Jehovata aswan sumajta rejsinallapuni

1. ¿Imayná sientekunchej Jehová tukuy imata yachasqanpi, may yachayniyoj kasqanpi, ruwasqasninpipis tʼukurispa?

JEHOVÁ Diosninchejqa tukuy imata yachan, tukuymanta nisqa aswan yachayniyoj, tukuy ruwasqasnintaj tʼukunapaj jinapuni. Chaypi piensarispaqa maytachá tʼukunchej, paypa ñaupaqenpitaj ni imapischu kasqanchejtachá yuyakunchej. Chayrayku apóstol Pablo jinachá ninchej. Pay nerqa: “Diospa bendicionesnenqa may chhikapuni. Yachayninpis, imastachus yachasqanpis mana tukukuyniyoj. Imatachus ruwasaj nisqanpis mana yachay atina, jinallataj ñankunasninpis mana rejsiy atina”, nispa (Rom. 11:33, 34).

2. ¿Imaraykutaj ninchej Jehovata rejsiyta atisqanchejta?

² Jehovata rejsiytaqa ni jaykʼaj tukusunmanchu. Jinapis atikusqanman jina payta sumajta rejsiyta atinchej. ¿Imaraykú chayta ninchej? Rey David wawan Salomonman nerqa: “Tataykej Diosninta allinta rejsiy, tukuy sonqotaj payta sirviy. […] Sichus Diosta maskʼanki chayqa, payqa tarichikusonqa”, nispa (1 Cró. 28:9). Chaymanta ashkha watasninman apóstol Juanpis nerqa, cristianosqa ‘allin yuyayta japʼisqanchejta cheqa Diosta rejsinanchejpaj’ (1 Juan 5:20). Jesuspis nillarqataj runasta yanapananta ‘Tatanta allinta rejsinankupaj’ (Mat. 11:27).

3. ¿Imatá kay yachaqanapi yachakusun?

³ Pikunachus Jehovaman kausayninchejta qopunchejña chaykunaqa, paymanta ashkha imastaña yachanchej. Jinapis paymantaqa yachakuyta atillasunmanpuni (Juan 17:3; Biblia de estudio nisqapi chay versiculoj sutʼinchayninta leeriy). Yachakuyta atillasunmanpuni imaschus payta kusichisqanta, imaynatatajchus paypi astawan atienekunatapis. Kay yachaqanapeqa kinsa tapuykunaman kutichisunchej. Chay tapuykunataqa tukuy cristianos mashkha unayña Jehovata sirvispapis tapurikunanchejpuni tiyan. ¿Ima niytá munan Jehovata rejsiy? ¿Imaraykutaj kallpachakunanchej tiyan Jehovata aswan sumajta rejsinapaj? ¿Imaynatá payta aswan sumajta rejsisunman?

¿IMA NIYTÁ MUNAN JEHOVATA REJSIY?

4. ¿Ima niytá munan Jehovata rejsiy?

⁴ Jehovata rejsiy ima niytachus munasqantaqa reparasunman, Babiloniamanta kutinpoj judiosmanta imatachus Jehová nisqanpi. Pay nerqa: “Noqaqa paykunaj sonqonkuta kuyurichisaj noqata rejsinawankupaj, noqa Jehová kasqayta yachanankupaj”, nispa (Jer. 24:7). Chay judiosqa Jehovamanta ashkha imastañachá yacharqanku. Jinapis Jehovata rejsinankupajqa mana paymanta yachanallankuchu karqa, manaqa tukuy sonqonkuwan payta munakunanku karqa, kusichiytataj munananku karqa. Bibliamanta yachaj runa nerqa: “Munakuymanta parlaj librosta leeywan, pillatapis munakuywanqa mana kikinchu. Ajinallatataj Diosmanta wakin imasta yachaywan, payta rejsiywanpis manallataj kikinchu”, nispa. Chayrayku mana Dios kasqallantachu, nitaj imachus sutin kasqallantachu yachananchej tiyan. Manaqa imaynachus pay kasqanta, ima kʼacha kaykunasniyojchus kasqantapis allinta yachananchej tiyan.

