Congregacionmanta predicanapaj gruposqa mayta yanapawanchej

1, 2. ¿Imatá wakin hermanos ninku congregacionpi predicanapaj grupos kasqanmanta?

SUMAJ willaykunata willanaykipaj publicadorña kasqaykita nisojtinku, ¿imaynataj kasharqanki? May kusisqachá kasharqanki. Imajtinchus chay diamantapacha Diospa kamachisninman ujchaykukorqanki. Paykunaqa ashkha kanku, Diospa sutintataj jatunchanku (Sal. 148:1, 2, 12, 13). Chantapis chay diamantapacha congregacionmanta ujnin grupoman yaykorqanki. Chaytataj rejsinchej predicanapaj grupo nispa. Chay gruposqa yanapawanchej Diospa Gobiernonmanta sumaj willaykunata “jallpʼantinpi” willanapaj (Mat. 24:14).

² Qanri, ¿imatá ninki congregacionpi predicanapaj grupos kasqanmanta? Wendya sutiyoj hermana nin: “Uj grupopi kayqa noqata mayta yanapawarqa. Hermanosmantaqa yachakorqani aswan sumajta predicayta, yachachiyta ima. Chantapis yanapawarqanku Diosman qayllaykunaypaj ashkha imasta ruwanaypaj, ashkha amigostataj ruwakorqani”, nispa. Rich sutiyoj hermanotaj nin: “Noqapajqa congregacionpi uj grupomanta encargado kayqa may sumajpuni. Uj publicadorpa estudion bautizakojtin, grupomanta encargado hermanoqa yanapayta atin Jehovata sirviypi ñauparinallanpajpuni. Chaytaj may sumajpuni”, nispa. Dinah sutiyoj hermanataj nin: “Mayta gustawan congregacionpi predicanapaj grupos kasqan. Grupoymanta hermanosqa familiay jina kanku”, nispa.

3. ¿Imastá kay yachaqanapi yachakusun?

³ Kay yachaqanapi ñaupajta parlarisun predicanapaj grupomanta superintendentewan, nisunman grupomanta encargadowan auxiliarninwan ima ruwanasniyojchus kasqankumanta, imaynatachus gruponkupi kaj hermanosta cuidanankumantapis. Chantá parlarisun imaynatachus sapa ujninchej gruponchejpi yanapakunamanta. Tukuchanapajtaj parlarisun imaynatachus uj grupopi kay yanapawasqanchejmanta.

GRUPOMANTA ENCARGADOWAN AUXILIARNINWAN

4. 1) ¿Imatataj ruwan grupomanta encargado hermano? 2) ¿Imaynatá grupomanta encargado hermano gruponmanta kajkunata cuidan? (“Grupomanta encargadospaj yuyaychaykuna” nisqa recuadrotawan qhawariy).

⁴ Predicanapaj grupomanta encargadoqa uj anciano.b Paytaqa congregacionmanta tukuynin ancianos churanku, uj grupo publicadoresta Diosta sirviypi ñauparinallankupajpuni yanapananpaj. Chaytaqa kay kinsa imaynasmanta ruwan. Uj kaj, payqa gruponmanta sapa ujta yanapananpaj kallpachakun (Pro. 27:23). Chay hermanoqa gruponmanta kajkunata sumajta rejsin, paykunawantaj parlarinpuni imaynachus kashasqankuta yachananpaj. Ajinamanta atin Diospa qayllallanpipuni kanankupaj yanapayta, llakisqas kashajtinku munakuywan kallpachariyta, imata necesitasqankupipis yanapayta ima (Pro. 12:25; Isa. 32:2; Sant. 2:15-17). Iskay kaj, gruponmanta sapa publicadorta yanapan tukuy atisqanta predicananpaj. Grupomanta encargado hermanoqa sapa semana gruponwan predicananpaj kallpachakun, astawanraj semana tukukuyta. Chantapis gruponmanta sapa ujwan predicaytapuni yachan. Ajinamanta sapa ujninkuta kallpachananpaj, wakichinanpajtaj. Sichus predicacionman mana llojsiyta atenqachu chayqa, auxiliarninta chayri waj wakichisqa publicadorta nin predicanapaj grupota orqhonanta. Kinsa kaj, bautizasqa qharista yanapan congregacionpi astawan ruwanasta japʼinankupaj (1 Tim. 3:1). Sonqomantapacha felicitan, Bibliawan yuyaychan, sapa kutitaj wakichin imatachus ruwanankuta siervos ministeriales, ancianos ima kanankupaj. Yachakunchej jina, grupomanta encargadospa ruwayninkoqa may importante. Chayrayku congregacionmanta tukuynin ancianosqa, chay llankʼayta juntʼanankupaj jina ancianosta ajllanku grupomanta encargados kanankupaj.

