¿Imaraykutaj Bibliaj yuyaychaykunasnin may sumaj?

1, 2. 1) ¿Imaraykutaj ninchej Biblia may unayniyoj kasqanta? 2) ¿Imaraykutaj Biblia yanapashallawanchejpuni?

BIBLIAQA may unayniyoj. Qhelqayta qallarikusqanmanta 3.500 watas jinaña pasan, tukuchakusqanmantataj 2.000 watas jinaña pasallantaj. May unayniyoj kajtinpis chaypeqa ‘Diospa palabran’ kashan, chaytaj kausayniyoj, may atiyniyojtaj (Heb. 4:12; 2 Tim. 3:16, 17). May chhika runas kausayninkuwan rikuchinku Biblia paykunata yanapasqanta llakiykunasninkuta atipanankupaj.

² ¿Imaraykutaj Biblia chay jina unayniyoj kaspapis kunankama yanapashallawanchejpuni? Iskay imasrayku. Ñaupajtaqa, Bibliapi ‘kausaj Diospa’ nisqasnin kashasqanrayku. Pay ruwawarqanchej, nitaj pipis paymanta aswan yachayniyoj kanchu (1 Tim. 4:10; Rom. 16:26, 27). Iskay kaj, Bibliapeqa yuyaychaykuna tiyan. Chaykunataj tiempo pasajtinpis mana cambianchu. Ima tiempopi kausajtinchejpis, ima problemayoj kajtinchejpis chay yuyaychaykunaqa yanapallawanchejpuni.

3. ¿Ima tapuykunamán kay yachaqanapi kutichisun?

³ ¿Imataj Bibliaj yuyaychaykunasnin? ¿Imaraykutaj allinta entiendena tiyan Bibliaj yuyaychaykunasninta? ¿Imaynatá Bibliata leeshaspa reparasunman Bibliaj yuyaychaykunasninta? Chay tapuykunata kay yachaqanapi kutichisunchej. Chanta qhawarillasuntaj imaynatachus Jesús runasta yanapasqanta Jehovaj yuyasqanta entiendenankupaj.

¿IMATAJ BIBLIAJ YUYAYCHAYKUNASNIN?

4. ¿Imataj Bibliaj yuyaychaykunasnin?

⁴ Bibliaj yuyaychaykunasnenqa cheqa yachachiykuna kanku. Chaykunaman jinataj Diosqa kamachiykunata churan. Chayrayku Jehovaj kamachiykunasnenqa mana qhasillamantachu churasqa kashanku. Wakin kutisqa uj kamachiypi uj yuyaychay sutʼi reparay kashan (Mat. 22:37). Jinapis yuyaychaykunaqa, kamachiykunamanta nisqa aswan patapi kashan. Kamachiykunaqa sutʼita nin imatachus ruwana kasqanta, pisi imasllamantaj japʼichin. Chantapis uj tiempollapaj kanman chayri uj imallapaj. Pero Bibliaj yuyaychaykunasnenqa ashkha imasman japʼichin, imaynatachus Dios yuyasqantapis reparachiwanchej. Chaykunataj yanapawanchej imaspi rikukojtinchejpis, ima tiempopi kausakojtinchejpis (Sal. 119:111). Leyesqa wakin kutis cambian, Bibliaj yuyaychaykunasnintaj ni jaykʼaj cambianchu, nitaj uj tiempollapajchu (Isa. 40:8).