5. ¿Imatá rey Josías yachachiwanchej Jehovata rejsiymanta?

⁵ Jehovata rejsiy niyta munallantaj imaschus payta kusichisqanta, imastajchus mana gustasqanta yachay. Rey Josiaspi piensarina. Paymanta Biblia nin: “Josiasqa pusaj watastaña kamachishajtin, jovenllaraj kashaspa ñaupa tatan Davidpa Diosninta sirviyta qallarerqa”, nispa (2 Cró. 34:3). Josiasqa mana Diospa Palabrallantachu estudiarqa, manaqa chay yachakusqanman jina ruwarqa. Profeta Jeremiasnejta Jehová nerqa Josiasqa ‘justiciata ruwasqanta, cheqan kajta ruwasqanta’, wajcha runasta, ñakʼarichisqa kajkunatapis yanapasqanta. Chantá nillarqataj: “¿Manachu payqa noqata rejsiwasqanrayku chayta ruwarqa?”, nispa (Jer. 22:15, 16).

6. Jehovata astawan rejsisun chay, ¿imatá ruwasun? (Salmo 9:10).

⁶ (Salmo 9:10 leey). Jehovata astawan rejsispaqa paypi astawan atienekunchej. Chaytaqa apóstol Pabloj kausayninpi sutʼita reparanchej. Paytaqa imastachus kausayninpi yachakusqan, imaspitajchus rikukusqan yanaparqa Jehovapi astawan atienekunanpaj. Chayrayku wañupunan qayllata carcelpi kayta qhelqarqa: “Mana pʼenqakunichu. Pipichus creeni chayta rejsini”, nispa (2 Tim. 1:12). Biblia de estudio nisqapi chay versiculoj sutʼinchaynin nin: “Pabloqa […] sutʼita yacharqa Jehovaqa payta sirvisqanta nipuni qonqapunanta, maychus tiemponpitaj kausarichimunanta”, nispa.

¿IMARAYKUTAJ KALLPACHAKUNANCHEJ TIYAN JEHOVATA ASWAN SUMAJTA REJSINAPAJ?

7. ¿Imataj pasawasunman tiempo pasasqanman jina?

⁷ Jehovamanta yachakuyta qallarishaspaqa tukuy imata ruwarqanchej paymanta ashkha imasta yachakunapaj. Jinapis tiempo pasasqanman jina Bibliata sapallanchejpi leeshaspa, chayri reunionespi kashaspa, ichapis niña tukuy atisqanchejtachu ruwanchej paymanta yachakunallapajpuni. Ichá chay pasawanchej imaynatachus noqanchejta yanapanawanchejpi astawan piensasqanchejrayku, chayri imaynatachus wajkunata yanapananpi piensasqanchejrayku. Chaytaj allillan. Imajtinchus Bibliapuni chayta ruwanata niwanchej (2 Tim. 3:16, 17). Jinapis aswan importanteqa kashan, imatachus Jehovamanta yachachiyta munawasqanchejpi piensarinanchej (Sal. 25:8-10). Chayrayku Bibliata leerispa kayta tapurikunapuni: “Kay leesqaypi, ¿imatataj Diosmanta yachakuni?”, nispa.a

8. ¿Imataj pasanqa Jehovata astawan rejsinapaj kallpachakojtinchej? (Salmo 73:24-28).