5. ¿Imajtintaj mana atikullanchu grupomanta encargado jina ruwaykunata juntʼay?

⁵ Congregacionpi ujnin grupomanta encargado jina ruwaykunata juntʼayqa wakin kutis mana atikullanchu. Alemaniapi tiyakoj uj hermanomanta parlarina. Payqa ujnin grupomanta encargado. Ashkha ancianos jinataj congregacionpi ashkha ruwanasniyoj. Pay nin: “Ashkha ruwanasniyoj kasqayrayku mana atillanichu grupoymanta tukuy publicadoreswan parlariyta”, nispa. Ugandamanta 70 watasniyoj Abel sutiyoj ancianotaj nin: “Congregacionniykupeqa pisi ancianoslla, pisi siervos ministerialesllataj tiyan. Chayrayku congregacionniymanta grupospeqa ashkhas kayku. Chayraykutaj mana atillanichu grupoymanta tukuy publicadoresta munasqayman jina sapa kuti kallpacharinaypaj visitariyta”, nispa. Surinammanta Obed sutiyoj ancianotaj nin: “Mayta gustawan wajkunata wakichiy, jinapis chaypajqa tiempo, kallpa ima necesitakun. Wakin kutistaj wakichini chay hermanosqa mana chay ratochu ñauparinku. Chayrayku wajkunata wakichiytaqa chay rato qonqapuni”, nispa. ¿Imataj ancianosta yanapanman chayman rijchʼakoj waj imaspi rikukojtinku?

6. ¿Imaraykutaj allin congregacionmanta grupos juchʼuykunalla kananku?

⁶ Atikojtenqa congregacionmanta gruposqa juchʼuykunalla kananku tiyan. Ajinamanta grupomanta encargados gruponkumanta hermanosta sumajta rejsinankupaj, Diospa qayllallanpipuni kanankupajtaj sumajta yanapanankupaj. Jinapis congregacionpi pisi ancianoslla kajtinkurí, ¿imatá ruwankuman? Congregacionmanta tukuynin ancianosqa, uj siervo ministerialta ninkuman uj tiempota uj grupomanta encargakunanta. Imajtinchus congregacionpi jatuchaj grupos kajtenqa, grupomanta encargadosqa mana ruwanasninkuta allinta juntʼayta atinkumanchu. Grupos juchʼuylla kajtenqa encargadosqa aswan sumajta hermanosta, hermanastapis cuidayta atinku. Chay ruwayninkutaj aswan importante.

7. Congregacionpi pisi ancianoslla kan chay, ¿imatá grupomanta encargados ruwankuman gruponkumanta kajkuna sumaj cuidasqa kanankupaj? (1 Pedro 5:2; fototawan qhawariy).

⁷ Congregacionpi ujnin grupomanta encargado kanki, pisi ancianosllataj tiyan chayqa, auxiliarniykita wakichiy. Ajinamanta Diospa ovejitasninta cuidaspa yanapasunanpaj (1 Pedro 5:2 leey). Wakin ruwanasta qowaj. Por ejemplo wakin kutisqa payta niwaj predicacionman llojsinapaj tantakuyta ruwananta, predicacionmantataj chay día encargakunanta. Orakuytawan parlariychej imaynatachus grupoykichejmanta sapa publicadorta aswan sumaj yachachejkuna kanankupaj, Diospa qayllallanpipunitaj kanankupaj yanapanaykichejmanta. Auxiliarniykiwan acompañachikuypuni hermanosta kallpacharej visitarej rinaykipaj. Niraj rishaspataj ñaupajmantaña willariy imaynatachus chayta ruwanaykichejta. Chayta ruwaytawan payta kallpachariy, imaynatachus aswan sumajta ruwanantataj yuyaychariy. Chayta ruwasqaykeqa ichapis chay hermanota yanapanqa aswan qhepaman uj grupomanta encargado kananpaj (2 Tim. 2:2). Chantapis grupoykimanta wiñay tukusqa hermanoswan hermanaswan yanapachikuwaj hermanosta wakichiypi yanapasunankupaj. Por ejemplo precursoresta, experienciayoj hermanostapis niwaj mosoj publicadoreswan, manaraj ancha unaytachu predicashanku chaykunawanpis predicanankuta. Paykunaqa yanapankuman parlayta qallarinankupaj, revisitasta chayri estudiosta ruwanankupaj. Kunanqa parlarina kinsa imaspi predicanapaj gruponchejpi yanapakuyta atisqanchejmanta.

IMAYNASMANTACHUS GRUPONCHEJPI YANAPAKUNAMANTA

8. ¿Imatá ruwasunman gruponchejpi yanapakunapaj? (Romanos 1:12).

