¿Diosninchej khuyakuwanchejchu?

¿IMAYNATÁ DIOS RUWAWARQANCHEJ?

Khuyakoj runaqa wajkunaj llakiyninkumanta llakikun, paypa llakiyninpis kanman jina. Chaypajqa llakiyniyoj runa imaynachus kashasqanpi piensarin. Uj doctor nin: “Wajkunata khuyakunapaj jinapuni ruwasqa kanchej”, nispa.

TʼUKURINA: Runaslla wajkunata khuyakunapaj jina ruwasqa kanchej. ¿Imaraykutaj runaslla ajina kanchej? Imaraykuchus Biblia nisqanman jina, runasqa Diospa rijchʼayninman jina ruwasqa kanchej (Génesis 1:26). Diosman rijchʼakunchej munakusqanchejpi, khuyakusqanchejpi ima. Khuyakusqanchejrayku wajkunata yanaparejtinchejqa, munakuyniyoj Diosninchej Jehová jinallataj ruwashanchej (Proverbios 14:31).

¿IMATÁ BIBLIA YACHACHIWANCHEJ?

Diosqa khuyakuwanchej, llakiypi kajtinchejtaj sonqon mayta nanan. Ñaupa tiempopi israelitasqa Egipto suyupi unayta esclavos karqanku. Chaymantataj 40 watasta chʼin pampaspi llakiyta puriykacharqanku. ¿Dios paykunamanta llakikorqachu? Arí. Biblia nin: “Llakisqa kashajtinku, paypis llakisqallataj kasharqa”, nispa (Isaías 63:9). Jehová Diosqa mana israelitaspa llakiyninkuta qhawakullarqachu, paypis llakikullarqataj. Payllataj nerqa: “Allinta yachani mayta sufrishasqankuta”, nispa (Éxodo 3:7). Diosninchej nillarqataj: “Pichus qankunata llankharejqa ñawi papayta llankhaykun”, nispa (Zacarías 2:8). Chayrayku pillapis ñakʼarichiwajtinchejqa, Diostapis ñakʼarichishankuman jina.

Wakin kuti sonqonchej juchachawanchej, yuyanchejtaj mana Diospa khuyakuyninta japʼinapaj jinachu kasqanchejta. Chay kutispi yuyarikuna “Diosqa sonqonchejmanta aswan kuraj kasqanta, tukuy imatataj yachasqanta” (1 Juan 3:19, 20). Diosninchejqa noqanchejmanta nisqa aswan sumajta rejsiwanchej. Payqa llakiyninchejta sumajta yachan. Yuyayninchejta, sonqonchejtapis sumajta rejsin, khuyakuwanchejtaj.

Biblia niwanchej

• “Mañakojtiyki Jehová Diosqa uyarisonqa, yanapata mañakuspa qhaparikojtiyki payqa nisonqa: ‘Noqa yanapasqayki’, nispa” (ISAÍAS 58:9).

• “Jehová Diosqa nin: ‘Noqaqa allinta yachani imatachus qankunapaj munasqayta. Noqaqa munani allinta kausakunaykichejta, manataj ñakʼarinaykichejtachu. Chayrayku ama iskayrayaychejchu aswan qhepamanpis allinta kausakunaykichejmanta. Qankunaqa wajyakamuwankichej, noqamantataj mañakuwankichej, noqataj uyarisqaykichej’, nispa” (JEREMÍAS 29:11, 12).

• “Diosníy, waqasqaytaqa sapa sutʼuyta botellaykipi waqaychay ari. Diosníy, yachani tukuy ñakʼarisqayta libroykipi qhelqasqaykita” (SALMO 56:8).

DIOSNINCHEJQA LLAKIKOJTINCHEJ LLAKIKULLANTAJ

Dios khuyakuwasqanchejta yachay, ¿llakiykunapi kajtinchej yanapawanchejchu? Arí. Mariaj kausayninmanta parlarina.

Pay nin: “Wawayqa iskay watasta cancerwan mayta ñakʼariytawan, 18 watasniyoj wañuporqa. Chayrayku kausayneyqa llakiylla karqa. Jehová Dios wawayta mana sanoyachisqanmanta, paypaj phiñasqa kasharqani.

”Chaymanta sojta watasninman, uj kʼacha amigayman Dios mana munakuwasqanta nerqani. Paytaj mana pantachispa unayta uyariwarqa. Chaymantataj Bibliapi 1 Juan 3:19, 20 versiculosta leeripuwarqa. Chaypi nin, ‘Diosqa sonqonchejmanta aswan kuraj kasqanta, tukuy imatataj yachasqanta’. Chantá amigayqa niwarqa, Diosninchej llakiyninchejta sumajta entiendesqanta.

”Jinapis Diospaj phiñasqallapuni kasharqani. Ajinapi Salmo 94:19 versiculota leererqani. Chaypi nin: ‘Llakiykuna sinchʼita phutichishawajtin qanmin sonqochawarqanki, kusichiwarqankitaj’, nispa. Chay versiculoj nisqanqa sonqoy ukhukama chayarqa. Ajinapi Jehová Diosman llakiyniyta willakuyta atillarqani. Yacharqani pay uyariwasqanta, entiendewasqanta ima. Niña Diospaj phiñasqachu kasharqani”.

Diosninchej llakiyninchejta entiendesqanta, khuyakuwasqanchejtataj yachayqa, mayta sonqochawanchej. Chanta, ¿imaraykutaj llakiykuna mana tukukunchu? ¿Juchasninchejraykuchu Dios castigashawanchej? ¿Maykʼajllapis Diosninchej llakiykunata chinkachenqachu? Chayta qhepan yachaqanaspi yachakusun.