⁸ Jehovata astawan rejsispaqa paywan aswan sumaj amigosman tukunchej. Por ejemplo Bibliata leespa, JW Broadcastingta^® qhawaspa, chayri uj asambleaman rispaqa payman astawan qayllaykunchej. Imajtinchus chaypeqa paymanta astawan yachakorqanchej. Chayraykutaj sonqonchej aysawanchej payta jatunchanapaj, agradecekunapaj ima. Noqanchejqa salmista jina sientekunchej. Payqa Jehová mayta munakusqanpi tʼukuriytawan, kayta qhelqarqa: “Diosqa sonqoyta waqaychan, paymin pakakunay chhanka, paymin herenciayqa wiñaypaj wiñaynintinpaj”, nispa (Salmo 73:24-28 leey). Jehovata aswan sumajta rejsinapaj kallpachakuspaqa, astawan payman agradecekusunchej sumaj amigonchej kasqanmanta.

9. Jehovamanta yuyarikusunpuni chay, ¿imajtintaj imatapis allintapuni ajllasun? Kikinchariy.

⁹ Bibliaqa niwanchej ‘tukuy ima ruwasqasninchejpi Diosmanta yuyarikunata’ (Pro. 3:5, 6). Chayqa niyta munan Diosmanta imastachus yachakusqanchejta yuyarikunapuni kasqanta, imatapis ruwanapajtaj imaynachus Jehová sientekunanpi piensarinanchejpuni kasqanta. Chayta ruwasun chayqa, allin imastapuni ajllasun. Kaypi piensarina: Ashkha cristianosqa warminkoj fotonkuta chayri qosankoj fotonkuta escritorionkuman churanku, billeterankupi, chayri celularninkupi apaykachanku. Ajinamanta qosankumanta chayri warminkumanta yuyarikunkupuni, mayta munakusqankupitaj piensarinku. Chayqa yanapan paykunata kusichinankupaj jinapuni imatapis ajllanankupaj, nitaj sonqonkuta nanachinankupaj jina imatapis ruwanankupaj. Ajinallatataj Jehovamanta yuyarikusunpuni chayqa, payta kusichinanpaj jinapuni imatapis ajllasun (Sal. 19:13, 14).

10. Jehovamanta astawan yachakusun chay, ¿imatá ruwayta atisun?

¹⁰ Jehovaqa payman rijchʼakojta ruwawarqanchej. Chayrayku pay jina kʼacha kaykunasniyoj kayta atinchej (Gén. 1:26). Chay kʼacha kaykunasninmanta astawan yachakuspataj, astawan Jehová jina kayta atisun. Leymanta yachachejkunawan, fariseoswan imastachus mana allintachu ruwasqankupi piensarina. Paykunaqa mana Jehovaj kʼacha kaykunasninta rikuchiyta aterqankuchu. ¿Imarayku? Jesusqa paykunaman nerqa Leymanta wakin imasta juntʼajtinkupis, ‘Leymanta aswan allin kajta qonqapusqankuta: cheqan kajta, khuyakuyta, Diosta mana wasanchaytapis’ (Mat. 23:23). Ama paykuna jina kanachu. Astawanpis tukuy atisqanchejta kallpachakuna kamachiykunasninmanta, yuyaychaykunasninmanta paypa kʼacha kaykunasninta yachakunapaj. Chayta ruwasun chayqa, pay jina kʼacha kaykunasniyoj kasun (1 Juan 4:8, 11).

¿IMAYNATÁ JEHOVATA ASWAN SUMAJTA REJSISUNMAN?

11. ¿Imaynatá Jehovata rejserqanki?

¹¹ Jehovataqa ashkha imaynasmanta rejsiyta atinchej. ¿Imaynatá qan Jehovata rejserqanki? Ichapis tatasniyki Jehovamanta yachachisorqanku. Chaypajqa ichá ñaupa tiempopi imaschus pasasqanmanta Bibliapi leeripusorqanku, chayri Jehovaj ruwasqasninwan yachachisorqanku. Manachayri ichá uj Jehovaj testigon uj publicacionwan Bibliamanta yachachisorqa, Wiñaypaj kusisqa kausakuy nisqa librowan jina. Pichus yachachisojqa maytachá yanapasorqa Biblia imatachus nisqanpi, Jehovaj ruwasqasninpipis allinta tʼukurinaykipaj. Ajinamantataj repararqanki imayna kʼachachus Jehová kasqanta (Neh. 8:8; Hech. 14:17).b Imayna kajtinpis Jehovamantaqa yachakunallanchejpuni tiyan. Kunan qhawarisun kinsa imaynasmanta chayta ruwayta atisqanchejta.