⁸ Gruponchejwan predicana. Gruponchejwan khuska predicayqa yanapawanchej “purajmanta kallpachanakunanchejpaj” (Romanos 1:12 leey). Yanapallawanchejtaj runaswan parlashaspa mana anchata manchachikunapaj, wakin lugarespi mana manchachikuspa predicanapaj ima. Trabajorayku gruponchejwan mana predicayta atinchejchu chayqa, jefenchejwan parlarisunman trabajomanta horarionchejta cambianawanchejpaj. Ichapis payqa niwasun waj día, chayri waj horariopi trabajanata (Neh. 2:4-6). Onqosqa kasqanchejrayku chayri machitusña kasqanchejrayku, maymantachus predicakonqa chayman mana riyta atillanchejchu chayqa, gruponchejmanta encargadowan parlarina. Ichá payqa arreglosta ruwanqa Zoomnejta gruponchejwan conectakunapaj, chaypi cartasta ruwanapaj chayri telefononejta predicanapaj. Ichapis qanqa joven kanki, sanitotaj. Jinapis mana atillankichu predicacionman llojsiyta. Jina kajtenqa grupoykimanta uj hermanowan sapa semana predicanaykipaj arreglosta ruwawaj. Chaypajqa ichapis imatachus kausayniykipi ñaupajman churashasqaykita, tiempoykitapis imaynatachus apaykachashasqaykita allinta qhawaykurinayki kanqa (Rom. 12:11; Col. 4:5). Ima cambiostachus ruwasqaykeqa mana qhasichu kanqa. Chantapis Jehovamanta mañakuy ‘ruwayta munanaykipaj, ruwayta atinaykipajtaj’ yanapasunanta (Fili. 2:13).

9. ¿Imatá ruwasunman gruponchejpi familia jina munanakunapaj? (Romanos 12:13).

⁹ Wasinchejman wajyarikuna. Gruponchejmanta hermanosta ‘kʼachamanta japʼikuspaqa’, nisunman wasinchejman wajyarikuspaqa, yanapashanchej munasqas sientekunankupaj (Romanos 12:13 leey). Por ejemplo nisunman wasinchejmanta predicacionman llojsikunanta. Wakin congregacionespi gruposqa turnakunku discursanteta mikhuchej pusanankupaj. Gruponkuman tocajtintaj wakin hermanosqa tantakuytapuni yachanku khuska mikhunankupaj, uj rato karinankupaj ima, discursante mana qhepakojtinpis. Sarah sutiyoj precursora especial nin: “Invitados kapuwajtenqa anchata llakikuni imatachus ruwanaymanta. Chayrayku sumaj imasta waykʼuypi yuyanaymantaqa, kallpachakuni hermanosta astawan rejsinaypaj”, nispa. Gruponchejpi uj familia jina munanakunapaj kallpachakusun chayqa, Jehovaman, hermanosninchejmanpis astawan qayllaykusun (Neh. 8:10; Hech. 20:35).

10. ¿Imatataj ruwasunman aswan sumaj predicajkuna, aswan sumaj yachachejkunataj kanapaj? (Proverbios 1:5; 27:17; fototawan qhawariy).

¹⁰ Noqanchej yanapata mañakuna. Aswan sumaj predicajkuna kaspa, aswan sumajtataj yachachispaqa, aswan kusisqas gruponchejwan predicasun. ¿Imallapipis astawan mejorasunmanchu? Ichapis yanapata mañakusunman gruponchejpi kaj precursoresmanta, chayri unaytaña willashanku chaykunamanta (Proverbios 1:5; 27:17 leey). Chantapis imapichus mejorayta munasqanchejta gruponchejmanta encargadoman willarina. Payqa tukuy atisqanta yanapawasun. Heather sutiyoj hermananchejmanta parlarina. Payqa ancha manchali, nintaj: “Uj kʼacha precursorata nerqani revisitasta ruwanaypaj yanapanawanta. Paytaj noqawan sapa kuti predicaj llojsinanpaj arreglosta ruwarqa. Ujnin revisitayman Bibliamanta yachachiyta qallarinaypajpis yanapawarqa. May kusisqapuni kashani yanapata mañakusqaymanta. Kunanqa predicaspa watejmanta mayta kusikuni”, nispa. Sutʼita reparanchej ashkha imaynasmanta gruponchejpi yanapakuyta atisqanchejta.

¿IMAYNATÁ UJ GRUPOPI KAY YANAPAWANCHEJ?

11, 12. Congregacionmanta ujnin grupopi kay, ¿imaynasmantá yanapawanchej? Wendymanta parlariy.

