Allinta uyarina

1, 2. 1) ¿Imatá kay tiempopi Jehová qoshawanchej? (Salmo 23:1, 2, 5). 2) ¿Imastá kay yachaqanapi qhawarisun?

KAY tiempopi Jehovaqa ashkha yachachiykunata mikhunata jina qoshawanchej. Chayrayku David jinachá ninchej. Pay nerqa: “Jehová Diosqa ovejitanta jina michikuwan. Ni ima faltawanchu”, nispa (Salmo 23:1, 2, 5 leey).

² Jehovaqa tantakuykunanejta paymanta yachachishawanchej. Chaypeqa imastachus yachanchejña chay imasmanta watejmanta yachakuyta yachanchej. Chay imasta yuyarichinawanchejtaqa necesitanchejpuni, ‘cheqa kajta yachasqanchejpi sinchʼi sayasqaña kanchej chaypis’ (2 Ped. 1:12). Ashkha kutistaña uj temamanta estudiakorqa chaytaqa, watejmanta estudiakojtin niña allinta uyariyta atillanchejchu. Kay yachaqanaqa mayta yanapawasun. Qhawarisunchej pipunichus tantakuykunapi yachachishawasqanchejta, imaraykuchus allinta uyarina kasqanta, discursantes sumajta uyarinanchejpaj imastachus ruwananku kasqanta, chantá sumajta uyarinapaj imastachus ruwananchej kasqanta ima.

JEHOVÁ TANTAKUYKUNAPI YACHACHISHAWANCHEJ

3. ¿Imaynatá Jehová parlawanchej, chanta imaynatá kamachisnin Bibliata apaykachanku?

³ Jehovaqa Palabran Biblianejta parlawanchej (2 Tim. 3:16, 17). Jesusqa chayta sutʼita yacharqa. Chayrayku Diospa Palabranwan sumajta yachachej. Chay jina sumajta yachachisqanta uyarispa wakin runasqa nerqanku: “¿Imaynapitaj kay runa Diosmanta Qhelqasqata allinta rejsin ni pi yachachejtillanri?”, nispa (Juan 7:15). Kʼumuykukoj sonqo runasqa tukuy sonqo uyarikoj kanku Jesús Diospa Palabranmanta yachachisqanta. Ñaupa cristianosmanta wakinpis, Pablo jina, Apolos jina Qhelqasqaswanpuni wajkunata tʼukurichej kanku (Hech. 17:2, 3; 18:24, 28). Jehovaj testigosninpis yachanchej tukuynin publicacionesninchej, discursos, JW Broadcasting®, videos ima Bibliaj nisqanman jinapuni kasqanta. Tantakuykunaman primera vez jamojkunaqa Bibliawanpuni tukuy imata yachachisqanchejta rikuspa tʼukunku. Tantakuykunasninchejpi asignacionesniyoj kajkunaqa Bibliawanpuni yachachinku. Paykunaqa mana leemullankuchu, manaqa allinta entiendechiwanchej, imaynatachus chayman jina ruwanapajtaj yanapawanchej (Luc. 24:32).

4. ¿Imaraykutaj tantakuykunapi sumajta uyarina tiyan?

⁴ Pitapis kasukunapajqa ñaupajta imatachus nishawasqanchejta allintaraj uyarina tiyan. Ajinallatataj Jehovaj munayninman jina ruwanapajqa, ñaupajtaqa imatachus tantakuykunapi yachachiwasqanchejta sumajta uyarina tiyan. Allinta uyarisun, chayman jinataj kausakusun chayqa Jehová allinpaj qhawawasun (Pro. 27:11).

¿IMARAYKUTAJ TANTAKUYKUNATA SUMAJTA UYARINA TIYAN?

5. Jehovata munakusqanchejrayku, ¿imatataj ruwayta munasun? (Juan 4:23, 24; 1 Juan 5:3).

⁵ Jehovata munakusqanchejrayku (Mat. 22:37). Jehovamanta astawan yachakuspaqa payta astawan munakusun. Chay munakuytaj tanqawasun payta uyariyta munanapaj, kasukunapaj, munasqanman jinataj yupaychayta munanapaj (Juan 4:23, 24; 1 Juan 5:3 leey).

6. ¿Imastataj tantakuykunapi yachakunchej?

⁶ Runasta munakusqanchejrayku (Mat. 22:39). Jehovaqa tantakuykunapi yachachiwanchej hermanosta, payta mana rejsej runastapis yanaparinata. Por ejemplo Munakuywan yachachiy folletoqa yanapawanchej predicacionpi runaswan kʼachas kanapaj. Ichapis parlakusqanchejman jinalla runaswan mana parlariyta atillanchejchu. Ajina chayqa chaupi semana tantakuypi sumajta uyarina imaynatachus hermanos, hermanaspis asignacionesninkuta ruwasqankuta.