12, 13. Bibliata leespa, ¿imastataj Jehovamanta yachakuyta atisunman? Sutʼinchariy (Jeremías 39:15-18; dibujotawan qhawariy).

¹² Ñaupaj kaj, qhawarinchej jina Jehovamantaqa astawan yachakunchej Palabranta leespa, estudiaspa ima. Bibliapeqa wakin partespi Jehovaj kʼacha kaykunasninta sutʼita nin (Éxo. 34:6, 7). Jinapis astawanqa runasmanta, imastachus ruwasqankumantawanpuni astawan parlan. Chay partesta leespaqa, tiempochakuna imastachus Jehovamanta yachachiwasqanchejpi tʼukurinapaj.

¹³ Kunan chayta practicarina. Jeremías 38:6-13 versiculosqa parlan, Ébed-Mélec profeta Jeremiasta salvasqanmanta. Chaypeqa facilta yachakuyta atisunman, Ébed-Mélec jina mana atikullajtinpis wajkunata yanapariyta, mana manchachikoj kayta, Jehovaj kamachisnintapis munakuyta. ¿Jinapis reparayta atinchejchu, imatachus Jehovamanta yachakuyta atisqanchejta? (Jeremías 39:15-18 leey). ¿Ima versiculotaj rikuchin Jehová agradecekuyta yachasqanta? ¿Mayqenpitaj rikuchin Jehová tukuyta uj rejllata qhawasqanta, cheqan kajtapunitaj ruwasqanta? ¿Imastawantaj chaypi Jehovamanta yachakunchej? Bibliamanta uj parteta leespaqa, reparanapuni imatachus Jehovamanta yachachiwasqanchejta, chaymantataj payta jatunchana, agradecekunataj.

14. ¿Imaraykutaj Diospa ruwasqasninpi sumajta tʼukurina tiyan?

¹⁴ Iskay kaj, qhawarerqanchej jina Jehovamantaqa astawan yachakuyta atillanchejtaj ruwasqasninpi tʼukurispa (Sal. 145:9, 10). Jinapis Diospa ruwasqasnintaqa mana qhawarpanallachu tiyan. Ashkha runasqa watasta estudianku plantasmanta, animalesmanta ima. Jinapis mana reparankuchu chay imastaqa Diospuni ruwasqanta, ni siquiera paypi creellankupischu. Jinapis apóstol Pablo nerqa: “Diospa mana rikukoj imasnenqa, […] paypa ruwasqasninpi sutʼi rikukun, runata rikhurichisqanmantapacha”, nispa (Rom. 1:20). Waj Bibliapi chay versículo nin “Diospa kʼacha kaykunasnintaqa pichus allinta piensariyta yachajlla reparayta atisqanta”. Chayrayku Diospa kʼacha kaykunasninta reparanapajqa ruwasqasninpi sumajta tʼukurina tiyan.

15. ¿Imatá Patrick ruwarqa Jehovata aswan sumajta rejsinanpaj, imaynatá noqanchejpis ajinata ruwasunman? (Fototawan qhawariy).