5. Uj kikinchaywan sutʼinchariy kamachiykunawan yuyaychaykunawan mana kikinchu kasqanta (fotostawan qhawariy).

⁵ Kamachiykunawan yuyaychaykunawan mana kikinchu kasqanta entiendenapaj uj kikinchaymanta parlarina. Uj mama waykʼushajtin lloqallitunta nin “ama cocinaman chimpamunkichu” nispa. Chayqa uj kamachiy. ¿Ima yuyaychayman jinataj chay kamachiyta churakun? Mana ima ruphatapis tʼojpinachu mana ruphachikunapaj. Pero chay yuyaychayqa mana cocinallapajchu. Astawanqa rupha planchapaj chayri waj rupha imaspajpis. Chantapis chay yuyaychayqa mana wasillapajchu kanman, manaqa waj lugarespajpis kallanmantaj. Chay lloqallitoqa wiñaspa ichapis waykʼonqapuni, jinapis mana ruphachikunanpaj cuidakunallanpuni kanqa. Chaypi reparasunman uj leyqa cambiayta atisqanta, uj yuyaychaytaj ni jaykʼaj cambianqachu.

¿IMARAYKUTAJ ALLINTA ENTIENDENA TIYAN BIBLIAJ YUYAYCHAYKUNASNINTA?

6. 1) ¿Imaynatá Jehová Palabranwan yanapawanchej? 2) ¿Imaynatá Jehová rikuchin jatunpaj qhawawasqanchejta?

⁶ Jehovaqa munakuwasqanchejrayku leyesta, kamachiykunatapis qowanchej cuidanawanchejpaj (Sant. 2:11). Chantapis ima yuyaychaykunaman jinachus chay kamachiykunata churasqanta entiendechillawanchejtaj. Jinapis Jehovaqa mana tukuy imapajpunichu kamachiykunata churan. Wakin imaspaj mana uj ley kajtinpis palabranwan yanapawanchej allin kajtapuni ajllanapaj. Jehovaqa mana tukuy imapajpunichu kamachiykunata churaspa jatunpaj qhawawasqanchejta rikuchiwanchej. Payqa ajllakojta saqewanchej, ajinamanta munakusqanchejta rikuchinanchejpaj, kamachiykunasnintapis jatunpaj qhawasqanchejta rikuchinanchejpaj (Gál. 5:13).

7. Uj kikinchaywan sutʼinchariy imaynatachus Bibliaj yuyaychaykunasnin yanapawasqanchejta (dibujotawan qhawariy).

⁷ Bibliaj yuyaychaykunasnin imaynatachus yanapawasqanchejta reparanapaj auto ñanpi ima señaleschus kasqanpi piensarina. Wakin señalesqa choferesman rikuchin ima leyestachus kasukunankuta mana multachikunankupaj chayri mana castigachikunankupaj. Wakenqa rikuchinman ima velocidadpichus manejayta atisqankuta, wakintaj ima ratochus sayananku kasqanta. Jinapis waj laya señales kallantaj, chaykunataj choferesman rikuchin imamantachus allinta qhawarikunankuta mana llakiypi rikukunankupaj. Ichapis uj señal rikuchinman uj lugar suchuykuyta yachasqanta chayri chaynejpi animales kasqanta. Chay señalesta rikuspa uj sumaj choferqa allinta yuyaychakun autonta cuidadowan apananpaj. Ajinamanta sinchʼita parajtin chayri ñan mana allinchu kajtin calmawan apanqa. Ajinallatataj uj cristianopis mana Bibliaj juchachasqan imasllatachu mana ruwananpaj allinta qhawarikun. Manaqa allinta qhawarikullantaj ima yuyaykunachus, ima ruwaykunachus Diospa kamachiykunasninta mana kasukunanpaj tanqanman chay imasmantapis. Chaypajtaj uj cristianoqa sumajta reparanan tiyan imaynatachus Jehová chay imasmanta piensasqanta.