7. ¿Imaraykutaj kunan Jehovata kasukunallanchejpuni tiyan?

⁷ Kausayta jatunpaj qhawasqanchejrayku. Jehová ñaupa tiempomanta kamachisninman nerqa jina, noqanchejpis Palabranpi imatachus niwasqanchejta kasukunanchej tiyan. Chaymanta kashan kay tiempopi kusisqa kausakunanchej, aswan qhepamanpis wiñay kausayta japʼikunanchej (Deu. 32:44-47). Tantakuykunapi sumajta uyarispaqa, kallpachasqas kasunchej mosoj kausay chayamunankama aguantanapaj (Rom. 8:25). Qhepa pʼunchaykunapi kausakusqanchejrayku Jehovata kasukunanchejpuni tiyan, payta sirvispataj ocupasqas kananchej tiyan (Mat. 24:42-44; Apo. 1:3).

¿IMAYNATÁ WAJKUNATA YANAPASUNMAN SUMAJTA UYARINANKUPAJ?

8. ¿Imajtintaj hermanos kallpachakunallankupuni tiyan aswan sumaj discursosta qonankupaj?

⁸ Plataformamantapacha yachachejkunaqa, astawanraj tukuypaj discursota qojkunaqa, kallpachakunallankupuni tiyan aswan sumaj yachachejkuna kanankupaj. Uj sumaj wakichisqa discurso, Bibliaman jinapunitaj kajtenqa, uyarejkunata mayta yanapanman. Ichapis chay discursota uyarej runasqa cheqa kajmanta astawan yachakuyta munanqanku, hermanospis kallpachasqas kanqanku sinchʼita sayanallankupajpuni. Tantakuypi asignacionesniyoj kajkunaqa, amapuni qonqanankuchu tiyan yachachisqankoqa yuyasqankumantapis astawanraj uyarejkunata yanapayta atisqanta. Chay jina asignacionta qosonqanku chayqa, allinta qhawaykuriy imaynatachus kay urapi yuyaychaykunaman jina ruwanaykita. Chay yuyaychaykuna tukuypaj discursota qojkunapaj kajtinpis, yanapayta atillawasunmantaj tantakuykunapi asignacionesniyoj kajkunata (2 Tim. 4:2; Tito 1:9).

9. ¿Imatá ruwawaj discursoyki facilta entiendenapaj jina kananpaj?

⁹ Discursoyki sutʼisitu kachun. Discursoykita mana sutʼitachu sutʼinchajtiyki, ancha ashkha imasmantataj parlaykojtiyki ichapis uyarejkunaqa mana entiendesonqankuchu. Discursoyki facilta entiendenapaj jina kananpajqa kay kinsa imasta ruwawaj: Uj kaj, qallariymantapacha willay discursoykipi imasmantachus parlarinaykita. Iskay kaj, ujmanta uj sutʼinchariy. Sapa puntoman pasanaykipaj tumpata samariy, willariytaj mayqenmantañatajchus parlarinaykita. Kinsa kaj, tukuchashaspa imastachus sutʼinchasqaykimanta pisi parlayllapi uj repasota jina ruway.

10. ¿Imajtintaj discursonchejpi imasmantachus parlananchejwan gustachikunanchej tiyan?

¹⁰ Discursoykipi imasmantachus parlanki chaywan gustachikuy, tukuy sonqo parlanaykipaj. Uj tema maytapuni gustaykapuwajtinchejqa, chaymanta mayta parlariyta munanchej. Chaytataj uyarejkunaqa sutʼita noqanchejpi reparanku (Pro. 2:4, 5; Hech. 4:20). Discursoykipi imasmantachus parlanayki kashan chay ajinata gustaykusunanpajqa, allinta tʼukuriy discursoykipi imasmantachus parlanayki kashan chaypi, ima textoschus tiyan chaypipis. Estados Unidosmanta uj hermanonchejqa joven kashaspa uj discursota uyarerqa, chaytataj ni jaykʼaj qonqakorqachu. Payqa 70 watas kurajniyojña, pay nin: “Yuyarikuniraj uj hermano discursonpi Bibliata leesqaykupi sumajta tʼukurinaykupaj kallpachawasqaykuta. Payqa sutʼisituta niwarqayku imaynatachus chayta ruwanaykuta. Uyitanpitaj sutʼi reparakorqa chaymanta parlay mayta payman gustasqan. Chay discursoqa may sumajpuni noqapaj karqa. Chaymantapacha Bibliata leespa astawan yachakorqani, Jehovamanpis astawan qayllaykorqani”.