¹⁵ Ashkhasqa llajta ukhupi tiyakunchej, chaypitaj mana ashkha plantasta, nitaj ashkha animalitosta rikuyta atillanchejchu. Chay kutispipis Diospa ruwasqasninmanta yachakuyta atisunman. Hermanonchej Patrickqa Brazzaville llajtapi tiyakun, chaytaj República del Congopi kashan. Pay nin: “Kallpachakuni sapa diá Diospa ruwasqasninta allinta qhawarinaypaj. Rikuytapuni yachani juchʼuy khuritusta, chayri juchʼuy pʼisqetusta mikhunata maskʼakushajta, chayri maypichus thapachakunankuta maskʼakushajta. Uj kuti pʼisqetusta rikorqani thapachakunankupaj tukuy imata pallakushajta, chaypi irpitasniyoj kanankupaj”, nispa. Patrickqa mana chay imasta qhawallarqachu, astawanpis allinta tʼukurerqa imatachus chaywan Jehovamanta yachakusqanpi. Pay nin: “Chaypi repararqani Jehovaqa tukuy ruwasqasninmanta llakikusqanta, juchʼuy khuritusmantapis. Chayqa yuyarichiwan Jehovaqa mana noqamanta qonqapusqanta, necesitasqaytapis qonawantapuni”.

16. ¿Imatá María ruwarqa Jehovata aswan sumajta rejsinanpaj, imaynatá noqanchejpis pay jina ruwasunman? (Fototawan qhawariy).

¹⁶ Kinsa kaj, Jehovamantaqa astawan yachakullanchejtaj imastachus noqanchejrayku ruwasqanpi tʼukurispa. Chayta Jesuspa maman María ruwarqa. Payqa Jehovata sumajta rejserqa, paypa ñaupaqenpitaj ‘allinpaj qhawasqa’ karqa (Luc. 1:30). Jehovaqa Mariata Wawanpa maman kananta niytawan, ángel Gabrielnejta, parienten Elisabetnejta ima kallpacharqa, mana anchata llakikunanpajtaj yanaparqa. Chantataj Mariaqa imatachus Jehová payrayku ruwasqanpi tʼukurerqa. Chaypitaj aswan sutʼita repararqa Jehovaj atiyninta, khuyakuyninta, tukuyta uj rejllata qhawasqanta, pisipaj qhawasqa kajkunamantapis mana qonqapusqanta (Luc. 1:46-55). Noqanchejpis pay jinallataj Jehovaman agradecekunchej “yanapata necesitashajtinchejpuni” yanapawasqanchejmanta (Heb. 4:16). Kausayninchejpi Jehová imaynatachus yanapawasqanchejta rikuspa kayta tapurikuna: “¿Imatá kaypi Jehovamanta yachakuni? ¿Ima kʼacha kaykunasnintataj reparani?”.

JEHOVAMANTAQA YACHAKULLASUNPUNI

17, 18. ¿Imaraykutaj nisunman Jehovata rejsiyta ni jaykʼaj tukunanchejta?

¹⁷ Paraisopeqa Jehovamanta may chhikataraj yachakusun. Chaypeqa mosoj kʼuyuna librosta japʼisun, chaypitaj yachakusun imaynatachus Jehová kausakunanchejta munasqanta (Apo. 20:12). Chantapis Diospa ruwasqasninta allinninmanta qhawaspa astawan paymanta yachakuyta atisun (Isa. 11:6-9). Mana chayllachu, Jehovaqa munasqa familiaresninchejta, amigosninchejta kausarichimonqa, noqanchejtapis diamanta día mana pantayniyoj runasman tukuchiwasun. Tukuy chay imasta ruwasqanpi, waj imasta ruwasqanpipis munakuyniyoj Tatanchej Jehovata aswan sumajtaraj rejsiyta atisun.

¹⁸ Jinapis Jehovamanta yachakuytaqa ni jaykʼaj tukuyta atisunchu. Imajtinchus payqa wiñaymantapacha wiñaykama Dios, “yachayninpis mana tukukuyniyoj” (Sal. 90:2; 147:5). “Runasqa cheqa Diospa ruwasqasninta ni jaykʼaj rejsiyta atenqankuchu qʼalituntaqa” (Ecl. 3:11).Chayrayku kunallanraj chayri unaytaña Jehovata sirvispapis tukuy atisqanchejta ruwana Tatanchej Jehovata aswan sumajta rejsinapaj.