8. Romanos 12:1, 2 nisqanman jina, ¿imaynatá yanapawanchej Bibliaj yuyaychaykunasninta reparay?

⁸ Bibliaj yuyaychaykunasninta maskʼanapaj kallpachakojtinchej, chayman jinataj kausakojtinchej wakin imasmanta Jehová jina yuyayta yachakunchej. Bibliata leespaqa sumaj imasta yachakunapaj kallpachakunchej. Tapurikunchejtaj imaraykuchus Jehová chayta Bibliapi qhelqachisqanta, imaynatachus kausayninchejpi chayman jina ruwanatapis. Ajinamanta ‘tukuy yuyayninchejwan’ Jehovata sirviyta yachakunchej. Chantapis sutʼita reparanchej “Diospa munaynenqa kʼacha, cheqan, payta kusichinanpaj jinataj kasqanta” (Romanos 12:1, 2 leey).a

9. ¿Imaynamantawán yanapawanchej Bibliaj yuyaychaykunasninman jina kausakusqanchej? (Hebreos 5:13, 14).

⁹ Bibliaj yuyaychaykunasninman jina kausakuspaqa wiñay tukusqa cristianosman tukunchej. Imachus Jehovaman gustasqanta, imatachus Jehová chejnikusqantapis aswan sumajta entiendespaqa aswan sumajta ajllanchej, Jehovawantaj aswan sumaj amigos kanchej (Hebreos 5:13, 14 leey). Tatasqa ashkha imasta juchʼuy wawasninkuman kamachiyta yachanku allin imasta ruwanankupaj. Wawastaj mana castigachikunankuraykulla chay kamachisqankuta kasukuyta yachanku. Jehovatajrí mana juchʼuy wawasman jinachu tukuy imata kamachiwanchej. Payqa yachan munayninman jina imatapis ajllananchejta. Ajinata ruwaspaqa mayta kusichisunchej (Sal. 147:11; Pro. 23:15, 26; 27:11).

¿IMAYNATÁ BIBLIAJ YUYAYCHAYKUNASNINTA REPARASUNMAN?

10. ¿Imaynatá Bibliaj yuyaychaykunasninta reparasunman?

¹⁰ Bibliata leespaqa kallpachakuna imatachus chaymanta yachakusqanchejta reparanapaj. Chaytaj imaynatachus Jehová piensasqanta entiendenapaj yanapawasun. Chantá imaraykuchus Jehová wakin kamachiykunata churasqanta entiendespaqa Bibliaj yuyaychaykunasninta reparallanchejtaj. Imaraykuchus kamachiykunata churasqanta aswan sumajta entiendespataj, imaynatachus Jehová piensasqanta aswan sumajta entiendesun. Jinapis chaypajqa Diosmanta yanapata mañakunanchej tiyan. Chantapis allinta piensariyta yachakunapaj kallpachakunanchej tiyan (Pro. 2:10-12). Kay imaspi piensarisunman: “¿Imaraykutaj kay leyta Dios churarqa? Kay ruwayta Jehová mana allinpajchu qhawan chay, ¿ima nenqataj chayman rijchʼakoj imasta ruwajtiy? ¿Imatá kay leesqaymanta yachakuni? ¿Imaynatá chayman jina kausayniypi ruwayman?”. Imaraykuchus Jehová uj kamachiyta churasqanta entiendespa, chantá imatachus Bibliamanta yachakusqanchejta reparaspa, Jehovata kusichinapaj jina allin imasta ajllasun.

11. ¿Imaynatá Jesús Orqopi Yachachishaspa yuyaychaykunata reparayta yachacherqa? (Fototawan qhawariy).

¹¹ Jesusqa Orqopi Yachachishaspa Bibliaj yuyaychaykunasninta reparayta yachacherqa. Kinsa imasta yachachisqanmanta parlarina. Sapa ujninpi Jesusqa ñaupajta uj kamachiymanta parlarqa, chantá ima yuyaychayman jinachus chay kamachiy churakusqanta sutʼincharqa. Chay sutʼinchasqanpi tʼukurispaqa imaynatachus chay yuyaychaykunaman jina kausakunanchejta yachakusun. Yachakullasuntaj imaynatachus chay yuyaychaykunaman jina ruway yanapawasqanchejta.