11. Discursospi, ¿imaraykutaj yuyaychaykuna uyarejkunata yanapananpaj jinapuni sutʼi kanan tiyan? (1 Timoteo 4:13-16).

¹¹ Imata yachakuytachus uyarisojkuna necesitasqankupi piensariy, chayman jina ruwanankupajtaj sumajta yuyaychariy. Imastachus yachankuña chayta watejmanta sutʼinchanaykimantaqa, Bibliawan uyarisojkunata sumajta kallpachariy, yachakushasqankuman jina imaynatachus ruwanankutataj sutʼisituta yuyaychariy. Apóstol Pabloqa, Timoteoman nerqa Efesopi sirvishaspa Jehovamanta mana karunchakunanpaj imastachus ruwananta (1 Timoteo 4:13-16 leey). Sumajtapuni tʼukuriy uyarisojkuna imata yachakuytachus necesitasqankupi, rikuchiytaj imaynatachus chayman jina kausayninkupi ruwanankuta.

12. ¿Imaraykutaj parlakusqanchejman jinalla discursananchej tiyan?

¹² Jatunmanta parlaspa discursoykita practicay, parlashawajpis jina qonaykipaj. Discursoykita leenaykimantaqa, kallpachakuy parlakusqaykiman jinalla ruwanaykipaj. Ajinamanta uyarisojkunaqa sumajta uyarisonqanku, yachachisqaykiwantaj yanapachikonqanku. Leellaypuni, yachachillaypunitaj nisqa folletoqa yuyaychawanchej ‘parlakusqanchejman jinalla tukuy sonqo parlarinata’. Uyarisojkunaqa chaypi reparanqanku chay tema mayta gustasusqanta, paykunatataj yanapariyta munasqaykita. Discursoykita parlakusqaykiman jinalla tukuy sonqo ruwajtiykeqa, sumajta uyarisonqanku, imastachus yachachishasqaykimanta astawan yachakuyta munanqanku, chayman jinataj kausakuyta munanqanku.

13. Discursota qonanchej kashan chay, ¿imaraykutaj unayña discursosta qoj hermanoswan yuyaycharichikunanchej tiyan? (Fototawan qhawariy).

¹³ Unayña discursosta qoj hermanowan yuyaycharichikuy. Ñaupajmantaña rikuchiwaj imaynatachus wakichikushasqaykita, imastachus yuyaycharisusqantataj yapaykuwaj. Chantapis niwaj discursoykita uyarisunanta, chaymantataj astawan sumajta ruwanaykipaj yuyaycharisunanta (Pro. 1:5). Wakin kutisqa mana reparakuyta atillanchejchu sutʼitachus manachus yachachishasqanchejta. Chayrayku uyarisoj hermanoqa nisunkiman imaynatachus wakin imasta aswan sumajta sutʼinchanaykita. Tukuypis munanchej aswan sumajta discursayta, aswan sumaj yachachejkunataj kayta. Ajinamanta wajkunata sumajta yanaparisun Bibliaj nisqanta aswan sumajta entiendenankupaj, chayman jinataj kausakunankupaj.a

¿IMATAJ YANAPAWASUN SUMAJTA UYARINAPAJ?

14. ¿Imajtintaj 119 Salmota qhelqaj jina kananchej tiyan? (Salmo 119:24, 111, 167).

¹⁴ Jehová imastachus yuyarichiwasqanchejmanta agradecekunapuni, ajinamanta tantakuykunapi sumajta uyarisun. Kay tiempopi ‘kausay may llakiy kasqanrayku, maytataj sajrayapusqanrayku’, imaymana llakiykunapi rikukunchej, chay imasta aguantanapajtaj Jehová wakin imasta yuyarichinawanchejta necesitanchej (2 Tim. 3:1). Kikin temamanta ashkha kutistaña yachakunchej chayqa, allin kanman 119 Salmota qhelqaj jina kananchej. Payqa Jehovaj yuyarichisqasninmanta maytapuni agradecekorqa (Salmo 119:24, 111, 167 leey).

15. ¿Imataj yanapawasun tantakuykunapi yachakusqanchej yachachiykunamanta agradecekunallapajpuni?

