan astawanpas kay pachapi ima ruwanatapas ruwaysikunkuñachu”, nispa.
¿Kawsarimpunqakuchu wañupuq runakuna?
“Runari, ¿wañuspa kawsarinñachu? Ñoqaqa suyakusaqmi [...] kacharisqa kanay p’unchaykama” (Job 14:14)
¿IMA NINKUN RUNAKUNA?
Kaytan ninku: “Pipas infiernoman ripun chayqa manan ima suyakuyninpas kanñachu, chaypin wiñaypaq ñak’arinqa. Pikunataqchus purgatorioman ripunku chayqa, ninawan ch’uyanchasqa kaspañan Dioswan kayta atinqaku”, nispa.
¿IMA NINMI BIBLIA?
Diospa churin Jesucriston wañupuqkunataqa kawsarichimpunqa. Biblian nin: “Ama kay nisqaywanqa musphaychischu, aya p’ampanakunapi lliw kaqkunaq Runaq Churinpa kunkanta uyarinanku tiempon chayamunqa. Hinan [...] kawsarimpunqaku”, nispa (Juan 5:26, 28, 29). Kawsarimpusqanku qhepaman runakunaqa imaynatachus kawsasqankuman hinan wiñay kawsayta chaskinqaku.a
a Kawsarimpuymanta astawan yachanaykipaq qhaway ¿Imatapunin Biblia yachachin? librota 7 capitulota, chaytaqa Jehová Diospa testigonkunan ruwan. Chay libroqa www.jw.org/quz nisqapipas kashanmi.