¿Imajtintaj kay jallpʼapi mana allin kausay kanchu?

Bibliaj kutichisqan

Runasqa sapallankumanta ni jaykʼaj allin kausayta apamonqankuchu. Imajtinchus chayta nisqanchejta qhawarina:

• “Runaqa mana nillaytapis atinchu imatachus kausayninpi ruwananta” (Jeremías 10:23). Runasqa ni runa masinkuta, ni paykuna kikinkutapis kamachikunankupajchu ruwasqa kanku. Chayrayku manapuni allin kausayta apamuyta atinkuchu.

• “Ama kamachejkunapi atienekuychejchu nillataj waj runaspipis, paykunaqa mana salvayta atinkuchu. Runa wañojtenqa jallpʼaman kutipun. Chay kikin pʼunchaytaj tukuy ima yuyasqanpis chinkapun” (Salmo 146:3, 4). Allin kajta ruwayta munaj gobiernospis mana chinkachiyta atinkuchu imaschus guerrasta rikhurichin chay imasta.

• “Qhepa pʼunchaykunapeqa kausay may llakiy kanqa, maytataj sajrayanqa. Runasqa […] manchay phiñas kanqanku, allin kajta mana munakonqankuchu, amigosninkoj contranpi sayaykonqanku, kʼullus kanqanku, mayta runaykachanqanku” (2 Timoteo 3:1-4). Kay mundoj qhepa pʼunchaykunasninpi kausakusqanchejrayku runasqa manaña allin kausayniyojchu kanku. Chayraykutaj mana chʼajwasta allinchankuchu.

• “Ay jallpʼamanta, mar qochamantawan, Diabloqa qankunaman uraykamun manchay phiñasqa, paypaj pisi tiempollaña kasqanta yachaspa” (Apocalipsis 12:12). Diospa enemigon Diabloqa kay jallpʼaman wijchʼuchikamun, runastataj tanqan sajra imasta ruwanankupaj, nitaj khuyakunankupaj. Diablo kay mundota kamachishajtenqa nipuni allin kausay kanqachu (Juan 12:31).

• “[Diospa Gobiernonqa payman churanakoj tukuy] gobiernosta tʼunanqa, chinkachenqataj. Ajinamanta chay gobiernollaña wiñaypaj wiñaynintinpaj sayanqa” (Daniel 2:44). Diospa Gobiernollan wiñaypaj allin kausayta apamonqa, manataj runaspa gobiernosninkuchu (Salmo 145:16).