¿Diosninchej qhawamushawanchejchu?

¿IMAYNATÁ DIOS RUWAWARQANCHEJ?

Wawita nacekusqantawan, ñaupaj horata mamanwan kananqa may sumaj. Chayqa mamata yanapan wawitanta astawan munakunanpaj. Ajina munasqa wawitastaj allinta, kusisqataj wiñakunku.a

¿Imaraykutaj mamas wawitanku nacekojtin mayta munakunku? Jeannette Crenshaw sutiyoj profesora, uj revistapi jinata nerqa: “Wawitata nacechikoj warmispi, oxitocina nisqa hormona yapakun. Chayrayku uj mamaqa wawitanta ñuñuchishajtin, qhawarishajtin, munarikushajtin ima, astawan wawitanta munakun”, nispa. Mamaspeqa chay kutispi waj hormona yapakullantaj. Chaytaj mamasta yanapan wawitankuta munakuywan cuidanankupaj, pujllarichinankupaj, parlapayarinankupaj ima. Ajinamanta wawitankuta astawanraj munakunku. ¿Imatá chaymanta yachakunchej?

Diosninchej Jehovaqab mamasta ruwarqa wawitankuta munakunankupaj jina. Ñaupa tiempomanta rey Davidqa, Diosman nerqa: “Qanmin mamaypa wijsanmanta nacechiwarqanki. Qanmin cuidawarqanki mamay ñuñuchishawajtin”, nispa. Uj mañakuypitaj nerqa: “Nacekusqaymantapacha cuidawanki. Mamaypa wijsanpi kasqaymantapacha qanmin Diosniy kanki”, nispa (Salmo 22:9, 10).

TʼUKURINA: Diosninchejqa mamasta ruwarqa wawitankuman necesitasqankuta qonankupaj, munakuywantaj cuidanankupaj. Noqanchejtaj ‘Diospa wawasnin kanchej’. ¿Manachu Diosninchej noqanchejtapis munakuywan cuidawasunman? (Hechos 17:29).

¿IMATÁ BIBLIA YACHACHIWANCHEJ?

Jesucristoqa Diosninchej Jehovata sumajta rejsin. Paytaj nerqa: “Iskay pʼisqetustaqa pisi valorniyoj qolqellapi vendenku, ¿icharí? Chaywanpis ni uj pʼisqetullapis pampaman urmanchu mana Tataykichejpa yachanantaqa. Umaykichejmanta chujchasniykichejpis tukuyninku yupasqa kashanku. Chayrayku ama manchachikuychejchu, qankunaqa ashkha pʼisqetusmantapis astawanraj valenkichej”, nispa (Mateo 10:29-31).

Wakin kutisqa pʼisqetusta mana qhawarillanchejpischu, nitaj yachanchejchu pampaman urmasqankutachus manachus. Cielopi kaj Tatanchejrí uj pʼisqetu urmasqantapis sumajta yachan. Runastaj ashkha pʼisqetusmantapis, astawanraj paypaj valenchej. ¿Imatá chay yachachiwanchej? Diosninchejqa sapa ujninchejmanta llakikusqantapuni.

Biblia niwanchej

• “Jehová Diospa ñawisnenqa jallpʼantinta qhawamushan, payta tukuy sonqo sirvejkunata yanapananpaj” (2 CRÓNICAS 16:9).

• “Jehová Diosqa cheqan runasta qhawamushan. Yanapata mañakuspa qhaparikusqankuta uyarimushan” (SALMO 34:15).

• “Diosníy, munakuwasqaykirayku maytapuni kusikusaj. Qanmin rikunki imayna llakisqachus kashasqayta. Qanmin yachanki sinchʼi phutisqa kashasqayta” (SALMO 31:7).

“YUYARQANI JEHOVÁ DIOS MANA MUNAKUWASQANTA”

Dios noqanchejmanta llakikusqanta yachay, munakuwasqanchejtataj yachay, ¿yanapawanchejchu? Arí. Anajc kausaynin chayta rikuchiwanchej. Payqa Inglaterra suyumanta.

Ana nin: “Ashkha kutispi yuyarqani Jehová Dios mana munakuwasqanta, mañakusqaytapis mana uyariwasqanta. Nejtaj kani: ‘Pisi creeyniyojchá kani. Nichá Diospaj valenichu, chayraykuchá castigashawan’, nispa. Mana reparajchu kani Dios noqamanta llakikusqanta”.

Anaqa kunan niña jinatachu yuyan. ¿Imataj yanaparqa Jehová Dios munakusqanta reparananpaj? Pay nin: “Dios munakuwasqanta pisimanta pisi repararqani. Uj pacha, uj hermanota Bibliamanta parlamojta uyarerqani. Payqa nerqa Jehová Dios mayta munakuwasqanchejrayku, Wawan Jesusta noqanchejrayku wañunanpaj kachamusqanta. Chayta yachayqa sonqoyta wawayacherqa. Mañakusqayta Dios uyariwajtintaj waqarikoj kani. Jehová Dios munakuwasqanta yacharqani. Bibliata estudiaspa, tantakuykunaman rispa ima, Jehovata astawan rejserqani, munakuwasqanchejtataj yachakorqani. Kunanqa sutʼita yachani Jehová Diosninchej sapa ujninchejmanta llakikusqanta, yanapawasqanchejtataj”, nispa.

Anaj nisqanqa mayta kallpachawanchej. Jinapis, ¿imaynatá yachasunman Diosninchej entiendewasqanchejta, imaynachus kashasqanchejtapis yachasqanta? Qhepan yachaqanapi chaymanta parlarisun.