¹¹ Jehovaj qayllallanpipuni kanapaj yanapawanchej. Congregacionmanta ujnin grupopi kay imaynatachus yanapawasqanchejmanta wakin imasta qhawarina. Jehovaqa viudas kajkunata, wajcha wawasta, machitustapis mayta munakun. Congregacionmanta ujnin grupopi kasqankuraykutaj, encargadosqa paykunata sumajta kallpacharinku, necesitasqankuman jinataj visitariyta atinku (1 Tes. 2:8; Sant. 1:27). Chantapis yanapawanchej Diospa Gobiernonmanta aswan sumajta predicanapaj, yachachinapaj ima. Ñauparishanku chay bautizasqa qharistapis congregacionpi astawan ruwanasta japʼinankupaj aswan sumajta wakichikun (1 Tim. 3:10).

¹² Hermananchej Wendymanta watejmanta parlarina, pay nin: “Tatay mana testigo kanaykuta munasqanrayku, mamayqa ashkha kutispi semana tukukuyta mana grupowan predicaj llojsiyta atillajchu. Jinapis noqamanqa permisota qowaj rinaypaj. Uj kuraj precursora maytapuni yanapawarqa. Paywanqa sapa kuti predicaj llojsejpuni kayku. Ashkha sumaj imasta yachachiwarqa, chaytaj predicacionpi, congregacionpipis mayta yanapawarqa. Yuyarikuni grupoymanta encargadopis ashkha kutispi Bibliawan munakuywan yuyaychawasqanta, chaytaj kunankama yanapashallawanpuni”, nispa.

13. Congregacionmanta ujnin grupopi kasqanchej, ¿imaynatá yanapawanchej? (Fototawan qhawariy).

¹³ Sumaj amigosniyoj kanapaj yanapawanchej. Gruponchejmanta hermanoswan ‘ujchasqa’ predicaspaqa, paykunawan aswan sumaj amigos ruwakunchej (Fili. 1:27). Chantapis juchʼuy gruposlla kasqankurayku, piskunachus manchachikunku, ashkha ukhupitaj mana kayta atillankuchu chaykunaqa amigosta ruwakuyta atillanku (2 Cor. 6:13). Onqosqas kajtinchej, sinchʼi llakiywan kajtinchej, chayri mayqen familiarninchej wañupojtintaj gruponchejmanta hermanosqa ladonchejpipuni kanqanku (1 Tes. 5:14). Manchay ñakʼariy tiempo astawan qayllaykamusqanman jinataj, sumaj amigosniyoj kayta astawan necesitasun (Mat. 24:21). Ichá problemasninchejqa mana chinkanqachu. Jinapis hermanosninchej munakuwasqanchejta, yanapanawanchejtapunitaj yachayqa chay problemasninchejta aguantanapaj yanapawanchej (Pro. 17:17).

14. Ima emergenciapipis kajtinchej, ¿imaynatá yanapawanchej congregacionmanta uj grupopi kasqanchej?

¹⁴ Desastres naturales kajtin chayri ima emergenciapis kajtin yanapawanchej. Gruponchejmanta hermanosqa maytapuni yanapawanchej, jatuchaj onqoykuna kajtin, desastres naturales kajtin, kaymanta jinalla onqoykojtinchej, qhatiykachasqas kajtinchej chayri qolqe pisiyajtin. Por ejemplo congregacionmanta Comité de Serviciopi kaj ancianosqa, gruposmanta encargadoswan khuska, niraj ima emergenciapis kashajtin allinta qhawaykurinku imaynatachus astawan necesitaj hermanosta yanapanankuta. Chantapis gruposmanta encargadosqa, ima emergenciapis kajtin gruponmanta tukuynin hermanosta wajyarinku, qhawarinkutaj piskunachus chay rato yanapata chayachinata necesitashasqankuta. Ichapis paykunaqa necesitankuman medicamentosta, mikhunata, yakuta, maypipis alojarikuyta, ropata ima. Gruponchejmanta hermanosqa imapi rikukojtinchejpis munakuywan yanapawasunpuni. Chayta yachayqa maytapuni kusichiwanchej.

15. ¿Imatá ruwayta munanchej Jehovaj llajtanpi kajkuna?

¹⁵ Qallariypi nerqanchej jina Diospa llajtanqa may jatunpuni. Cielopeqa may chhika ángeles payta yupaychashanku. Kay jallpʼapitaj 9 millonesña kamachisnin kanchej, yapakushallanchejpunitaj (Zac. 8:23; Apo. 5:11). Cielopi angeleswan, kay jallpʼapi Diospa kamachisninwanqa ujchasqas Gobiernonmanta sumaj willaykunata willashanchej (Apo. 14:6, 7). Chayrayku tukuy atisqanchejta yanapachikuna gruponchejmanta hermanoswan. Paykunaqa Jehovata tukuy sonqo yupaychanapaj yanapawanchej (Sal. 111:1).