¿Diosninchej llakiyninchejta entiendenchu?

¿IMAYNATÁ DIOS RUWAWARQANCHEJ?

Gemelo hermanosmanta parlarina. Paykunaqa sumaj ujchasqas kanku. Nancy Segalqa gemela hermanayoj. Payqa maypichus gemelosta estudianku chay lugarmanta directora. Pay nin: “Ujnin gemelo niraj imatapis parlayta tukushajtin, ujnenqa ñapis entiendenña imatachus niyta munasqanta”, nispa. Waj warmitaj nin: “Gemela hermanayqa sumajta rejsiwan, noqapis payta sumajta rejsini”, nispa.

¿Imaraykutaj gemelos ajinata entiendenakunku? Gemelosmanta yachajkuna nisqankuman jina, ichapis tatasninkurayku chayri maypichus uywasqa kasqankurayku jinata entiendenakunku. Jinapis astawanqa entiendenakunku mamankoj wijsanpi imayna ruwasqachus kasqankurayku.

TʼUKURINA: Diosninchej Jehovaqa sumajta yachan imaynachus sapa ujninchej ruwasqa kasqanchejta. Chayrayku ñaupa tiempomanta rey David jinata nerqa: “Mamaypa wijsanpi allin cuidasqata japʼiwarqanki. Tullitusniypis mana pakasqachu kasharqa ñawisniykimanta, pakaypi ruwasqa kashajtiy. [...] Ñawisniykeqa rikuwarqankuña mamaypa wijsanpi rikhurishajtiy. Libroykipi qhelqasqaña kasharqa cuerpoypa tukuy imasnin”, nispa (Salmo 139:13, 15, 16). Diosnillanchej sumajta yachan imaynatachus mamanchejpa wijsanpi wiñakusqanchejta. Payqa yachallantaj imayna uywasqachus kasqanchejta. Diosninchej ajinata rejsiwasqanchejqa, rikuchiwanchej noqanchejmanta tukuy imatapuni yachasqanta.

¿IMATÁ BIBLIA YACHACHIWANCHEJ?

Davidqa Jehová Diosman nerqa: “Jehová Diosníy, qanmin sumajta qhawaykuriwanki, rejsiwankitaj. Qan yachanki maykʼajchus tiyaykusqayta, maykʼajchus sayarikusqaytapis. Imatachus yuyasqaytapis karumantapacha yachanki. Niraj ni imata simiy parlashajtinpis, qan Jehová Diosníy yachankiña imatachus ninayta”, nispa (Salmo 139:1, 2, 4). Jehová Diosninchejqa yachan imachus sonqonchejpi kasqanta, imaspichus piensasqanchejtapis (1 Crónicas 28:9; 1 Samuel 16:6, 7). Qhawarinachej imaynatachus Dios entiendewasqanchejta.

Diosninchejqa mana ruwasqallanchejtachu qhawan, manaqa yachan ima yuyaywanchus, ima sonqowantajchus imatapis ruwasqanchejta. Chayrayku orakushaspa imaynapunichus kashasqanchejta mana willakuyta atejtinchejpis, payqa imaynachus kashasqanchejta yachanña. Payqa yachallantaj kausayninchej waj jina kajtin imastachus ruwayta atisqanchejta. Chantapis Diosninchejqa, munakuyta atinanchejpaj jina ruwawarqanchej. Chayrayku mana iskayrayananchejchu tiyan allin imasta ruwayta munasqanchejta, allin imaspi yuyasqanchejtapis Diosqa mayta yachayta, entiendeyta ima munasqanta (1 Juan 4:7-10).

Biblia niwanchej

• “Jehová Diosqa cheqan runasta qhawamushan, mayta mañakusqankutapis uyarimushan” (1 PEDRO 3:12).

• Diosqa niwanchej: “Allin yuyayta qosqayki, mayqen ñantachus rinaykitapis rikuchisqayki. Noqa yuyaychasqayki, qhawamusqaykitaj” (SALMO 32:8).

DIOSQA MAY KʼACHAPUNI

Diosninchej llakiyninchejta entiendesqanta yachay, ¿yanapawasunmanchu? Arí, llakiykunata aguantanapaj yanapawanchej. Lidiaj kausaynin chayta rikuchiwanchej. Payqa Nigeria suyumanta. Pay nin: “Sinchʼi llakiypi kasqayrayku wañupullaytaña munaj kani. Ñaupajta qosay wañuporqa, imillitaytaj ñojtitunpi yaku kasqanrayku hospitalpi kasharqa. Jinallapi doctores ñuñusniypi cancerniyoj kasqayta niwarqanku. Chantá operawarqanku, quimioterapiatawan radioterapiatawantaj ruwachiwarqanku. Wawitaywan khuska hospitalpi internasqa karqayku. Chayqa noqapaj may llakiypuni karqa”, nispa.

¿Imaynatataj Lidia chay llakiykunasninta aguantarqa? Pay nin: “Filipenses 4:6, 7 nisqanpi tʼukurej kani. Chaypeqa nin: ‘Diosqa sonqo tiyaykuyta qosonqachej, mayqentachus runas mana entiendeyta atinkuchu chayta. Ajinamanta payqa sonqoykichejta, yuyayniykichejtawan waqaychanqa’, nispa. Chay versiculosta sapa yuyarikojtiy, Jehová Dios ladoypipis kashanman jinata reparaj kani. Yacharqani payqa ni pi jina sumajta entiendewasqanta. Cristiano hermanosniypis mayta sonqochawarqanku”, nispa.

Lidia nillantaj: “Nirajpuni allin sanochu kani. Jinapis wawitaywan noqawanqa, manaña anchata llakikuykuchu. Tatanchej Jehová yanapawasqaykurayku llakiykunasniykuta aguantallayku. Santiago 5:11 niwanchej: ‘Pikunachus aguantarqanku chaykunata, kusisqas kasqankuta ninchej. Qankunaqa Job ñakʼariykunata aguantasqanmanta uyarerqankichej, yachankichejtaj Jehová Dios payta bendecisqanta. Chayrayku yachankichej Jehová Diosqa manchay munakuyniyoj, khuyakuyniyojtaj kasqanta’, nispa”. Jehová Diosninchejqa Jobpa llakiyninta sumajta entienderqa, llakiyninchejtapis ajinallatataj entienden.