12. Mateo 5:21, 22 versiculospi rikhurej kamachiypi, ¿ima yuyaychaytaj kashan? (Fototawan qhawariy).

¹² (Mateo 5:21, 22 leey). “Ama runata wañuchinkichu”. ¿Ima yuyaychaytataj chay leypi reparanchej? Jehovaqa mana munanchu wajkunata chejnikunanchejta. Nillataj munanchu chay chejnikuy kananta ni ruwasqanchejpi, ni parlasqanchejpi, ni yuyayninchejpipis. Jesusqa sutʼincharqa uj runa ni pita wañuchejtinpis hermanonta chejnikun chayqa, chay runaqa chay leypa yuyaychayninta mana kasukushasqanta. “Pipis hermanonpaj phiñasqallapuni kanman chayqa”, chayri sonqonta nanachinanpaj jina imastapis ninman chayqa, Diosman cuentata qonan kanqa. Imaraykuchus chay ruwaykunaqa uj runata tanqan runata wañuchinanpaj (1 Juan 3:15).

13. ¿Imaynatá Mateo 5:21, 22 versiculospi yuyaychayman jina ruwasunman? (Fototawan qhawariy).

¹³ ¿Imaynatá Mateo 5:21, 22 versiculospi yuyaychayman jina ruwasunman? Kallpachakuna tiyan mana sientesqa kanapaj, nitaj phiñasqallapuni kanapaj (Lev. 19:18; Job 36:13). Imaraykuchus chay imas sonqonchejpi kajtenqa astawan chejnikuyta qallarisunman, wajkunaj sonqonkuta nanachinapaj jinataj imatapis parlasunman chayri ruwasunman (Pro. 10:12). Phiñasqallapuni kaspaqa wajkunamanta cuentosta rikhurichisunman, llullakuspa parlasunman, chaytaj paykunata malpi quedachinman (Pro. 20:19; 25:23). Jesús unayña chay yuyaychayta sutʼinchajtinpis, kay tiempopi wiñay tukusqa cristianosta yanapawanchej redes socialesta, internetta, chateanapaj aplicacionestapis allinta apaykachanapaj, nitaj wajkunamanta mana allin imasta chay imaspi churanapaj. Chayrayku mayta kallpachakunanchej tiyan mana wajkunamanta chejnikuspa jina parlanapaj.

14. ¿Ima yuyaychaytaj Mateo 5:27, 28 versiculospi kashan? (Fototawan qhawariy).

¹⁴ (Mateo 5:27, 28 leey). “Ama qhenchachakunkichu”. ¿Ima yuyaychaytataj chay leypi reparanchej? Jehovaqa mana qhenchachakuyllatachu chejnikun, manaqa ima yuyaykunachus chayman apawasunman chaykunatapis. Jesús sutʼincharqa sichus uj casado runa waj warmita qhawashallanpuni paywan puñuykuyta munaspa chayqa, ñapis juchachakusqantaña. Chayrayku qhenchachakuyman apaj yuyaykunataqa mana atikojtinpis, umanchejmanta orqhonanchejpuni tiyan (Mat. 5:29, 30). Chay yuyaychayqa soltero cristianospajpis kikillantaj kashan.

15. ¿Imaynatá Mateo 5:27, 28 versiculospi yuyaychayman jina kay tiempopi ruwasunman? (Fototawan qhawariy).