¹⁵ Tantakuykunanejta Jehová imastachus yachachiwasqanchejmanta agradecekunapuni. Chʼin jallpʼapi kashajtinku imachus israelitasta pasasqanmanta parlarina. Jehová maná nisqata qojtin paykunaqa qallariypi maytachá agradecekorqanku. Imaraykuchus chayqa Jehovamantapuni jamorqa, may miskʼi karqa, kausanallankupajpunitaj yanaparqa (Éxo. 16:15, 31). Jinapis maná nisqata sapa día mikhuspa amichikaporqanku, niñataj Jehovaj regalonta jinachu qhawarqanku (Núm. 21:5). Manapuni munasunmanchu israelitasta jina pasanawanchejta. Tantakuykunasninchejpeqa imastachus yachanchejña chay imasmanta wakin kutis yachakushallanchejpuni. Jinapis ama chaywan saykʼupunachu, astawanpis agradecekunallapuni. Yuyarikuna chayqa Jehovamantapuni jamusqanta, Jehovaj llajtantaj sumajta wakichisqanta. Chay yachachiykunaqa yanapawanchej kausayninchejpi allin imasta ajllanapaj, wiñay kausaytapis japʼikuyta atinapaj (Pro. 3:13, 16-18; Juan 17:3).

16. ¿Imataj ashkha watastaña Jehovata sirvej testigosta yanaparqa, tantakuykunata sumajta uyarinallankupajpuni? (“Sumajta uyarinapaj yuyaychaykuna” nisqa recuadrotawan qhawariy).

¹⁶ Kay urapi kaj yuyaychaykunaman jina ruwana. Wakin hermanosqa ashkha watastaña Jehovata sirvishanku, qhawarina imachus paykunata yanapasqanta tantakuykunapi sumajta uyarinankupaj. Ashley sutiyoj hermanaqa 30 watasmanta astawanña Jehovata sirvishan. Pay nin: “Tantakuykunapajqa wakichikunaypuni tiyan, mana wakichikunichu chayqa mana comentayta atillanichu, yuyayniypis waj imaspi kashan”, nispa. Hermanonchej Jozseftaj 52 watastaña Jehovata sirvishan. Pay nin: “Tantakuykunapi kikin temasmanta discursosta uyareyqa mayta gustawan, chaypi reparani kikin temasmanta sapa hermano imaynatachus yachachisqanta, waj imastataj yachakushanipuni”, nispa. Pay nillanpuni: “Uj hermano mana sumaj discursantechu kajtin, astawanqa qhawani imatachus yachachishasqanta, manataj imayna discursantechus kasqantachu”.

17. ¿Imatawán ruwawaj tantakuykunapi sumajta uyarinaykipaj? (Fototawan qhawariy).

¹⁷ Kay urapi kaj yuyaychaykunapis tantakuykunapi kashajtinchej sumajta uyarinapaj yanapawasunman. 1) Niraj tantakuyman rishaspa mikhunki chayqa, ama anchata mikhuykuychu puñurpachisunanpaj jina. 2) Temprano chayay, maypichus tiyakunaykitapis qhawariy. 3) Celularniykita chayri waj aparatosta chʼinyachiy mana pantachisunanpaj. 4) Discursante imasmantachus parlarenqa chaypi tʼukuriy. 5) Discursantetapuni qhaway, amataj waj ladosta qhawaykachaychu. 6) Imastachus yachakushasqaykita anotakuy chayri dibujosta ruway. 7) Leerisqan versiculospi tʼukuriy, qhawariytaj chay temawan imayna ujchasqachus chay versículos kasqanta. 8) Kayta tapurikuy: “¿Imaynatá kay yachakusqaywan congregacionpi chayri predicacionpi pillatapis yanapariyman?”. 9) Asamblea ñaupajta allinta qhawaykuriy imachus chay asambleapaj tema kasqanta, discursospa titulosninta, ima versiculosman jinachus ruwakunantapis. 10) Sonqoykita wakichinaykipaj asamblea qallarisqantawankama asientoykipi tiyakuy, sumajtataj uyariy takiykunata chayri takiykunasniyoj videota.

JEHOVATA UYARINALLAPUNI

18. ¿Imaraykutaj tantakuykunata sumajta uyarinallapuni tiyan?

¹⁸ Tantakuykunapi kashaspa sumajta uyarinallapuni. Ajinamanta saqeshanchej Jehová “cheqan ñanninta” pusanawanchejta (Sal. 23:3; 31:3). Uj barcotaqa wayra maymanpis aparpayta atillanman. Noqanchejpis chay barco jina mana maymanpis aparpasqa kanapaj, Jehovaj yuyaychaykunasninta necesitanchej. Chayrayku allinta qhawarikuna imaynatachus tantakuykunata uyarishasqanchejta, chay yachakusqanchejman jinataj kausayninchejpi ruwana (Luc. 8:18). Jehovata sumajta uyarisunchej chayqa, kunan kusisqa kausakusunchej, aswan qhepamantaj wiñaypaj kausakusunchej (Sal. 119:2, 14).