¹⁵ ¿Imaynatá Mateo 5:27, 28 versiculospi yuyaychayman jina ruwasunman? Mana khuchichakuy imaspi yuyaspa (2 Sam. 11:2-4; Job 31:1-3). Chayrayku wiñay tukusqa cristianosqa ni ima laya pornografiata qhawankuchu, nitaj ninkuchu: “Qhawashallani, mana khuchichakushanichu”, nispa. Nillataj ninkuchu: “Kayqa mana sinchʼi pornografiapunichu, mana juchapi urmachiwanqachu”, nispa. Jesuspa tiemponpeqa mana kay tiempopi jina aparatos karqachu, ni películas, ni fotospis. Jinapis sutʼinchasqan yuyaychayqa reparachiwanchej imatachus Jehová yuyasqanta chay aparatospi rikhurej khuchichakuy imasmanta. Chayqa sutʼita reparachiwanchej Jehovaqa nipuni allinpajchu qhawasqanta, runas khuchichakuy imasmanta fotosta chayri videosta apachinakusqankuta, chayri khuchichakuy imasmanta celularnejta chayri mensajesnejta parlasqankuta. Jesuspa qosqan yuyaychayqa casadosta yanapan mana wasanchanakunankupaj (Mal. 2:15). Jinapis chay yuyaychayqa tukuy cristianosta yanapawanchej, casados kajtinchejpis chayri solteros kajtinchejpis mana khuchichakuy juchapi urmananchejpaj (Pro. 5:3-14).

16. ¿Ima yuyaychaytaj Mateo 5:43, 44 versiculospi kashan? (Fototawan qhawariy).

¹⁶ (Mateo 5:43, 44 leey). “Runa masiykita munakuy”. ¿Ima yuyaychaytataj chay leypi reparanchej? Jehovaqa munan tukuy runasta munakunanchejta. Jesuspa tiemponmanta judiostajrí mana chay kamachiyta allintachu juntʼarqanku. Paykunaqa enemigosninkuta chejnikuyta atisqankuta yachachej kanku. Jinapis Jesusqa sutʼita yacharqa mana chaypajchu Jehová chay kamachiyta churasqanta. Payqa yacharqa munakuyniyoj cielopi kashaj Tatanqa tukuy runasta munakunanchejta munasqanta maymanta kajtinkupis, imayna rijchʼayniyoj kajtinkupis (Mat. 5:45-48).

17. ¿Imaynatá Mateo 5:43, 44 versiculospi yuyaychayman jina ruwasunman? (Fototawan qhawariy).

¹⁷ ¿Imaynatá Mateo 5:43, 44 versiculospi yuyaychayman jina ruwasunman? Runa masinchejta munakusqanchejrayku mana guerrasman, nitaj kay mundopi chʼajwasman satʼikunchejchu (Isa. 2:4; Miq. 4:3). Chantapis chay yuyaychayqa yanapawanchej tukuy runaswan kʼachas kanapaj maymanta kajtinkupis, ima rijchʼayniyoj kajtinkupis, chayri waj religionniyoj kajtinkupis (Hech. 10:34, 35). Chantapis munakusqanchejrayku, pikunachus sajrata ruwawanchej, chayri familiaresninchejta manachayri amigosninchejta sajrata ruwanku chaykunata perdonanchej (Mat. 18:21, 22; Mar. 11:25; Luc. 17:3, 4).

BIBLIAJ YUYAYCHAYKUNASNINMAN JINALLAPUNI KAUSAKUNA

18. 1) ¿Imapajtaj kallpachakuyta munanchej? 2) ¿Imamantataj qhepan yachaqanapi yachakusun?

¹⁸ Mayta Jehovaman agradecekunchej mana juchʼuy wawasman jinachu ashkha kamachiykunata qowasqanchejmanta. Payqa munan Bibliaj yuyaychaykunasninwan yanapachikunanchejta sapa día allin imasta ajllanapaj (1 Cor. 14:20). Imatapis ajllashaspataj kallpachakuna ‘allinta reparanapaj imachus Jehová Diospa munaynin kasqanta’ (Efe. 5:17). Allin imasta ajllayta munanchej Jehovata munakusqanchejrayku, paytataj kusichiyta munasqanchejrayku, manataj castigasqa kayta manchachikusqanchejraykuchu. Chayta ruwanapajtaj Jehovaqa uj sumaj yanapatawan qowanchej. Chaytaj kashan conciencianchej. Chaymanta qhepan yachaqanapi yachakusun.